រាជធានីភ្នំពេញ ៖ ស្ត្រីម្នាក់អាយុជាង៣០ឆ្នាំ ត្រូវបានគេឃើញធ្លាក់ពីជាន់ទី១២នៃសណ្ឋាគារដឹលីតស៍ស្លាប់ក្នុងស្ថានភាពដេកផ្កាប់មុខ បែកក្បាលខ្ទេច និងបង្កឲ្យមានការភ្ញាក់ផ្អើល កាលពីវេលាម៉ោង១០និង១៥នាទីយប់ថ្ងៃទី១២ខែកញ្ញា នៅលើកំណាត់ផ្លូវលេខ១០៥ ស្ថិតក្នុងសង្កាត់បឹងព្រលឹត ខណ្ឌ៧មករា ។ តាមអ្នកឃើញហេតុការណ៍ឲ្យដឹងថា មុនពេលកើតហេតុ គេឃើញស្ត្រីរូបនេះ ដែលដំបូងសង្ស័យថា ជាជនជាតិចិន ដើរឡើងទៅជាន់ទី១២ ដែលជាជាន់លើគេបង្អស់ ហើយមិនដឹងថា មានវិបត្តិអ្វីទេ ស្រាប់តែលោតចុះមកក្រោមបែកក្បាលហូរឈាមស្លាប់ភ្លាមតែម្តង និងបង្កឱ្យមានការភ្ញាក់ផ្អើលដល់សមត្ថកិច្ចចុះមកពិនិត្យ ។
ទោះជាយ៉ាងណា មហាជនមានការសង្ស័យថា បើសិនជាជនរងគ្រោះលោតសម្លាប់ខ្លួនមែន មិនមានអំបែងកញ្ចក់ធ្លាក់មកជាមួយទេ សង្ស័យមានគេច្រានចុះមកក្រោមក៏មិនដឹង ។ បើតាមសមត្ថកិច្ចឱ្យដឹងថា ជនរងគ្រោះមិនមែនស្នាក់នៅក្នុងសណ្ឋាគារនេះទេ គឺដើរមកពីក្រៅរួចចូលទៅក្នុងសណ្ឋាគារ ហើយលោតសម្លាប់ខ្លួនឯងតែប៉ុណ្ណោះ មិនមានគេច្រានទម្លាក់នោះទេ ។ ក្រោយពេលកើតហេតុ សពជនរងគ្រោះត្រូវបានសមត្ថកិច្ចដឹកយកទៅតម្កល់នៅវត្តស្ទឹងមានជ័យ ។
នៅរសៀលថ្ងៃទី១៣ កញ្ញា ព័ត៌មានដែលមានការមន្ទិលសង្ស័យ ជុំវិញស្ត្រីម្នាក់ធ្លាក់ពីលើអគារសណ្ឋាគារកម្ពស់១២ជាន់នោះ ត្រូវបានបង្ហាញថា ស្ត្រីរងគ្រោះមិនបានលោតសម្លាប់ទេ និងជាស្ត្រីខ្មែរមិនមែនជាជនជាតិចិនទេ ។ អត្តសញ្ញាណស្ត្រីរងគ្រោះវ័យក្មេងដែលធ្លាក់ពីជាន់ទី១២នៃសណ្ឋាគារដឹលីត(THE LITZ) បណ្តាលឲ្យស្លាប់យ៉ាងអាណោចអាធ័មក្នុងថ្លុកឈាមនោះ គេនៅមិនទាន់ស្គាល់នៅឡើយទេ ។
របាយការណ៍របស់នគរបាលដែលយោងតាមការបំភ្លឺរបស់សាក្សីនៅកន្លែងកើតហេតុ បានឲ្យដឹងថា ពេលកំពុងធ្វើការងារស្រាប់តែឮសំឡេងធ្លាក់ពីលើអគារសណ្ឋាគារ THE LITZ ក៏នាំគ្នាចេញទៅមើល ស្រាប់តែឃើញជនរងគ្រោះម្នាក់ធ្លាក់ពីជានលើមកដីស្លាប់ ។ ស្ត្រីរងគ្រោះស្លៀកខោខូវប៊យជើងខ្លី ពាក់អាវដៃវែង ពណ៌ប្រផេះ ស្លាប់ក្នុងស្ថានភាពដេកផ្កាប់មុខឈាមហូរចេញពីក្បាល ។ មន្ត្រីនគរបាលខណ្ឌ៧មករាបានឲ្យដឹងថាក្រោយពីការធ្វើកោសល្យវិច័យរបស់ការិយាល័យនគរបាលបច្ចេកទេសនិងវិទ្យាសាស្ត្រ ព្រមទាំងក្រុមគ្រូពេទ្យអមសាលាដំបូងរាជធានីភ្នំពេញ បានអះអាងថា ជនរងគ្រោះបាក់កដៃស្តាំ បែកក្បាល និងចេញទឹកនោម ឯការធ្វើតេស្តពុំមានសារធាតុញៀនទេ ។
