ខេត្តកំពង់ចាម ៖ សិស្សដែលបានចូលរួមប្រលងសញ្ញាបត្រមធ្យមសិក្សាទុតិយភូមិឬបាក់ឌុបមានចំនួន៧៧៣៦នាក់ ក្នុងនោះស្រី៤២៧៥នាក់ ហើយលទ្ធផលនៅព្រឹកថ្ងៃទី១០ ខែកញ្ញា ឆ្នាំ២០១៨ សិស្សដែលជាប់មានចំនួន៤៣៦៥នាក់ ក្នុងនោះស្រី២៥២៥នាក់ ស្មើនឹង៥៦,៤២ភាគរយ…
ខេត្តកំពង់ចាម ៖ សិស្សដែលបានចូលរួមប្រលងសញ្ញាបត្រមធ្យមសិក្សាទុតិយភូមិឬបាក់ឌុបមានចំនួន៧៧៣៦នាក់ ក្នុងនោះស្រី៤២៧៥នាក់ ហើយលទ្ធផលនៅព្រឹកថ្ងៃទី១០ ខែកញ្ញា ឆ្នាំ២០១៨ សិស្សដែលជាប់មានចំនួន៤៣៦៥នាក់ ក្នុងនោះស្រី២៥២៥នាក់ ស្មើនឹង៥៦,៤២ភាគរយ ហើយសិស្សដែលប្រលងជាប់និទ្ទេសAមានចំនួន១៣នាក់ដែលកាលឆ្នាំកន្លងទៅនិទ្ទេសAមានចំនួន២០នាក់ ។
យុវតី ភាន់ ស្រីខួច អាយុ១៨ឆ្នាំ រៀននៅវិទ្យាល័យ ហ៊ុន សែន កំពង់ចាម ក្រុងកំពង់ចាមប្រាប់ថា
រូបនាងបានប្រលងនៅមណ្ឌលវិទ្យាល័យដីដុះ ក្រុងកំពង់ចាម កាលពីថ្ងៃទី២០និង២១ សីហា ២០១៨កន្លងទៅដោយក្នុងបន្ទប់មានគ្នាចំនួន២៥នាក់ ។ នៅរាល់គ្រប់វិញ្ញាសារនៅពេលដែលខ្វះ១៥នាទីដល់ម៉ោងវាយជួងប្រមូលវិញ្ញាសារនាងមានការភិតភ័យញ័រដៃសរសេរមិនចង់កើតនោះទេ ទោះជាបែបនេះក្តីប្រឹងប្រមូលអារម្មណ៏ឲ្យប្រសើរ ។
យុវតី ភាន់ ស្រីខួច ប្រាប់បន្តថា សម្រាប់ការសិក្សានៅក្នុងថ្នាក់រៀនប្រចាំខែវិញចំណាត់បានលេខ៥ និង៦ស្ទើររាល់ខែការសិក្សាទទួលបានលទ្ធផលគ្រាន់បើ លុះមកដល់ព្រឹកថ្ងៃទី១០ កញ្ញា នៅពេលដែលលទ្ធផលបានចេញនោះគឺជាប់និទ្ទេស «D» ពិតជាសប្បាយចិត្តដោយបានប្រលងជាប់ ។ ជាមួយនោះបំណងប្រាថ្នាចង់ធ្វើជាគ្រូបង្រៀន និងនគរបាលជាតិនៅក្នុងខេត្តកំពង់ចាមក្នុងចំណោម២មុខព្រួញនេះស្រលាញ់គ្រូជាងគេ ហើយនឹងលត់ដំឲ្យទៅជាបញ្ញាវ័ន្តមានចំណេះដឹងក្នុងសង្គម ។
យុវជន យ៉ូវ លីហៀង រៀនថ្នាក់ទី១២ «A» នៅវិទ្យាល័យព្រះសីហនុក្រុងកំពង់ចាម ប្រាប់ថា កន្លងមកដោយសារតែរូបគេជាសិស្សរៀនពូកែបានចួលរួមប្រលងថ្នាក់ខេត្ត និងបានប្រលងផ្នែករូបវិទ្យានៅទូទាំងប្រទេសកម្ពុជាថែមទៀតផង ។ រូបគេបានប្រលងសញ្ញាបត្រមធ្យមសិក្សាទុតិយភូមិនៅមណ្ឌលវិទ្យាល័យព្រះសីហនុ សម្រាប់លទ្ធផលដែលទទួលបាននោះគឺនិទ្ទេស «A» បានពិន្ទុដល់ទៅ ៩៩,៩៩៧បំណងនឹងចូលរៀនៅសាលាទិចណូ រាជធានីភ្នំពេញ ។ ហើយបំណងប្រាថ្នាមួយទៀតដែលចង់ទៅខ្លាំងនោះការប្រលងយកអាហាររូបករណ៏នៅប្រទេសជប៉ុនតែម្តង ។
លោក លី ម៉េងសាន្ត ប្រធានមន្ទីរអប់រំយុវជន និងកីឡាខេត្ត បានឲ្យដឹងដែរថា សិស្សដែលបានមកចូលរួមប្រលងមធ្យមសិក្សាទុតិយភូមិឆ្នាំសិក្សា២០១៧-២០១៨មានចំនួន៧៧៣៦នាក់ ហើយលទ្ធផលប្រលងជាប់ដែលបានបិទនៅមណ្ឌលប្រលងនានាក្នុងខេត្តជាប់បានចំនួន៤៣៦៤នាក់ ក្នុងនោះស្រី២៥២៥នាក់ បើគិតស្មើនឹង៥៦,៤២ភាគរយ ហើយជាប់និទ្ទេស «A» មានចំនួន១៣នាក់ ។
កាលពីឆ្នាំសិក្សា២០១៦-២០១៧ សិស្សជាប់និទ្ទេស«A»មានចំនួន២០នាក់ប្រៀបធៀបបរិមាណ និងគុណភាពមានការថយចុះ០,០៧ភាគរយ ទាំងនេះដោយសារការរឹតបន្តឹងរបស់ក្រសួងអបរំយុវជន និងកីឡា ដើម្បីពង្រឹងគុណភាពពីមួយឆ្នាំទៅមួយឆ្នាំឲ្យកាន់តែប្រសើរឡើង ៕
ចែករំលែកព័តមាននេះ