អាមេរិក-ចិន ៖ ប្រធានាធិបតីអាមេរិក លោកដូណាល់ត្រាំ នឹងស្វែងរកដាក់សម្ពាធលើសមភាគីចិនលោកស៊ីជីនពីងពីរឿងអ៉ីរ៉ង់ ក្នុងឱកាសនៃទស្សនកិច្ចរបស់លោកនៅក្រុងប៉េកាំងនាសប្ដាហ៍នេះ ប៉ុន្តែការជួបគ្នាកំពូលនោះ ដែលមានលក្ខណៈនិម្មិត្តរូបខ្ពស់សំដៅជាពិសេសសម្រាលភាពតានតឹងខាងពាណិជ្ជកម្ម រវាងមហាអំណាចពិភពលោកទាំង២។ នេះជាការអះអាងរបស់បណ្ដាអ្នកទទួលខុសត្រូវកាលពីថ្ងៃទី១០ឧសភា។
សេតវិមានរៀបរាប់ថា ទស្សនកិច្ចលើកដំបូងរបស់លោកត្រាំនៅចិន ចាប់តាំងពីលោកឡើងកាន់តំណែងអាណត្តិទី២មក នឹងកំណត់តាមរយៈពិធីទទួលដ៏មហោឡារិក ជាមួយពិសេសការទៅទស្សនាវិមានមេឃ ហើយនឹងមានពិធីជប់លៀងដ៏មហោឡារិកមួយ។ នាឱកាសនៃទស្សនកិច្ចនោះមេដឹកនាំរបស់មហាអំណាចពិភពលោកទាំង២ នឹងពិភាក្សាគ្នាលើបញ្ហាជាច្រើនក្នុងនោះមានពន្ធគយ បញ្ហាកោះតៃវ៉ាន់និងបញ្ហាប្រាជ្ញាសិប្បនិម្មិត្តព្រមទាំងរ៉ែកម្រ។
អ្នកនាំពាក្យរងសេតវិមានលោកស្រីអានណាកែលលីអះអាងនាថ្ងៃទី១០ឧសភាថា ពិតណាស់ទស្សនកិច្ចនោះរបស់ប្រធានាធិបតីអាមេរិកមិនមែនគ្រាន់តែជាទស្សនកិច្ចនិម្មិត្តរូបប៉ុណ្ណោះទេ។ ពលរដ្ឋអាមេរិករង់ចាំប្រធានាធិបតី ចុះហត្ថលេខាលើកិច្ចព្រមព្រៀងល្អៗច្រើនថែមទៀត។ ទិសដៅសម្រាប់លោកត្រាំនឹងជាការធ្វើឲ្យមានតុល្យភាពឡើងវិញនៃទំនាក់ទំនងជាមួយចិនសំដៅស្ដារឡើងវិញឯករាជ្យភាពសេដ្ឋកិច្ចរបស់អាមេរិក។
ប្រធានាធិបតីអាមេរិកនឹងទៅដល់ក្រុងប៉េកាំង នាយប់ថ្ងៃទី១៣ ឧសភា ដោយទស្សនកិច្ចនោះរបស់លោកបន្តរហូតដល់ថ្ងៃទី១៥ឧសភា។ ដំបូងលោកត្រាំគ្រោងមកកាន់ចិននាខែមីនាតែត្រូវបានពន្យារពេល មកពីការផ្ទុះសង្គ្រាមនៅអ៉ីរ៉ង់៕
ចែករំលែកព័តមាននេះ