សហរដ្ឋអាមេរិក ៖ កំពូល​មហាសេដ្ឋី លោក Elon Musk និង​លោក Tim Cook នាយក​ប្រតិបត្តិ​ក្រម​ហ៊ុន Apple ត្រូវ​បាន​រាយការណ៍​ថា ស្ថិត​ក្នុង​ចំណោម​នាយក​ប្រតិបត្តិ (CEO) ក្រុមហ៊ុន​អា​មេ​រិ​ក​ប្រមាណ ១៧​នាក់ ដែល​នឹង​រួម​ដំណើរ​ជាមួយ​លោក​ប្រធានាធិបតី ដូ​ណា​ល់ ត្រាំ (Donald Trump) ក្នុង​ដំណើរ​បំពេញ​ទស្សនកិច្ច​ផ្លូវ​រដ្ឋ​ទៅ​កាន់​ប្រទេស​ចិន ចាប់ពី​ថ្ងៃ​ទី ១៣​ដល់​១៥ ខែឧសភា ឆ្នាំ​២០២៦ ខាង​មុខ​នេះ​។ នេះ​បើ​តាម​ប្រភព​ពី BBC និង Reuters បាន​ចេញផ្សាយ​។

ប្រធានាធិបតី​អា​មេ​រិ​ក លោក ដូ​ណា​ល់ ត្រាំ ត្រូវ​បាន​គេ​រំពឹង​ថា​នឹង​ដឹកនាំ CEO ឧស្សាហកម្ម​ពាណិជ្ជកម្ម និង​បច្ចេកវិទ្យា​កំពូល​ៗ​ជា​ច្រើន​រូប​ក្នុង​ដំណើរ​ទស្សនកិច្ច​របស់​លោក​ទៅ​កាន់​ប្រទេស​ចិន នៅ​ស​ប្តា​ហ៍​នេះ ហើយ​បើ​តាម​មន្ត្រី​សេត​វិមាន​ម្នាក់​បាន​ប្រាប់ BBC ថា CEO អា​មេ​រិ​ក ១៧​រូប នឹង​ចូលរួម​ជាមួយ​លោក ត្រាំ ក្នុង​ដំណើរ​ទស្សនកិច្ច​នេះ​។

ដំណើរ​ទស្សនកិច្ច​នេះ ត្រូវ​បាន​អ្នកជំនាញ​មើលឃើញ​ថា​មាន​សារៈសំខាន់​ខ្លាំង​ណាស់ សម្រាប់​សហរដ្ឋអាមេរិក ដោយសារ​លោក ត្រាំ នឹង​ជួប​ជាមួយ​ប្រធានាធិបតី​ចិន លោក ស៊ី ជី​ន​ពីង (Xi Jinping) ចំ​ពេល​ភាព​តានតឹង​ផ្នែក​សេដ្ឋកិច្ច និង​បច្ចេកវិទ្យា​រវាង​ប្រទេស​ទាំង​ពីរ​បាន​និង​កំពុង​កើនឡើង​។

ក្រៅពី​លោក Elon Musk មក​ពី​ក្រុមហ៊ុន Tesla និង SpaceX និង​លោក Tim Cook មក​ពី​ក្រុមហ៊ុន Apple និង​លោក Larry Fink មក​ពី​ក្រុមហ៊ុន BlackRock ក៏​រួម​មាន​ទាំង CEO មក​ពី​ក្រុមហ៊ុន​ជា​ច្រើន​ទៀត​ផង​ដែរ​ដូច​ជា ៖

លោកស្រី Dina Powell McCormick ប្រធាន និង​ជា​អនុប្រធាន​ក្រុមហ៊ុន Meta
លោក Kelly Ortberg ប្រធាន និង​ជានា​យក​ប្រតិបត្តិ​ក្រុមហ៊ុន Boeing
លោក Ryan McInerney នាយក​ប្រតិបត្តិ​ក្រុមហ៊ុន Visa
លោក Stephen Schwarzman នាយក​ប្រតិបត្តិ​ក្រុមហ៊ុន Blackstone
លោក Brian Sikes នាយក​ប្រតិបត្តិ និង​ជា​ប្រធាន​ក្រុមហ៊ុន Cargill

លោកស្រី Jane Fraser នាយក​ប្រតិបត្តិ​ក្រុមហ៊ុន Citi
លោក Jim Anderson នាយក​ប្រតិបត្តិ​ក្រុមហ៊ុន Coherent
លោក Henry Lawrence Culp នាយក​ប្រតិបត្តិ​ក្រុមហ៊ុន GE Aerospace
លោក David Solomon នាយក​ប្រតិបត្តិ​ក្រុមហ៊ុន Goldman Sachs

លោក Jacob Thaysen នាយក​ប្រតិបត្តិ​ក្រុមហ៊ុន Illumina
លោក Michael Miebach ប្រធាន​ក្រុមហ៊ុន Mastercard
លោក Sanjay Mehrotra នាយក​ប្រតិបត្តិ​ក្រុមហ៊ុន Micron
លោក Cristiano Amon ប្រធាន និង​ជានា​យក​ប្រតិបត្តិ​ក្រុមហ៊ុន Qualcomm

ដោយឡែក លោក Chuck Robbins ប្រធាន និង​នាយក​ប្រតិបត្តិ​ក្រុមហ៊ុន Cisco ត្រូវ​បាន​អញ្ជើញ​ឱ្យ​ចូលរួម​ក្នុង​ដំណើរ​ទស្សនកិច្ច​នេះ ប៉ុន្តែ​លោក​មិន​អាច​ទៅ​ចូលរួម​បាន ដោយសារ​ជាប់រវល់​រៀបចំ និង​ការ​ប្រកាស​របាយការណ៍​ចំណូល​របស់​ក្រុមហ៊ុន​។ នេះ​បើ​តាម​ការ​បញ្ជាក់​ពី​អ្នកនាំពាក្យ​ក្រុមហ៊ុន​ផ្ទាល់​។

ទោះ​យ៉ាងណា​ក៏​ដោយ អ្វី​ដែល​គួរ​ឱ្យ​កត់សម្គាល់​នោះ គឺ​អវត្តមាន​របស់​លោក Jensen Huang ប្រធាន​ក្រុមហ៊ុន Nvidia ដែល​ក្រុមហ៊ុន​របស់​លោក​ជា​ចំណុចក្តៅ​នៃ​ការ​ប្រកួតប្រជែង​គ្នា​រវាង​អា​មេ​រិ​ក និង​ចិន​លើ​បន្ទះ​ឈី​ប​កុំព្យូទ័រ និង​បញ្ញា​សិប្បនិម្មិត (AI)​។ ស្រប​ពេល BBC បាន​ព្យាយាម​ទាក់ទង​ទៅ​ខាង Nvidia ដើម្បី​សុំ​ការ​អត្ថាធិប្បាយ​បន្ថែម​ជុំវិញ​រឿង​នេះ​៕