ប្រភពពី Shanghaiist បានឲ្យដឹងថា បុរសម្នាក់ជាប្តីត្រូវបានគេចោទប្រកាន់ថា បានបោះសត្វឆ្កែមួយក្បាលនិងឆ្មាមួយក្បាលដែលជាសត្វចិញ្ចឹមរបស់ខ្លួន ចេញពីបង្អួចជាន់ទី២១ ក្រោយពីដឹងថា ប្រពន្ធខ្លួនមានផ្ទៃពោះ ។ ចំពោះមូលហេតុនោះ ក៏ព្រោះតែរូបគេ មិនចង់មានការលំបាក ដែលត្រូវមើលកូនផង មើលសត្វចិញ្ចឹមផង ។
កាលពីសប្តាហ៍មុន ស្ត្រីម្នាក់ដែលកំពុងបណ្តើរឆ្កែតាមដងផ្លូវ បានឮសម្លេងទម្លាក់អ្វីមួយពីលើអគារខ្ពស់មកដី ។ គាត់ក៏ទៅមើល ហើយក៏ឃើញសត្វឆ្កែពណ៌មាសមួយក្បាល និងសត្វឆ្មាមួយក្បាលបានងាប់បាត់ទៅហើយ ។
ស្ត្រីស្រឡាញ់សត្វរូបនេះ ដឹងច្បាស់ថា ម្ចាស់ឆ្កែជានរណា ហើយក៏ដឹងថា ឆ្កែនេះមានឈ្មោះអ្វីដែរ។ នេះក៏ដោយសារត ឆ្កែដែលងាប់ធ្លាប់លេងជាមួយនឹងឆ្កែរបស់គាត់ ។ គាត់បានទូរស័ព្ទទៅម្ចាស់ឆ្កែដែរ តែម្ចាស់ឆ្កែធ្វើមិនដឹង បែរជាប្រាប់ថា ចង់ធ្វើអីក៏ធ្វើទៅ ។ ដោយសារតែចិត្តអាណិតអាសូរ គាត់និងអ្នកផងបានយកភួយកូនក្មេងមករុំសត្វទាំងពីរទៅកប់នៅដីទំនេរ ។
នៅថ្ងៃបន្ទាប់ អ្នកកាសែតក៏បានទៅដល់ផ្ទះបុរសជាម្ចាស់ឆ្កែនិងឆ្មា ។ ទីនោះ គ្មាននរណាម្នាក់មកបើកទ្វារឡើយ។ តាមសម្តីរបស់សន្តិសុខនៅទីនោះបានឲ្យដឹងថា បុរសជាប្តីបានបោះឆ្កែឆ្មាចេញពីបង្អួច ក្រោយពីដឹងថា ប្រពន្ធមានផ្ទៃពោះ ។
គេធ្វើបែបនេះ ក៏ដោយសារតែមិនចង់ពិបាកមើលថែសត្វ ក្នុងពេលកំពុងមើលថែកូន។ នេះពិតជាសាហាវឃោរឃៅមែន។ បើតាមសម្តីរបស់អ្នកជិតខាងក៏បានឲ្យដឹងថា សត្វឆ្មាមួយក្បាលដែលបានងាប់យ៉ាងវេទនា កំពុងតែមានកូននៅក្នុងផ្ទៃ ៕
ចែករំលែកព័តមាននេះ