ខេត្តស្ទឹងត្រែង ៖ បន្ទាប់ពីមានដំណឹងលេចឮថា នឹងមានការធ្វើផ្លូវនិងស្ពាន១ទៀត ឆ្លងកាត់ទន្លេសេកុង ស្រាប់តែមានជនមួយចំនួន និងមន្ត្រីរាជការមួយចំនួនតូច បានធ្វើការរុករានទន្ទ្រានយកដីព្រៃធ្វើជាកម្ម
សិទិ្ធ ដោយមានដាំបង្គោលរបងឈើនិងថ្ម ព្រមទាំងដំណាំខ្លះៗ តែត្រូវបានកម្លាំងនៃគណៈកម្មការចម្រុះរបស់រដ្ឋបាលខេត្តធ្វើការរុះរើ ។
ការចុះទៅដកបង្គោលដែលដាំលើដីព្រៃយ៉ាងអនាធិបតេយ្យនេះ បានធ្វើឡើងកាលពីព្រឹកថ្ងៃទី២០ ខែ
កញ្ញា នៅចំណុចអីប៊ូក ក្នុងឃុំស្តៅ ស្រុកសេសាន ដឹកនាំដោយលោក ជា ថាវរិទ្ធ អភិបាលរងខេត្ត ដែលមានកម្លាំងរបស់មន្ទីរបរិស្ថាន រដ្ឋបាលព្រៃឈើ មន្ត្រីអធិការកិច្ច មន្ត្រីនៃមន្ទីររៀបចំដែនដីនគរូបនីយ
កម្ម សំណង់ និងសុរិយោដីខេត្ត និងកងកម្លាំងប្រដាប់អាវុធគ្រប់ប្រភេទ ។
លោក អន ចាន់សុជាតិ នាយរងខណ្ឌរដ្ឋបាលព្រៃឈើនៃមន្ទីរកសិកម្ម រុក្ខាប្រមាញ់និងនេសាទខេត្ត បានឱ្យដឹងថា ការទន្ទ្រានកាន់កាប់ដីព្រៃដោយខុសច្បាប់នៅចំណុចខាងលើគឺមានទំហំក្បាលដី១.៥០០ម៉ែត្រ ដែលពីមុនជាដីសម្បទានសេដ្ឋកិច្ចរបស់អតីតក្រុមហ៊ុន សុខ ហេង ដែលរាជរដ្ឋាភិបាលដកហូតទុកជាសម្បត្តិរដ្ឋជាច្រើនឆ្នាំមកហើយ ស្រាប់តែថ្មីៗនេះមានប្រជាពលរដ្ឋមួយចំនួនតូចបានរុករានចាប់ជាកម្មសិទ្ធិ ហើយត្រូវអាជ្ញាធរខេត្តធ្វើការរុះរើ ។
លោកនាយរងខណ្ឌបន្តថា ចាប់ពីចំណុចអីប៊ូក ក្នុងឃុំស្តៅ ស្រុកសេសាន ការទន្ទ្រានដីមានចំនួន៩ចំណុច ក្នុងនោះមាន៣ចំណុចសង់កូនខ្ទម និងមានដាំដំណាំផ្សេងៗ ដែលកូនខ្ទមទាំង៣នេះ មន្ត្រីជំនាញបង្កសំណុំ រឿងទៅតុលាការរកមុខម្ចាស់មកទទួលខុសត្រូវតាមផ្លូវច្បាប់ ហើយរុះរើចេញ ។ មន្ត្រីមន្ទីរកសិកម្ម រុក្ខាប្រមាញ់ និងនេសាទខេត្ត ឱ្យដឹងថា ពីមុនទីនោះគឺជាដីសម្បទានសេដ្ឋកិច្ចរបស់ក្រុមហ៊ុន សុខ ហេង ដើម្បី
ដាំដំណាំកសិ-ឧស្សាហកម្ម ដែលរដ្ឋបានសម្បទានចំនួន៧.៤០០ហិកតា ហើយមិនធ្វើការអភិវឌ្ឍក៏ត្រូវបានដកហូតកាត់មកនៅសល់៦២០ហិកតា ។
ក្រោយមកទៀត ទោះក្រុមហ៊ុន សុខ ហេង សល់ដី៦២០ហិកតា ក៏គ្មានការអភិវឌ្ឍអ្វីសោះ ទើប រាជរដ្ឋាភិ បាលបានដកដីទាំងនោះមកវិញជាសម្បត្តិរដ្ឋទាំងស្រុង ។លោក មិញ ស៊ីចាយ ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត បានឱ្យដឹងថា មន្ត្រីនៃមន្ទីរសាមីនិងរៀបចំចុះបញ្ជីនៅពេលខាងមុខឆាប់ៗនេះ ហ៊ុមព័ទ្ធរួចប្រគល់ជូនមន្ទីរកសិកម្ម រុក្ខាប្រមាញ់ និងនេសាទជាអ្នកគ្រប់គ្រង ។
លោក ជា ថាវរិទ្ធ អភិបាលរងខេត្ត មានប្រសាសន៍ថា ក្រោយពីចុះដកហូតបង្គោលរបង និងលើកស្លាកដើម្បីចៀសវាងការទន្ទ្រានដីជាបន្តទៀត លោកនឹងប្រើប្រាស់កម្លាំងប្រដាប់អាវុធចុះល្បាតរៀងរាល់១សប្តាហ៍ម្តង បើឃើញមានករណីរុះរានដីព្រៃដោយខុសច្បាប់ទៀត នោះនឹងអនុវត្តទៅតាមច្បាប់ ៕
ចែករំលែកព័តមាននេះ