ADផ្ទាំងផ្សព្វផ្សាយពាណិជ្ជកម្ម

Picture

លោក​​អ្នកដឹង​ទេ? តើ​ប្រវត្តិ​ឈ្មោះ ​«​ផ្សារ​ព្រាត់​ប្រាស់​» ​មាន​ន័យ​បែប​ណា?

4 អាទិត្យ មុន
  • ស្វាយរៀង

ខេត្តស្វាយរៀង ៖ «​ផ្សារ​ព្រាត់ប្រាស់​» គឺ​មាន​ប្រវត្តិ​ព្រាត់ប្រាស់​គ្នា​គ្រប់​ជំនាន់ ដោយសារ​តែ​គូ​ស្នេ​ហ៌​មិន​គោរព​ប្រពៃណី ត្រូវ​ចាស់ទុំ​បំបែកបំបាក់​ដេញ​វាយ ដេញ​កាប់ ខាង​កូនប្រុស​រត់​ព្រាត់ប្រាស់​ពី​គូ​ស្នេ​ហ៌ ចាស់ទុំ​បាន​លើក​ឡើង​ថា ចាស់ទុំ​ខ្មែរ​យើង​ពី​បុរាណកាល​គាត់​ប្រកាន់​ណាស់…

ខេត្តស្វាយរៀង ៖ «​ផ្សារ​ព្រាត់ប្រាស់​» គឺ​មាន​ប្រវត្តិ​ព្រាត់ប្រាស់​គ្នា​គ្រប់​ជំនាន់ ដោយសារ​តែ​គូ​ស្នេ​ហ៌​មិន​គោរព​ប្រពៃណី ត្រូវ​ចាស់ទុំ​បំបែកបំបាក់​ដេញ​វាយ ដេញ​កាប់ ខាង​កូនប្រុស​រត់​ព្រាត់ប្រាស់​ពី​គូ​ស្នេ​ហ៌ ចាស់ទុំ​បាន​លើក​ឡើង​ថា ចាស់ទុំ​ខ្មែរ​យើង​ពី​បុរាណកាល​គាត់​ប្រកាន់​ណាស់ គឺ​ក​ម្លោះ​ក្រមុំ បើ​ស្រឡាញ់​គ្នា​ត្រូវ​ឲ្យ​ឪពុក​ម្តា​យមក​ស្តីដណ្តឹង​ដល់​ចាស់ទុំ ហើយ​រៀប​អា​ពា​ហ៌​ពិ​ពា​ហ៌​រួច ទើប​ឲ្យ​រស់នៅ​ជា​ប្តី​ប្រពន្ធ ជា​ពិសេស នៅ (​ភូមិ​ចំបក់ ឃុំ​ស្វាយ​ជ្រំ ខេត្ត​រំដួល នេះ ) បច្ចុប្បន្ន ឈ្មោះ​ភូមិ​ថ្មី ឃុំ​ចំបក់ ស្រុក​ស្វាយ​ជ្រំ​ខេត្តស្វាយរៀង ។

បើ​តាម​លោកតា​ស៊ា​ន អាយុ​៧២​ឆ្នាំ រស់នៅ​ក្នុង​ផ្សារ​ព្រាត់ប្រាស់​នេះ​បាន​ឲ្យ​ដឹង​ថា ផ្សារ​ព្រាត់ប្រាស់​នេះ​មាន​ប្រវត្តិ​ជា​ច្រើន​ជំនាន់​ខុស​គ្នា ចាស់ទុំ​តំណាល​ត​ៗ​គ្នា​មក​ថា កាលពី​អំឡុង​ឆ្នាំ​១៨៦៥ មាន​គូ​ស្នេ​ហ៌​មួយ​គូក​ម្លោះ​ក្រមុំ​បាន​នាំ​គ្នា​មក​រួមមេត្រី​នៅ​ក្នុងផ្ទះ​មួយ​ក្នុង​ផ្សារ​ចំបក់​នេះ បាន​ប្រមាណ​ជា​មួយ​ស​ប្តា​ហ៌ ម្តាយ​ឪពុក​ខាង​ស្រី​មក​រក​ឃើញ ក៏​នាំ​គ្នា​មក​យក​កូនស្រី​ត្រឡប់​ទៅ​វិញ ហើយ​បាន​ដេញ​កាប់​កូន​ក​ម្លោះ និង​សាច់ញាតិ​រត់​ព្រាត់ប្រាស់​ចោលផ្ទះ​សម្បែង​អស់​ទៅ ហើយ​ខាង​ឪពុក​ម្តាយកូន​ស្រី​ក៏​នាំ​យក​កូនស្រី​ត្រឡប់​ទៅ​ផ្ទះ​វិញ​ទៅ ។

