រាជធានីភ្នំពេញ ៖ ក្នុងថ្ងៃបុណ្យពិសាខបូជា ដែលគ្រប់គ្នាមានសទ្ធាជ្រះថ្លា ក្នុងការធ្វើបុណ្យទាននោះ ស្រាប់តែមានប្តីប្រពន្ធចិត្តបុណ្យមួយគូ បានធ្វើរឿងមួយនាំឱ្យផ្អើលពេញសាកលវិទ្យាល័យភូមិន្ទភ្នំពេញ ដោយពួកគាត់បាននាំយកកូនក្រពើCute ដ៏គួរឱ្យស្រលាញ់មួយក្បាល ក្នុងគោលបំណងមកព្រលែងនៅក្នុងស្រះទឹករបស់សាកលវិទ្យាល័យ តែចៃដន្យអីត្រូវបានសន្តិសុខសង្ស័យ និងទប់ស្កាត់បានទាន់ពេលវេលាកុំអីពីរបីឆ្នាំទៀតក្រពើមួយក្បាលនេះនឹងប្រែពីក្រពើរCute ក្លាយទៅជាសត្វប្រមាញ់ ឬក្លាយជាតួឯក ក្នុងរឿងក្រពើស៊ីនិសិត្សក្នុងសកលវិទ្យាល័យជាក់ជាពុំខានឡើយ ។
រឿងរ៉ាវដ៏គួរឱ្យហួសចិត្តឈានចូលប៉ែត ដែលមហាជនលើបណ្តាញសង្គមចែករំលែកយ៉ាងផុសផុលនេះ ត្រូវបានបង្ហោះដោយ លោក ជេត ជាលី សាកលវិទ្យាធិការសកលវិទ្យាល័យភូមិន្ទភ្នំពេញ នៅលើគណនីហ្វេសប៊ុករបស់លោក កាលពីព្រឹកថ្ងៃទី២២ ខែឧសភា ឆ្នាំ២០២៤ ដោយបានអំពាវនាវទៅដល់សារធារណៈជន កុំដោយសាតែជំនឿយកសត្វគ្រោះថ្នាក់មកប្រលែងបែបនេះ ។
សាកលវិទ្យាធិការសកលវិទ្យាល័យភូមិន្ទភ្នំពេញ បានរៀបរាប់យ៉ាងដូច្នេះថា ៖ «ជារឿងគ្រោះថ្នាក់ និងអាក្រក់បំផុត ដែលមានមនុស្សយកកូនក្រពើមកព្រលែងក្នុងទឹកស្រះសាកលវិទ្យាល័យយើង ។ ថ្ងៃនេះជាថ្ងៃសីលធំ សម្រាប់ពុទ្ធសានិកជន ។ មានមនុស្សមួយចំនួនមានជំនឿថា ការដោះលែងសត្វឲ្យមានជីវិត និងសេរីភាពក្នុងថ្ងៃនេះជាទង្វើប្រកបដោយកុសលល្អខ្ពង់ខ្ពស់ ។ ប៉ុន្តែការដោះលែងសត្វមួយចំនួនឲ្យមានជីវិតបែរជាអាចបង្កគ្រោះថ្នាក់ដល់ជីវិតមនុស្សទៅវិញ ។
សូមបងប្អូនបញ្ឈប់នូវទង្វើដ៏គ្រោះថ្នាក់នេះជាដាច់ខាត ។ ខ្ញុំសូមអរគុណ និងកោតសរសើរដល់បងប្អូនសន្តិសុខយើង ដែលបានទប់ស្កាត់ទាន់ពេលនូវទង្វើដ៏គ្រោះថ្នាក់នេះ ។ សូមយើងទាំងអស់គ្នាមានជំនឿប្រកបដោយវិចារណញ្ញាណត្រឹមត្រូវ ។»
សូមបញ្ជាក់ផងដែរថា បើតាមការអះអាងរបស់ក្រុមសន្តិសុខប្រចាំនៅសកលវិទ្យាល័យភូមិន្ទភ្នំពេញ និងយោងតាមប្រភពីកាមេរ៉ាសុវត្ថិភាព បង្ហាញឱ្យឃើញថា កូនក្រពើមួយក្បាលនេះត្រូវបានប្តីប្រពន្ធវ័យកណ្តាលមួយគូលាក់នៅក្នុងប្រអប់ពណ៌ផ្កាឈូក រាង៤ជ្រុង ដឹកនាំម៉ូតូជិះ ចូលមកបរិវេណសកលវិទ្យាល័យ ហើយដោយមានការសង្ស័យសន្តិសុខក៏សួរនាំតែត្រូវបានអ្នកទាំងពីរតបដោយកុហកវិញថា គ្រាន់តែសត្វត្រកួត ប៉ុន្តែដោយសារក្រុមសន្តិសុខមិនជឿសម្តីរបស់ពួកគាត់ឡើយ ហើយបានចាប់ឃាត់ទុក ហើយក្រោយពិនិត្យឱ្យជាក់ទៅទើបដឹងថា ជាសត្វក្រពើ ។
យ៉ាងណាក៏ដោយ កូនក្រពើមួយក្បាលនេះកំពុងត្រូវបានចាប់យកទៅរក្សាទុកដោយសុវត្ថិភាពហើយ ខណៈដែលថ្នាក់ដឹកនាំសកលវិទ្យាល័យភូមិន្ទភ្នំពេញ បានអំពាវនាវឱ្យបុរសស្ត្រីជាប្តីប្រពន្ធទាំងពីរនាក់ខាងលើអញ្ជើញមកយកក្រពើនេះត្រឡប់ទៅវិញផង ។ ហើយប្រសិនប្រើពួកគាត់មិនហ៊ានមកយកទៅវិញទេនោះ សកលវិទ្យាការនឹងស្នើទៅអង្គការអភិរក្សសត្វ ឬអ្នកដែលមានជំនាញខាងចិញ្ចឹមសត្វក្រពើមកទទួលក្រពើនេះទៅចិញ្ចឹម ៕ អត្ថបទ៖អោម ចែតច័ន្ទណារ៉ា
ចែករំលែកព័តមាននេះ