រាជធានីភ្នំពេញ ៖ អ្នករត់តាក់ស៊ីម្នាក់ត្រូវបានសមមត្ថកិច្ចនគរបាលព្រហ្មទណ្ឌក្រសួងមហាផ្ទៃឃាត់ខ្លួន កាលពី ថ្ងៃទី៦ កញ្ញា ២០១៨ បន្ទាប់ពីរូបគេបានធ្វើសកម្មភាពប្លន់ជនជាតិជប៉ុនយកប្រាក់ចំនួន១ម៉ឺនដុល្លារអាមេរិក ។ ជនសង្ស័យឈ្មោះ…
រាជធានីភ្នំពេញ ៖ អ្នករត់តាក់ស៊ីម្នាក់ត្រូវបានសមមត្ថកិច្ចនគរបាលព្រហ្មទណ្ឌក្រសួងមហាផ្ទៃឃាត់ខ្លួន កាលពី ថ្ងៃទី៦ កញ្ញា ២០១៨ បន្ទាប់ពីរូបគេបានធ្វើសកម្មភាពប្លន់ជនជាតិជប៉ុនយកប្រាក់ចំនួន១ម៉ឺនដុល្លារអាមេរិក ។ ជនសង្ស័យឈ្មោះ ប៊ុន ម៉ៅ ភេទប្រុស អាយុ៤២ឆ្នាំ មុខរបរអ្នករត់តាក់ស៊ី ប្រើប្រាស់រថយន្តម៉ាកបាឡែន។ លោកវរៈសេនីយ៍ឯក ជាវ វិបុល ប្រធានការិយាល័យនគរបាលព្រហ្មទណ្ឌកម្រិតធ្ងន់ក្រសួងមហាផ្ទៃបានឲ្យដឹងថា កាលពីវេលាម៉ោង២ និង៣០នាទីរំលងអាធ្រាត្រ ថ្ងៃទី១ កញ្ញា ២០១៨ មានករណីចោរប្លន់ជនបរទេស យកប្រាក់អស់១ម៉ឺនដុល្លារអាមេរិក។
បន្ទាប់ពីមានករណីប្លន់នោះជនរងគ្រោះមានឈ្មោះ សាកូស៊ី កាដូយ៉ា ភេទប្រុស អាយុ៤៣ឆ្នាំ ជនជាតិជប៉ុន បានដាក់ពាក្យបណ្តឹងដល់សមត្ថកិច្ច ដោយបានបំភ្លឺយ៉ាងច្បាស់ថា កាលពីវេលាម៉ោង១២ ថ្ងៃត្រង់ថ្ងៃទី៣១ កញ្ញា ២០១៨ ឈ្មោះ សូ គ្រឹះតូមុ ត្រូវជាមិត្តភក្តិបានសងប្រាក់មកខ្លួន ចំនួន១០ម៉ឺនដុល្លារអាមេរិក។ លុះដល់ម៉ោង៦ល្ងាចថ្ងៃដដែល ខ្លួនបានចេញពីផ្ទះជិះម៉ូតូកង់បីជាមួយមិត្តភក្តិ ទៅផឹកស៊ីនៅហាងយីហោ មីយ៉ាមិ ស្ថិតនៅបណ្តោយផ្លូវលេខ៦៣ សង្កាត់ទន្លេបាសាក់ ខណ្ឌចម្ការមន រាជធានីភ្នំពេញ រហូតដល់ម៉ោង២ និង៣០នាទីរំលងអាធ្រាត្រ ចូលថ្ងៃទី១ កញ្ញា ហើយគេក៏បានហៅតាក់ស៊ី តាមរយៈPassapp។
មួយសន្ទុះក្រោយមកក៏ឃើញមានរថយន្តមួយគ្រឿងម៉ាកកាមរីបាឡែន ពណ៌ទឹកមាស ពាក់ស្លាកលេខ ភ្នំពេញ ២I-៧៧៣១ មកទទួលរូបគេ(ជនរងគ្រោះ)ដឹកសំដៅទៅកន្លែងដែលគេស្នាក់នៅ គឺផ្ទះលេខ២៣ ផ្លូវលេខ១១៣ កែវ ផ្លូវលេខ៣០៤ សង្កាត់បឹងកេងកង២ ខណ្ឌចម្ការមន។ ពាក្យបណ្តឹងបានបញ្ជាក់ទៀតថា ពេលខ្លួនទៅដល់ផ្ទះបានចុះពីរថយន្ត ហើយក៏យកប្រាក់ពីកាបូប ដើម្បីឲ្យថ្លៃតាក់ស៊ីចំនួន៥ដុល្លារអាមេរិក ពេលនោះអ្នករត់តាក់ស៊ីឃើញខ្លួនមានប្រាក់ក្នុងកាបូបច្រើន ក៏បានវាយប្រតាយប្រតប់ដណ្តើមទាញយកកាបូបពីខ្លួន ដែលមានប្រាក់ចំនួន២ម៉ឺនដុល្លារ ហើយបើករថយន្តគេចខ្លួនបាត់។
ក្រោយមានពាក្យបណ្តឹងលោកឧត្តមសេនីយ៍ឯក ង៉េង ជួ ប្រធាននាយកដ្ឋាននគរបាលព្រហ្មទណ្ឌក្រសួង បានចាត់តាំងរូបលោក ឲ្យដឹកនាំកម្លាំងជំនាញចុះសហការ ជាមួយនគរបាលខណ្ឌចម្ការមន ដើម្បីធ្វើការស្រាវជ្រាវរកមុខសញ្ញាប្លន់លុយជនបរទេសនោះ។ ការស៊ើបអង្កេត និងស្រាវជ្រាវតាមរយៈកម្លាំងជំនាញ បានប្រើពេលវេលាតែ៥ថ្ងៃ គឺនៅថ្ងៃទី៦ កញ្ញា ក៏ឈានដល់ការចាប់ឃាត់ខ្លួន ជនសង្ស័យម្នាក់ ដូចមានឈ្មោះខាងលើគឺអ្នករត់តាក់ស៊ីនោះជាចោរប្លន់ជនបរទេស រួមទាំងដកហូតវត្ថុតាងទូរស័ព្ទ ដៃ២គ្រឿង និងរថយន្ត១គ្រឿងជាមធ្យោបាយជិះធ្វើសកម្មភាព ព្រមទាំងប្រាក់៩.៨០០ ដុល្លារអាមេរិក ជាលុយរបស់ជនរងគ្រោះ។
ក្រោយឃាត់ខ្លួន និងជនសង្ស័យបានឆ្លើយសារភាពថា ខ្លួនពិតជាបានធ្វើសកម្មភាព ប្លន់លុយជនបរទេសនោះមែន ប៉ុន្តែលុយដែលប្លន់បានគឺមានចំនួនតែ១ម៉ឺន ដុល្លារអាមេរិកទេ។ ទោះជាយ៉ាងណាក្តីយោងលើចម្លើយរបបស់ជនសង្ស័យអះអាង ថាខ្លួនបានប្រព្រឹត្តជាក់ស្តែង និង ការបំភ្លឺរបស់ជនរងគ្រោះស៊ីសង្វាក់ទៅលើបទល្មើស សមត្ថកិច្ចបាន កសាងសំណុំរឿងបញ្ជូនខ្លួនទៅកាន់សាលាដំបូងរាជធានីភ្នំពេញ តាមនីតិវិធី៕
ចែករំលែកព័តមាននេះ