រាជធានីភ្នំពេញ ៖ មេធាវីការពារក្តីក្នុងចំណោមមេធាវីផ្សេងទៀតបានអះអាងលោក កឹម សុខា អតីតប្រធានគណបក្សសង្គ្រោះជាតិត្រូវបានឃុំខ្លួនក្នុងផ្ទះ ។ ការអះអាងរបស់មេធាវីនេះបន្ទាប់ពីលោក កឹម សុខា ត្រូវបានចៅក្រមស៊ើបសួរតុលាការរាជធានីភ្នំពេញបានដោះលែងឲ្យមានសេរីភាពបណ្តោះអាសន្នកាលពីម៉ោងប្រមាណ៣ទាបភ្លឺ កាលពីថ្ងៃទី១០ ខែកញ្ញា ឆ្នាំ២០១៨ កន្លងមក ។
លោកស្រី ម៉េង សុធារី មេធាវីការពារក្តីឲ្យបានឲ្យដឹងតាមបណ្តាញសង្គមថា «លោក កឹម សុខា ត្រូវបានដោះលែងពីការឃុំខ្លួននៅត្រពាំងថ្លុង ដោយអនុញ្ញាតឲ្យមករស់នៅក្នុងលំនៅដ្ឋានរបស់គាត់វិញ ប៉ុន្តែត្រូវស្ថិតនៅក្រោមលក្ខខ័ណ្ឌដែលកំណត់ដោយចៅក្រមដូចជា ៖ មិនអនុញ្ញាតឲ្យចេញពីព្រំប្រទល់ដែនដីដែលកំណត់ដោយចៅក្រមស៊ើបសួរ គឺគាត់អាចដើរបានតែនៅជិតៗផ្ទះគាត់ប៉ុណ្ណោះ ក្នុងករណីគាត់ចង់ទៅឆ្ងាយជាងនេះដោយសារហេតុផលសុខភាពត្រូវសុំការអនុញ្ញាតពីចៅក្រម ។ មិនឲ្យជួបអតីតថ្នាក់ដឹកនាំ CNRP » ។
លោកស្រីមេធាវីបានឲ្យដឹងទៀតថា ក្រៅពីមិនអនុញ្ញាតឱ្យជួបសកម្មជន និងថ្នាក់ដឹងនាំតុលាកាក៏មិនឲ្យជួបជនបរទេស ជាពិសេសជនបរទេសដែលអាចមានការពាក់ព័ន្ធក្នុងសំណុំរឿងនិងមិនឲ្យធ្វើសកម្មភាពជួបជុំក្នុងគោលដៅនយោបាយ…។ យ៉ាងណាក្តីលោកស្រីមេធាវីបានអះអាងថា ការឃុំខ្លួននៅផ្ទះរបស់លោក កឹម សុខា គឺគ្រាន់បើជាងឃុំនៅក្នុងពន្ធនាគារបន្តិច ។
មេធាវីបន្តថា លោក កឹម សុខា ពេលមកដល់ផ្ទះជាលើកដំបូងនៅវេលាប្រហែលម៉ោង៣និង៣០នាទីទាបភ្លឺថ្ងៃទី១០ ខែកញ្ញា ឆ្នាំ២០១៨ បន្ទាប់ពីការចាប់ខ្លួនកាលពីយប់ថ្ងៃទី៣ ខែកញ្ញាឆ្នាំ២០១៧ ៕
ចែករំលែកព័តមាននេះ