មេធាវីលោក កឹម សុខា អះអាងហើយថាលោក កឹម សុខា មិនចេញមកជួបអ្នកគាំទ្រទេ
- ភ្នំពេញ
រាជធានីភ្នំពេញ ៖ លោក ចាន់ ចេង មេធាវីការក្តីឲ្យលោក កឹម សុខា បានអះអាងរហូតមកដល់ពេលនេះលោក កឹម…
រាជធានីភ្នំពេញ ៖ លោក ចាន់ ចេង មេធាវីការក្តីឲ្យលោក កឹម សុខា បានអះអាងរហូតមកដល់ពេលនេះលោក កឹម សុខា មិនចេញមកជួបជាមួយអ្នកគាំទ្របាននោះទេ ដោយសារបញ្ហា សុខភាពរបស់គាត់មិនទាន់បានស្រួលនៅឡើយទេ ។
លោកមេធាវីបញ្ជាក់ឲ្យដឹងនៅព្រឹកថ្ងៃទី១០ ខែកញ្ញា ឆ្នាំ២០១៨ នេះថា «តុលាការឲ្យលោក កឹម សុខា ចេញពីពន្ធនាគារជាបណ្តោះអាសន្ន ហើយស្ថិតនៅក្រោមការត្រួតពិនិត្យ ។ កូនក្តីខ្ញុំមានសុខភាពធម្មតាទេ ទាំងផ្លូវកាយ និងផ្លូវចិត្ត ។ តែលោកមិនអាចចេញមកជួបអ្នកគាំទ្របានទេ» ។
យ៉ាងណាក្តីលោកមេធាវីបានអះអាងថា លោកមិនទាន់បានពិភាក្សាជាមួយកូនក្តីក្នុងការពិភាក្សាជាមួយចៅក្រមស៊ើបសួរដើម្បីសុំទៅព្យាបាលនៅក្រៅប្រទេសនៅឡើងទេ ។
តាមរយៈមេធាវីការពារក្តីលោក កឹម សុខា មិនអាចចេញមកជូបជាមួយអ្នកគាំទ្រនៅថ្ងៃទី១០ ខែកញ្ញា ឆ្នាំ២០១៨ នេះនោះទេ បន្ទាប់ពីជាប់ពន្ធនាគារអស់រយៈពេលជាង១ឆ្នាំលោក កឹម សុខា អតីតប្រធានគណបក្សសង្គ្រោះជាតិត្រូវបានតុលាការដំបូងរាជធានីភ្នំពេញសម្រេចដោះលែងឲ្យមានសេរីភាពជាបណ្តោះអាសន្នវិញហើយ កាលពីព្រឹកម៉ោងប្រមាណ៣ទៀបភ្លឺថ្ងៃទី១០ ខែកញ្ញា ឆ្នាំ២០១៨ ។
លោក គី ឬទ្ធី ចៅក្រមស៊ើបសួរសាលាដំបូងរាជធានីភ្នំពេញបានចេញដីការបង្គាប់ឲ្យដោះលែងលោក កឹម សុខា ដោយបានបញ្ជាក់ថា យ៉ាងដូច្នេះថា«ឲ្យប្រធានមណ្ឌលអប់រំកែប្រែ«ម៣» ដោះលែងជនត្រូវចោទឈ្មោះ កឹម សុខា អាយុ៦៤ឆ្នាំ ត្រូវបានតំណាងអយ្យការដាក់ឲ្យ ស្ថិតនៅក្រោមការពិនិត្យពីបទ «សន្និដ្ឋិភាពជាមួយបរទេស» ប្រព្រឹត្តិនៅប្រទេសកម្ពុជា និងទី កន្លែងផ្សេងទៀត កាលពីអំឡុង ឆ្នាំ១៩៩៣ ដល់ថ្ងៃទី០៣ ខែកញ្ញា ឆ្នាំ២០១៧ បទល្មើសព្រហ្មទណ្ឌដែលមានចែង និងឲ្យផ្តន្ទាទោសតាមបញ្ញាត្តិមាត្រា៤៤៣ នៃក្រមហ្មទណ្ឌដែលត្រូវឃុំខ្លួ នតាមដីការសម្រេចឃុំខ្លួនបណ្តោះអាសន្នលេខ៥២០៣ម«គ» ចុះថ្ងៃទី៦ ខែកញ្ញា ឆ្នាំ២០១៧ ។
ដីការបង្គាប់ឲ្យឃុំខ្លួនលេខ៧២៥៨ «គ» ចុះថ្ងៃទី៦ ខែកញ្ញា ឆ្នាំ២០១៧ ។ ដីការសម្រេចពន្យាពេលឃុំខ្លួនបណ្តោះអាសន្ន លេខ១៨១៥ ថ្ងៃទី៥ ខែមីនា ឆ្នាំ២០១៨ ។ ដីការបង្គាប់ឲ្យពន្យាពេលឃុំខ្លួនបណ្តោះអាសន្នលេខ៤៧៨៧ ថ្ងៃទី៥ មីនា ឆ្នាំ២០១៨ ។ ដីការបង្គាប់ឲ្យពន្យាពេលឃុំខ្លូនបណ្តោះសន្នលេខ៦៩៩៩ «គ» ថ្ងៃទី៣ សីហា ឆ្នាំ២០១៨» ។
លោក កឹម សុខា ត្រូវបានដោះលែងចេញពីពន្ធនាគារត្រពាំងថ្លុងនៅម៉ោងប្រមាណ៣ភ្លឺ ហើយត្រូវដឹកទៅកាន់គេហដ្ឋានវិញស្ថិតនៅផ្ទះលេខ៩៧ ផ្លូវ៣១៣ សង្កាត់បឹងកកទី២ ខណ្ឌទួលគោក រាជធានីភ្នំពេញ ៕
ចែករំលែកព័តមាននេះ