បើតាមការស្រាវជ្រាវ តាមរយៈកាមេរ៉ាសុវត្ថិភាព ជនរងគ្រោះដើរពីខាងក្រៅចូលទៅក្នុងសណ្ឋាគារឡើងតាមជណ្តើរយន្តទៅជាន់ទី១២ និងជាន់លើប្រអប់ភ្លើង ហើយលោតពីលើសណ្ឋាគារមកក្រោមតែម្តង ដោយបន្សល់ទុកស្បែកជើង១គូ នៅកន្លែងកើតហេតុ ។
តាមរយៈវីដេឃ្លីបដែលបានផ្សព្វផ្សាយ នាព្រឹកថ្ងៃទី១៣ ខែកញ្ញា បង្ហាញថា មុនពេលកើតហេតុ ស្ត្រីរងគ្រោះបានដើរឆ្លងផ្លូវចូលទៅក្នុងសណ្ឋាគារ ។ បន្ទាប់មកសន្តិសុខបើកទ្វារសណ្ឋាគារ ជនរងគ្រោះក៏ឡើងតាមជណ្តើរយន្តទៅជាន់ខាងលើជាមួយបុរសម្នាក់ ប៉ុន្តែបុរសនោះបានចុះនៅជាន់ផ្សេងគ្នា ។ ក្នុងឃ្លីបវីដេអូបានបង្ហាញទៀតថា តាមពិនិត្យសកម្មភាពរបស់នាងទំនងជាច្រឡំបន្ទប់ដែលត្រូវទៅរក ទើបបន្តឡើងដល់ជាន់ទី១២ ។ ពេលចេញពីទ្វារជណ្តើរយន្តដែលគ្មានរនាំង និងងងឹតផង ធ្វើឲ្យនាងផុតជើងរអិលធ្លាក់មកក្រោមតែម្តង ។
លោកឧត្តមសេនីយ៍ត្រី សុង លី ស្នងការរងនគរបាលរាជធានីភ្នំពេញ បានឲ្យដឹងថា ចំពោះមូលហេតុដែលស្ត្រីគ្រោះធ្លាក់ពីលើសណ្ឋាគារ THE LITZ នោះ យើងមិនទាន់ហា៊នសន្និដ្ឋានពីមូលហេតុអ្វីនៅឡើយទេ គ្រាន់តែដឹងថា នាងស្លាប់ដោយសារធ្លាក់ពីលើអគារមកដី ។ ចំពោះវីដេអូក្នុងកាមេរ៉ាសុវត្ថិភាពដែលឆែកឃើញនោះពិតជាបង្ហាញថា ស្ត្រីរងគ្រោះដើររអិលជើងធ្លាក់ដោយខ្លូនឯង ហើយហេតុអ្វីបានជាជណ្តើរយន្តគ្មានរនាំង ដើម្បីការពារសុវត្ថិភាពនោះ? លោកស្នងការរងប្រាប់ថា លោកក៏មិនដឹងដែរព្រោះមិនបានឡើងទៅដល់ទីនោះ ។
មានការនិយាយថា ករណីស្ត្រីរងគ្រោះដែលធ្លាក់ពីលើសណ្ឋាគារស្លាប់នេះ អាជ្ញាធរមានសមត្ថកិច្ចគួរតែស្រាវជ្រាវ និងស៊ើបអង្កេតឲ្យបានម៉ត់ចត់ ដើម្បីផ្តល់ភាពយុត្តិធម៌ដល់ស្ត្រីរងគ្រោះ ព្រោះតាមរូបភាពជាក់ស្តែងនាងគ្មានបំណងលោតសម្លាប់ខ្លួនទេ គឺគ្រាន់តែដើរចេញផុតពីទ្វារជណ្តើរយន្តក៏រអិលជើងធ្លាក់មកក្រោមតែម្តង ដោយសារស្ថានភាពងងឹតគ្មានអំពូលភ្លើងបំភ្លឺ និងគ្មានរនាំងការពារសុវត្ថិភាព ។
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