អំណោយសម្បុរសសម្តេច ស ខេង បានប្រគល់ជូននគរបាលខេត្តបាត់ដំបង

ថ្ងៃទី ១១ ខែ កញ្ញា ឆ្នាំ ២០១៨

ម៉ោង ២០:០៣

ខេត្តបាត់ដំបង ៖ លោក ខាន់ ម៉ាណេរ រដ្ឋលេខាធិការក្រសួងសាធារណៈការ និងដឹកជញ្ជូន ព្រមទាំងក្រុមគ្រួសារមនុស្សធម៌ខេត្តបាត់ដំបង បាននាំយកអំណោយដ៏ថ្លៃថ្លារបស់សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ផ្តល់ជូនដល់កងកម្លាំងនគរបាលចំណុះស្នងការដ្ឋាន នគរបាលខេត្តបាត់ដំបង ដែលមានលោក ឧត្តមសេនីយ៍ទោ អ៊ុច សុខុន ស្នងការនៃស្នងការដ្ឋាននគរបាលខេត្តបាត់ដំបងជាតំណាង។ ក្នុងឱកាសផ្តល់ជូននាពេលនេះលោកបានជម្រាបជូនថា អង្ករ និងគ្រឿងឧបភោគបរិភោគដែលសម្តេចផ្តល់ជូនតាមរយៈលោក នាពេលនេះ សូមឲ្យឯកឧត្តមស្នងការ យកទៅបែងចែកដល់កងកម្លាំងនគរបាល ជាពិសេសនគរបាលក្នុងវរៈសេនាតូចគរបាលការពារ ព្រំដែនគោកទាំង០៤ ដែលកំពុងឈរជើងការពារបូរណភាពទឹកដីតាម ខ្សែបន្ទាត់ព្រំដែនកម្ពុជា-ថៃ។

ឯកឧត្តមបានបញ្ជាក់ជូនទៀតថា តាមសំណូមពររបស់លោកស្នងការចំពោះអាគារសុខាភិបាល នោះលោកបានស្នើសុំទៅសម្តេចក្រឡាហោម ស ខេង ដើម្បីសុំការយល់ព្រមក្នុងការសាងសង់ អាគារសុខាភិបាលមួយខ្នងក្នុងបរិវេណស្នងការដ្ឋាននគរបាលខេត្តបាត់ដំបង ដោយបំពាក់នូវឧបករណ៍ និងគ្រឿងបរិក្ខាពេទ្យ សម្រាប់ពិនិត្យ និងព្យាបាលជំងឺដល់កងកម្លាំងនគរបាលក្នុងខេត្តបាត់ដំបង ហើយកិច្ចការនេះលោកនឹងចាប់ផ្តើមសាងសង់នៅពេលបានការយល់ព្រមពីសម្តេចក្រឡាហោម។

លោកឧត្តមសេនីយ៍ទោ អ៊ុច សុខុន ស្នងការនៃ ស្នងការដ្ឋាននគរបាលខេត្តបាត់ដំបង តំណាងឲ្យ កងកម្លាំងនគរបាលទាំងអស់ចំណុះស្នងការដ្ឋានបានសម្តែងនូវទឹកចិត្តរំភើបរីករាយឥតឧបមាចំពោះទឹកចិត្តសប្បុរសរបស់សម្តេចក្រឡាហោម ស ខេង ដែលបានផ្តល់ជូននូវអង្ករព្រមទាំង គ្រឿងឧបភោគ បរិភោគ តតាមរយៈលោក ខាន់ ម៉ាណេរ ព្រមទាំងលោកជំទាវ និងក្រុមគ្រួសារមនុស្សធម៌បាត់ដំបង។ លោកស្នងការបានសន្យាថា នឹងពាំនាំយកអង្ករ ព្រមទាំងគ្រឿងឧបភោគ បរិភោគទាំងនេះ ទៅចែកជូនដល់កងកម្លាំងនគរបាល ពិសេសនគរបាលក្នុងវរៈសេនាតូចការពារព្រំដែនទាំង០៤ ចំណុះស្នងការដ្ឋាននៅពេលដ៏ខ្លីខាងមុខនេះ។

ហើយមានសង្ឃឹមយ៉ាងមុតមាំថា អាគារសុខាភិបាលថ្មី មួយនឹងត្រូវបានស្ថាបនាក្នុងពេលដ៏ខ្លីខាងមុខតាមរយៈលោក ខាន់ ម៉ាណេរ នៅក្នុងបរិវេណស្នងការដ្ឋាននគរបាលខេត្តបាត់ដំបង។ អំណោយនាពេលនោះរួមមាន៖ -អង្ករចំនួន ០៨តោន ស្នើនឹង ៤០០ការ៉ុង,ស្កសរចំនួន ២០០គីឡូក្រាម ស្មើនឹង០៤ការ៉ុង,អំបិលសុខភាពចំនួន ២០០គីឡូក្រាម ស្មើនឹង ០៤ការ៉ុង,ត្រីខកំប៉ុងចំនួន ០៨កេសតូច ស្មើនឹង ៨០០កំប៉ុង,ទឹកត្រីចំនួន ៤០យួរ ស្មើនឹង២៤០ដប, ទឹកស៊ីអីវចំនួន៤០យួរ ស្មើនឹង ២៤០ដប,ប៊ីចេងចំនួន ៤០គីឡូក្រាម ស្មើនឹង៨០ថង់៕