សង្គ្រាមអ៉ីរ៉ង់ ៖ តម្លៃប្រេងបានឡើងខ្ពស់វិញ កាលពីថ្ងៃទី១១ ឧសភា ខណៈប្រធានាធិបតីអាមេរិក លោកដូណាល់ត្រាំ បដិសេធចម្លើយអ៉ីរ៉ង់ចំពោះសំណើអាមេរិកដើម្បីបញ្ចប់សង្គ្រាម ។ ម្យ៉ាងទៀតអ៉ីរ៉ង់បានព្រមានបារាំង…
សង្គ្រាមអ៉ីរ៉ង់ ៖ តម្លៃប្រេងបានឡើងខ្ពស់វិញ កាលពីថ្ងៃទី១១ ឧសភា ខណៈប្រធានាធិបតីអាមេរិក លោកដូណាល់ត្រាំ បដិសេធចម្លើយអ៉ីរ៉ង់ចំពោះសំណើអាមេរិកដើម្បីបញ្ចប់សង្គ្រាម ។ ម្យ៉ាងទៀតអ៉ីរ៉ង់បានព្រមានបារាំង និងអង់គ្លេសចំពោះរាល់អន្តរាគមន៍នៅច្រកសមុទ្រហ័រមូស ។
តាមបណ្ដាញសង្គម TRUTH SOCIAL របស់លោក ប្រធានាធិបតីអាមេរិកសរសេរថា ខ្ញុំទើបអានចម្លើយរបស់បណ្ដាតំណាងអ៉ីរ៉ង់។ ខ្ញុំមិនចូលចិត្តចម្លើយតបនោះសោះ ដោយវាពិតជាមិនអាចទទួលយកបានទាំងស្រុង ។ ការបដិសេធចម្លើយតបរបស់អ៉ីរ៉ង់នោះ នាំឲ្យតម្លៃប្រេងកាតចាប់ហក់ខ្ពស់ឡើងវិញភ្លាមៗ ដោយប្រេងឆៅ BRENTក្នុង១ធុងឡើងថ្លៃដល់២,៦៩%វិញ គឺ១០៤,០១ដុល្លារ ព្រោះតែទស្សនវិស័យនៃការបើកច្រកសមុទ្រហ័រមូសមើលទៅកាន់តែឃ្លាតឆ្ងាយថែមទៀត។
ជាង១ខែក្រោយចាប់ផ្ដើមបទឈប់បាញ់គ្នារវាងអ៉ីរ៉ង់ និងអាមេរិករួមជាមួយអ៉ីស្រាអែល ការចរចាពេលនេះ ហាក់ដូចជាកំពុងស្ថិតក្នុងការជាប់គាំងជាថ្មី ហើយបណ្ដាភាគីសុទ្ធតែមិនលាតត្រដាងជាសាធារណៈបណ្ដាសំណើពួកគេ ។ ក្រោយការរង់ចាំជាច្រើនថ្ងៃអ៉ីរ៉ង់ទើបប្រកាស នាថ្ងៃទី១០ឧសភាថា បានឆ្លើយតបចំពោះសំណើអាមេរិក តែមិនបង្ហាញចម្លើយនោះដោយលម្អិតឡើយ។ ទូរទស្សន៍រដ្ឋអ៉ីរ៉ង់រាយការណ៍ថា ចម្លើយអ៉ីរ៉ង់ ដែលបញ្ជូនតាមរយៈអាជ្ញាកណ្ដាលប៉ាគីស្ថាន ផ្ដោតលើការបញ្ចប់សង្គ្រាម លើគ្រប់រណសិរ្សទាំងអស់ ពិសេសនៅលីបង់និងលើការធានាសន្តិសុខការធ្វើនាវាចរណ៍តាមសមុទ្រ ។
សំណើរបស់អ៉ីរ៉ង់គ្រោងបើកឡើងវិញបន្តិចម្ដងៗ ច្រកសមុទ្រហ័រមូស និងការលុបចោលដំណាលគ្នា ការហ៊ុមព័ទ្ធបណ្ដាកំពង់ផែអ៉ីរ៉ង់ដោយកងម៉ារីនអាមេរិក។ ក្រុងតេហេរ៉ង់ក៏ត្រៀមផងដែររក្សាទុកតែមួយផ្នែកនៃអ៊ុយរ៉ានីញ៉ូមចម្រាញ់របស់ខ្លួន ហើយផ្នែកនៅសល់នឹងបញ្ជូនទៅប្រទេសទី៣។
ក្រុងវ៉ាស៊ីនតោន និងប្រទេសជាច្រើនសង្ស័យក្រុងតេហេរ៉ង់ថា ចង់ផលិតអាវុធនុយក្លេអ៊ែរ តាមរយៈការចម្រាញ់អ៊ុយរ៉ានីញ៉ូម តែក្រុងតេហេរ៉ង់បានបដិសេធដោយលើកឡើងថា ខ្លួនគ្រាន់តែការពារសិទ្ធិនុយក្លេអ៊ែរស៊ីវិលប៉ុណ្ណោះ ។
