សំណង់ពហុកីឡដ្ឋានមរតកតេជោ សម្រេចជាង20%ហើយ
- ភ្នំពេញ
រាជធានីភ្នំពេញ ៖ កាលពីព្រឹកថ្ងៃទី១៥ កញ្ញា លោក ថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការជាតិអូឡាំពិកកម្ពុជា អមដំណើរដោយលោក…
រាជធានីភ្នំពេញ ៖ កាលពីព្រឹកថ្ងៃទី១៥ កញ្ញា លោក ថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការជាតិអូឡាំពិកកម្ពុជា អមដំណើរដោយលោក វ៉ាត់ ចំរើន រដ្ឋលេខាធិការក្រសួងទេសចរណ៍ និងជាអគ្គលេខាធិការគណៈកម្មាធិការជាតិអូឡាំពិកកម្ពុជា លោក អ៊ុក សិទ្ធិជាតិ អគ្គនាយកនៃអគ្គនាយកដ្ឋានកីឡា លោកឧត្តមសេនីយ៍ឯក តែម ម៉ឺន អគ្គលេខាធិការរងគណៈកម្មាធិការជាតិអូឡាំពិកកម្ពុជា បានធ្វើដំណើរចុះទៅពិនិត្យមើលការដ្ឋានសំណង់ពហុកីឡដ្ឋានមរតកតេជោដំណាក់កាលទី២ ពោលគឺទីលានបាល់ទាត់ធំឬMain Stadiumសម្រាប់ត្រៀមប្រកួតកីឡាស៊ីហ្គេមលើកទី៣២ឆ្នាំ២០២៣ ស្ថិតនៅក្នុងខណ្ឌជ្រោយចង្វា។
ថ្លែងទៅកាន់អ្នកសារព័ត៌មាននាឱកាសនោះ លោករដ្ឋមន្ត្រីថោង ខុន បានវាយតម្លៃខ្ពស់ចំពោះដំណើរការសាងសង់ពហុកីឡដ្ឋានដ៏ទំនើបមួយនេះដែលមកដល់ពេលនេះសម្រេចបានជាង២០%ហើយ ។ លោកថា ពហុកីឡដ្ឋានមរតកតេជោដំណាក់កាលទី១បានសាងសង់រួចរាល់ជាស្ថាពរកាលពីឆ្នាំ២០១៧កន្លងមកនេះ ដែលមាន អាងហែលទឹក ទីលានបាល់ទះ បាល់បោះ និងប្រដាល់ជាដើម ។
ដោយឡែកចំពោះគម្រោងនៃដំណាក់កាលទី២នេះទើបតែដំណើរការសាងសង់នៅដើមឆ្នាំ២០១៨នេះប៉ុណ្ណោះ ប៉ុន្តែសម្រេចផែនការបានជាង២០%ហើយ និងគ្រោងបញ្ចប់នៅឆ្នាំ២០២០ ។ ចំណែកគម្រោងទី៣គឺហេដ្ឋារចនាសម្ព័ន្ធនានាមួយចំនួនទៀតអាចនឹងត្រូវបញ្ចប់ជាស្ថាពរនៅឆ្នាំ២០២១ ដើម្បីត្រៀមទទួលរៀបចំការប្រកួតកីឡាស៊ីហ្គេមនៅឆ្នាំ២០២៣។
លោករដ្ឋមន្ត្រីបញ្ជាក់ថា សំណង់ពហុកីឡដ្ឋានដ៏ទំនើបមួយនេះជាជំនួយឥតសំណងរបស់សាធារណរដ្ឋប្រជាមានិតចិន ដែលមានទំហំទឹកប្រាក់១៥៧លានដុល្លារអាមេរិក សាងសង់លើផ្ទៃដីទំហំប្រមាណ១៦,២២ហិកតា ខណៈសំណង់ពហុកីឡដ្ឋានធំមានទំហំ៨,២៤ម៉ឺនម៉ែត្រការ៉េ អាចផ្ទុកមនុស្សបានជាង៥០០០០នាក់ មានច្រកទ្វារជាច្រើនកន្លែងសម្រាប់ជម្លៀសមនុស្សចេញនៅពេលមានអាសន្នដោយចំណាយពេលត្រឹមតែ៦នាទីប៉ុណ្ណោះ ។
លោកថា សំណង់មួយនេះគឺវិស្វករចិនបានសាងសង់ឡើងយ៉ាងពិសេសតាមបច្ចេកវិទ្យាថ្មីចុងក្រោយបង្អស់ ហើយក៏ជាស្តាតថ្មីនិងទំនើបជាងគេនៅក្នុងតំបន់អាស៊ីផងដែរ។ តាមការឱ្យដឹងបន្ថែម សំណង់នេះបានប្រើប្រាស់កម្លាំងពលកម្មជាង៦០០នាក់ ដូច្នេះលោកពិតជាមានមោទនភាពខ្លាំងណាស់ ជាពិសេសសម្រាប់កូនខ្មែរទាំងមូលដែលយើងមានសំណង់ដ៏មហិមាមួយនេះ ។
បើប្រៀបធៀបជាមួយពហុកីឡដ្ឋានជាតិអូឡាំពិក គឺមានទំហំធំជាងឆ្ងាយណាស់ ទាំងមជ្ឈមណ្ឌលកីឡាហែលទឹក មជ្ឈមណ្ឌលកីឡាក្នុងសាលជាច្រើនទៀតសុទ្ធតែមានលក្ខណៈទំនើបទាំងអស់។
នៅក្នុងឱកាសនោះដែរក៏មានរៀបចំការប្រគល់ប្រាក់រង្វាន់លើកទឹកចិត្តរបស់លោក ថាង ហ្គោដាង អនុប្រធានគណៈកម្មាធិការជាតិអូឡាំពិកកម្ពុជា ដល់កីឡាករនិងកីឡាការិនីម្ចាស់មេដាយមាសកីឡាអាស៊ី គឺកីឡាករ សាលី អ៊ូមើត និងកីឡាការិនីខាន់ ចេសា ដែលលោកបានកំណត់ថា មេដាយមាសទទួលបាន៨០០០ដុល្លារ មេដាយប្រាក់ទទួលបាន៥០០០ដុល្លារ និងមេដាយសំរឹទ្ធទទួលបាន៣០០០ដុល្លារ ។
ដូច្នេះកីឡាករសាលី អ៊ូមើតដែលដណ្ដើមបានមេដាយមាស១និងសំរឹទ្ធ១ទទួលបានប្រាក់រង្វាន់សរុប១១.០០០ដុល្លារ ខណៈកីឡាការិនី ខាន់ ចេសា ទទួលបាន៨០០០ដុល្លារ៕
ចែករំលែកព័តមាននេះ