ក្រោយមក ក្នុង​សម័យ​អាណានិគម​បារាំង​សេស ក្នុង​អំឡុង​ឆ្នាំ​១៩០១២ ក៏​មាន​គូ​ស្នេ​ហ៌​១​គូ​ទៀត​មក​ជួប​គ្នា​ក្នុង​ផ្សារ​ចំបក់​នេះ ហើយ​ក៏​ស្រឡាញ់​គ្នា​ចាក់ទឹកមិនលិច​ទេ តែងតែ​ណាត់ជួប​គ្នា​នៅ​ក្នុង​ផ្សារ​នេះ ។ ដោយ​ផ្សារ​ចំបក់​នេះ កាល​ណោះ ជា​ផ្សារ​តូច​មួយ នៅ​ជនបទ​ដាច់​ស្រយាល មាន​តូប​លក់ដូរ​ប្រមាណ​ជា​៧​ទៅ​៨​តូប​ប៉ុណ្ណោះ ហើយ​ការ​ណាត់​លួច​ជួប​គ្នា​មិន​បាន​ប៉ុន្មាន​ផង ក៏​ត្រូវ​បង​ប្អូន​ខាង​ស្រី​ដឹង ក៏​មក​បំបែក​យក កូនស្រី​ត្រឡប់​ទៅ​វិញ គូ​ស្នេ​ហ៌​ទី​២​នេះ បាន​ព្រាត់ប្រាស់​គ្នា​រហូត ។

លោកតា​ស៊ា​ន បាន​និយាយ​ទៀត​ថា នៅ​ក្នុង​អំឡុង​ឆ្នាំ​១៩៦៨ មានរឿង​ជម្លោះ​វាយតប់​គ្នា​២​នាក់​បងប្អូន កាល​ណោះ​មាន​តា​ម្នាក់​ឈ្មោះ​តា​ឈុំ មុខរបរ​រត់​រ៉ឺ​ម៉ក (​រ៉ឺ​ម៉ក​កង់​) ពេល​ឈប់​សម្រាក​នៅ​ពេល​ថ្ងៃត្រង់​តា ឈុំ​មក​ឈប់​រ៉ឺ​ម៉ក​នៅ​ផ្សារ​ចំបក់​នេះ ដើម្បី​ពិសា​របាយ ខណៈនោះ​លោកតា ញ៉ែ​ម បង​លោកតា​ឈុំ បាន​មក​ផ្សារ​ចំបក់​នេះ ហើយ​បាន​ទៅ​ទិញ​ស្រា​ពី​តូប​លោកតា​ជឿ​ង ឪពុក​របស់​គាត់ (​កាល​ណោះ​តា​ស៊ា​ន​អាយុ​១៧​ឆ្នាំ ឪពុក​គាត់​ឈ្មោះ​តា​ជឿ​ង អាយុ​៥១​ឆ្នាំ តា​ញ៉ែ​ម​និង​តា​ឈុំ អាយុ​ប្រហាក់ប្រហែល​តាជឿ​ង​ដែរ​) នាំ​គ្នា​អង្គុយ​ផឹកស៊ី​នៅ​ក្នុង​រោង​តូប​លោកតា​ជឿ​ង ខណៈនោះ​តា​ឈុំ​ក៏​មក​ពី​រត់​រ៉ឺ​ម៉ក​វិញ ក៏​ចូល​ទៅ​ផឹកស្រា​ជាមួយ​លោកតា​ញ៉ែ​ម​ផឹក​២​នាក់​បងប្អូន ។

ការ​ផឹកស៊ី​និយាយ​ព្រោកប្រាជ្ញ​បាន​ប្រមាណ​ជាមួយ​ម៉ោង តា​ឈុំ​ក៏​ឈឺ​បត់ជើងធំ ក៏​ដើរ​ចេញពី​រោង​ផឹក ប្រមាណ​ជា​៣០​ម៉ែត្រ​ក៏​ស្រាតខោ​ជុះ​ចំតិត​មក​រក​រោង​ផឹកស៊ី ។ តា​ញ៉ែ​ម​ឃើញ​តា​ឈុំ​បត់ជើងធំ​ចំតិត​គូទ ដាក់​មក​រក​រោង​បែប​នេះ តា​ញ៉ែ​ម​គាត់​ប្រកាន់​ខឹង​ក៏​ទៅ​ដេញ​វាយ​តា​ឈុំ ត្រូវជា​ច្រើន​ដៃ​ចំ​មុខ​បែក​មាត់ តា​ឈុំ​ក៏​រត់​លើក​ខោ​មិន​ទាន់ ដាច់​ខាន​ជុះ​មិន​ទាន់​អស់​ផង លើក​ខោ​រត់​ចោល​រ៉ឺ​ម៉ក​ម៉ក គឺ​រត់​យក​ប្រះ​អាយុ ។

