រាជធានីភ្នំពេញ ៖ គណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប នៅថ្ងៃនេះ បានសម្រេចលុបឈ្មោះតំណាងរាស្ត្រ គណបក្សប្រជាជនកម្ពុជា ចំនួន៥០នាក់ ដែលចូលកាន់ តំណែងក្នុងរាជរដ្ឋាភិបាល ហើយធ្វើឡើងបន្ទាប់ពីពួកគាត់លាលែងពីសមាជិកសភា។ ទន្ទឹមនឹងនេះ គ.ជ.ប ក៏បានប្រកាសទទួលស្គាល់ តំណាងរាស្ត្រដែលស្ថិតក្នុងលេខរៀងបម្រុង ឲ្យក្លាយជាតំណាងរាស្ត្រ ពេញសិទ្ធិជំនួសតំណាងរាស្ត្រចាស់ របស់គណបក្សប្រជាជនកម្ពុជា ចំនួន៣៨នាក់ផងដែរ។
ទាក់ទិននឹងបេក្ខជនអ្នកតំណាងរាស្ត្រថ្មីដែលជ្រើសតាមលេខរៀងបន្ទាប់ក្នុងបញ្ជីឈ្មោះបេក្ខជនគណបក្សនយោបាយនោះអ្នកនាំពាក្យរដ្ឋសភាលោក ឡេង ប៉េងឡុង បានឲ្យដឹងថា គ.ជ.ប បានផ្ញើបញ្ជីឈ្មោះបេក្ខជនសមាជិកសភាដែលត្រូវជំនួសសមាជិកសភាដែលបានលាលែងពីសមាជិកសភាពរួចហើយ។ លោកថា គណៈកម្មាធិការអចិន្ត្រៃយ៍រដ្ឋសភានឹងបើកកិច្ចប្រជុំនៅសប្តាហ៍ក្រោយ ដើម្បីពិនិត្យលើបញ្ជីឈ្មោះបេក្ខជនដែល គ.ជ.ប បានបញ្ជូនមក មុនដាក់ក្នុងសម័យប្រជុំពេញអង្គ រដ្ឋសភា។
លោក ឡេង ប៉េងឡុង ក៏បានឲ្យដឹងថា រដ្ឋសភាក៏នឹងបើកសម័យប្រជុំពេញអង្គក្រោម អធិបតីភាពសម្តេច ហេង សំរិន ប្រធានរដ្ឋសភានៅសប្តាហ៍ក្រោយ ដើម្បីប្រកាសសុពលភាព អ្នកតំណាងរាស្ត្រថ្មី ដែល គ.ជ.ប បញ្ជូនមកផង។ សូមជម្រាបថា បេក្ខជដែល គ.ជ.ប បញ្ជូនទៅរដ្ឋសភានេះ ត្រូវបានសម្តេចតេជោ ហ៊ុន សែន នាយករដ្ឋមន្ត្រី ប្រធានគណបក្ស ប្រជាជនកម្ពុជា បានបញ្ជូនឈ្មោះបេក្ខជនទាំងនេះដែលត្រូវជំនួសសមាជិកសភាដែលបានលាលែងពីតំណែង ដើម្បីតួនាទីរាជរដ្ឋាភិបាលទៅ គ.ជ.ប កាលពីពេលថ្មីៗកន្លងមកនេះ៕
ចែករំលែកព័តមាននេះ