សហរដ្ឋអាមេរិក ៖ ប្រធានក្រុមការងារពិសេសអង្គការសហប្រជាជាតិ (UN) ដែលមានគោលបំណងបញ្ចៀសវិបត្តិមនុស្សធម៌ដែលកំពុងតែកើតមាននោះ កាលពីថ្ងៃទី១១ ខែឧសភា ឆ្នាំ២០២៦ បានប្រាប់ AFP…
សហរដ្ឋអាមេរិក ៖ ប្រធានក្រុមការងារពិសេសអង្គការសហប្រជាជាតិ (UN) ដែលមានគោលបំណងបញ្ចៀសវិបត្តិមនុស្សធម៌ដែលកំពុងតែកើតមាននោះ កាលពីថ្ងៃទី១១ ខែឧសភា ឆ្នាំ២០២៦ បានប្រាប់ AFP ថា មនុស្សរាប់សិបលាននាក់ អាចប្រឈមមុខនឹងភាពអត់ឃ្លាន ប្រសិនបើជីកសិកម្មមិនត្រូវបានអនុញ្ញាតឱ្យដឹកជញ្ជូនឆ្លងកាត់ច្រកសមុទ្រហ័រមូស (Hormuz) នៅក្នុងពេលឆាប់ៗនេះទេ។
អ៊ីរ៉ង់បានបិទផ្លូវទឹកយុទ្ធសាស្ត្រដ៏សំខាន់មួយនេះ ដែលជាធម្មតាជីកសិកម្ម១ភាគ៣របស់ពិភពលោកឆ្លងកាត់អស់រយៈពេលជាច្រើនខែ ដើម្បីសងសឹកចំពោះសង្គ្រាមដែលបានចាប់ផ្តើមដោយសហរដ្ឋអាមេរិក និងអ៊ីស្រាអែល តាំងពីថ្ងៃទី២៨ ខែកុម្ភៈ ឆ្នាំ២០២៦ ដែលរំខានដល់ពាណិជ្ជកម្មដ៏សំខាន់សម្រាប់កសិករជុំវិញពិភពលោក។
លោក Jorge Moreira da Silva នាយកប្រតិបត្តិនៃការិយាល័យសេវាកម្មគម្រោងរបស់អង្គការសហប្រជាជាតិ (UNOPS) និងជាមេដឹកនាំក្រុមការងារពិសេស បានប្រាប់ AFP ក្នុងបទសម្ភាសន៍មួយនៅទីក្រុងប៉ារីស ប្រទេសបារាំង ដូច្នេះថា «យើងមានពេល២ទៅ៣សប្តាហ៍ទៀត ដើម្បីទប់ស្កាត់អ្វីដែលទំនងជាវិបត្តិមនុស្សធម៌ដ៏ធំមួយ ដោយយើងអាចនឹងឃើញវិបត្តិដែលនឹងបង្ខំឱ្យមនុស្ស ៤៥ លាននាក់បន្ថែមទៀត ធ្លាក់ចូលទៅក្នុងភាពអត់ឃ្លាន»។
គួរបញ្ជាក់ថា អគ្គលេខាធិការអង្គការសហប្រជាជាតិបានបង្កើតក្រុមការងារពិសេសនេះឡើង កាលពីខែមីនាកន្លងទៅ ដើម្បីជួយសម្រួលអនុញ្ញាតឱ្យជីកសិកម្ម និងវត្ថុធាតុដើមពាក់ព័ន្ធដូចជា អាម៉ូញាក់ ស្ពាន់ធ័រ និងអ៊ុយរ៉េ ឆ្លងកាត់ច្រកសមុទ្រហ័រមូស។ អស់រយៈពេលជាច្រើនសប្តាហ៍មកហើយ លោក Moreira បានខិតខំបញ្ចុះបញ្ចូលភាគីជម្លោះឱ្យអនុញ្ញាតឱ្យកប៉ាល់មួយចំនួនឆ្លងកាត់ ហើយបានជួបជាមួយប្រទេសជាង ១០០ ដើម្បីប្រមូលការគាំទ្រពីរដ្ឋសមាជិក UN ជុំវិញដល់ការសម្រួលនេះ។
លោកបានអះអាងថា ប្រទេសកាន់តែច្រើន កំពុងតែបង្ហាញការគាំទ្រចំពោះផែនការនេះ ប៉ុន្តែសហរដ្ឋអាមេរិក និងអ៊ីរ៉ង់ ក៏ដូចជាបណ្តាប្រទេសឈូងសមុទ្រពែរ្ស ដែលជាប្រទេសផលិតជីសំខាន់ៗ មិនទាន់គាំទ្រពេញលេញនៅឡើយទេ។ លោកថា ខណៈពេលដែលក្តីសង្ឃឹមចុងក្រោយគឺ កិច្ចព្រមព្រៀងសន្តិភាពយូរអង្វែងនៅក្នុងតំបន់ និងសេរីភាពនៃការធ្វើនាវាចរណ៍សម្រាប់ទំនិញទាំងអស់ឆ្លងកាត់ច្រកសមុទ្រហ័រមូសនោះ ប៉ុន្តែបញ្ហាបន្ទាន់បំផុតគឺរដូវដាំដុះមិនអាចរង់ចាំបានទេ ដោយនៅបណ្តាប្រទេសមួយចំនួនក្នុងទ្វីបអាហ្វ្រិកនឹងត្រូវបញ្ចប់ក្នុងរយៈពេលត្រឹមតែប៉ុន្មានសប្តាហ៍ទៀតប៉ុណ្ណោះ។
ដ្បិតការផ្តោតអារម្មណ៍ជាសកលគឺទៅលើផលប៉ះពាល់សេដ្ឋកិច្ចនៃការជួញដូរប្រេង និងឧស្ម័នក៏ពិតមែន ប៉ុន្តែ UN បានបន្លឺកន្តឹងអាសន្នអំពីការគំរាមកំហែងដែលការបិទផ្លូវច្រកសមុទ្រហ័រមូសបង្កឡើង ចំពោះសន្តិសុខស្បៀងអាហាររបស់ពិភពលោក ដោយបណ្តាប្រទេសនៅអាហ្វ្រិក និងអាស៊ី ទំនងជារងផលប៉ះពាល់យ៉ាងខ្លាំង៕ ប្រភព ៖ AFP និង France24
ចែករំលែកព័តមាននេះ