ទីតាំង​កន្លែង​នេះ អ្នកស្រុក​ហៅ​ថា ផ្សារ​ចំតិត អ្នកខ្លះ​ហៅ​ថា ផ្សារ​ព្រាត់​ប្រាស់ ។ ក៏​ប៉ុន្តែ​ក្រោយមក មាន​គូរ​ស្នេ​ហ៌​ថ្មី​មួយទៀត​បាន​ពង្រត់​គ្នា​មក​សំងំ​រស់នៅ​ក្នុងភូមិ​ចំបក់​នេះ ។ ពេល​នាំ​គ្នា​មក​ផ្សារ​ចំបក់ ក៏​ត្រូវ​សាច់ញាតិ​ខាង​ស្រី​មក​ឃើញ​ក៏​នាំ​គ្នា​ដេញ​វាយ​ខាង​ប្រុស​ហើយ​ចាប់​អូស​បង្ខំ​យក​ខាង​ស្រី​ត្រឡប់​ទៅ​វិញទាំង​គូ​ស្នេ​ហ៌​១​គូ​នេះ​បាន​រួមរស់​ជាមួយ​គ្នា​ជា​ប្តី​ប្រពន្ធ​ទៅ​ហើយ ។ ទោះ​បែប​នេះ​ក្តី ក៏​ត្រូវ​ឪពុក​ម្តាយ​ខាង​ស្រី​បំបែក​គ្នា​ឲ្យ​ព្រាត់ប្រាស់​ប្តី​ប្រពន្ធ​អត់​ខាន់ស្លា​១​គូ​នេះ​ឲ្យ​ព្រាត់ប្រាស់​គ្នា​ដែរ ។

ចាស់ទុំ​នៅ​ភូមិ​ចំបក់​នេះ បាន​តំណាល​ត​ៗ​គ្នា​ថា នៅ​ភូមិ​ចំបក់​នេះ​ចាស់ទុំ​ប្រកាន់​ខ្លាំង​ណាស់ មិន​ថា​ក្រមុំក​ម្លោះ​ទេ ទោះបី​ស្ត្រី​មេម៉ាយ ឬ​មាន​ប្តី​មាន​ប្រពន្ធ​ហើយ​លួច​មាន​សាហា​យ​ស្មន់ ក៏​ត្រូវ​ចាស់ទុំ​និង​អ្នកស្រុក​គេ​បណ្តេញចេញ​ឲ្យ​ព្រាត់ប្រាស់​ពី​ភូមិ​ដែរ ទើប​អ្នកស្រុក​នេះ​ហៅ «​ផ្សារ​ចំតិត​»​ទៅ​ជា «​ផ្សារ​ព្រាត់ប្រាស់​» រហូត​បច្ចុប្បន្ន​នេះ ។

លោកតា​ម្នាក់​បាន​លើក​ឡើង​ថា មិនមែន​មាន​តែ​ពី​បុរាណ​កាលនោះ​ទេ នៅ​ផ្សារ​ព្រាត់ប្រាស់​នេះ នៅ​ជាង​១០​ឆ្នាំ​មុន ក៏​មាន​បុរស​ម្នាក់​នាំ​ប្រពន្ធ​កូន​មក​រកស៊ី​នៅ​ផ្សារ​ព្រាត់ប្រាស់​នេះ បាន​ទៅ​លួច​សហាយស្មន់​ជាមួយ​ប្រពន្ធ​គេ ក៏​ត្រូវ​ប្តី​គេ​ទាន់​ស្រែក​ឆោឡោ​ផ្អើល​ដល់​អ្នកផ្សារ​ព្រាត់ប្រាស់​នេះ និង​អ្នក​ភូមិ​បាន​នាំ​គ្នា​ដេញ​វាយ​រត់​ខ្ចាត់ខ្ចាយ ខ្លះ​កាន់​កាំបិត ពូថៅ ដេញ​កាប់​ធ្វើ​ឲ្យ​បុរស​នោះ​ភ័យ​រត់​ទាំង​ខ្លួន​ននលគក​ដៃ​ម្ខាង​កាន់​ខោ​លី​អូ​រត់​កាត់​វាលស្រែ ក៏​ប៉ុន្តែ​អ្នកស្រុក​មិន​បាន​កាប់​ឬ​វាយ​ទេ គ្រាន់​តែ​ដេញ​ប៉ុណ្ណោះ ធ្វើ​ឲ្យ​បុរស​នោះ​ខ្មាស់​អ្នកផ្សារ ក៏​គេចខ្លួន​ទៅ​រស់នៅ​ស្វាយ​រៀង​ចោល​ប្រពន្ធ​កូន គឺ​ព្រាត់ប្រាស់​ប្រពន្ធ​កូន​រហូត​សព្វថ្ងៃ ៕

អត្ថបទសរសេរ ដោយ

កែសម្រួលដោយ