អ៉ីរ៉ង់កាលពីយប់ថ្ងៃទី៩ ឧសភា បានគំរាមវាយប្រហារបណ្ដាផលប្រយោជន៍អាមេរិក ក្នុងតំបន់ ក្នុងករណីមានការវាយប្រហារកងនាវាដឹកទំនិញរបស់ខ្លួន បន្ទាប់ពីការវាយប្រហារប្រឆាំងនាវាដឹកប្រេង២គ្រឿងរបស់ខ្លួនមក។ កងឆ្មាំបដិវត្តន៍អ៉ីរ៉ង់បានព្រមានថា រាល់ការវាយប្រហារ បណ្ដានាវាដឹកប្រេងនិងនាវាពាណិជ្ជកម្មអ៉ីរ៉ង់ នឹងនាំឲ្យមានការតបតវិញធ្ងន់ធ្ងរមួយ ប្រឆាំងមជ្ឈមណ្ឌលមួយ ក្នុងចំណោមមជ្ឈមណ្ឌលអាមេរិកក្នុងតំបន់ ព្រមទាំងប្រឆាំងបណ្ដានាវាសត្រូវ ។
ក្នុងតំបន់ឈូងសមុទ្រពែរ្ស៍កាលពីថ្ងៃទី១០ ឧសភា មានការវាយប្រហារថ្មីៗ។ នៅកាតានាវា១គ្រឿងមកពីក្រុងអាប៊ូដាប៊ី រងការវាយប្រហារដោយដ្រូន១គ្រឿងមុនពេលបន្តដំណើរ។ ទីភ្នាក់ងារព័ត៌មានអ៉ីរ៉ងFARS អះអាងថា នាវានោះដោតទង់ជាតិអាមេរិក និងជារបស់អាមេរិក។ ប្រទេសដទៃៗទៀតក៏រងការវាយប្រហារដោយដ្រូនដែរ ។ ប្រទេសគុយវ៉ែតមិនបាននិយាយចំថាដ្រូនដែលវាយប្រហារប្រទេសខ្លួនមកពីអ៉ីរ៉ង់ឡើយ តែក្រុងអាប៊ូដាប៊ីបាននិយាយត្រង់ៗថាចំឈ្មោះអ៉ីរ៉ង់តែម្ដង។ ការវាយប្រហារទាំងនោះកើតមាន២ថ្ងៃ បន្ទាប់ពីកងទ័ពអាមេរិក វាយប្រហារនាវាដឹកប្រេង
អ៉ីរ៉ង់២គ្រឿងនៅឈូងសមុទ្រអូម៉ង់។ អ៉ីរ៉ង់បានគំរាមសងសឹកវិញប្រឆាំងបណ្ដានាវានិងមូលដ្ឋានយោធាអាមេរិក ។
ប្រធានាធិបតីអ៉ីរ៉ង់លោកម៉ាស៊ូដប៉េហ្សេសគីយ៉ាន់ បានសរសេរតាមបណ្ដាញសង្គមX ថា យើងមិនឱនក្បាលដាច់ខាតនៅមុខសត្រូវ ហើយការចរចាមិនមែនជាការចុះចាញ់ឬរាថយឡើយ ។
ចំណែកបារាំង និងអង់គ្លេសវិញបានខិតខំធ្វើសកម្មភាពដើម្បីបង្កើតក្រុមចម្រុះអន្តរជាតិ សំដៅការពារសន្តិសុខនៅច្រកសមុទ្រហ័រមូសបន្ទាប់ពីការដោះស្រាយជម្លោះ។ រដ្ឋមន្ត្រីការពារប្រទេសនៃប្រទេសទាំង២នឹងដឹកនាំរួមគ្នា ធ្វើកិច្ចប្រជុំតាមតេឡេខេនហ្វេរេនមួយ ជាមួយសមភាគីនៃប្រទេស៤០ទៀត ដែលត្រៀមចូលរួមក្នុងបេសកកម្មបែបនេះ ។
អ៉ីរ៉ង់បានព្រមានថា រាល់ការដាក់ពង្រាយកងទ័ពនឹងនាំឲ្យមានការឆ្លើយតបវិញខ្លាំងក្លាភ្លាមៗពីសំណាក់កងទ័ពខ្លួន ក្រោយការប្រកាសរបស់បារាំងនិងអង់គ្លេស ដាក់ពង្រាយនាវាចម្បាំងសម្រាប់ធ្វើអន្តរាគមន៍ក្នុងតំបន់ ៕
ចែករំលែកព័តមាននេះ