ADផ្ទាំងផ្សព្វផ្សាយពាណិជ្ជកម្ម

Picture

ស្នងការដ្ឋាន​ខេត្ត​ទទួល​បាន​រថយន្ត​សង្គ្រោះ​១​គ្រឿង ពី​សប្បុរសជន

5 ឆ្នាំ មុន
  • បាត់ដំបង

ខេត្តបាត់ដំបង ៖ រថយន្ត​សង្គ្រោះ​មួយ​គ្រឿង​បំពាក់​ដោយ​ឧបករណ៍​ជួយ​សង្គ្រោះ ត្រូវ​បាន​ប្រគល់​ដោយ ទឹកចិត្ត​សប្បុរស​ពី​លោក វេជ្ជបណ្ឌិត យី គក់ និង​ក្រុម​គ្រួសារ ព្រមទាំង​ឱសថ​មួយ​ចំនួន​ពី​លោក​វេជ្ជ…

ខេត្តបាត់ដំបង ៖ រថយន្ត​សង្គ្រោះ​មួយ​គ្រឿង​បំពាក់​ដោយ​ឧបករណ៍​ជួយ​សង្គ្រោះ ត្រូវ​បាន​ប្រគល់​ដោយ ទឹកចិត្ត​សប្បុរស​ពី​លោក វេជ្ជបណ្ឌិត យី គក់ និង​ក្រុម​គ្រួសារ ព្រមទាំង​ឱសថ​មួយ​ចំនួន​ពី​លោក​វេជ្ជ បណ្ឌិត សន សុខ បាន​ប្រគល់​ជូន​នៅ​រសៀល​ថ្ងៃ​ទី​០៧ ខែកញ្ញា ឆ្នាំ​២០១៨​នេះ ក្រោម​អធិប​តិ​ភាព​លោក ឧត្តមសេនីយ៍ទោ អ៊ុ​ច សុ​ខុន ស្នងការ​នៃ​ស្នងការដ្ឋាន​នគរបាល​ខេត្តបាត់ដំបង ពី​លោកស្រី​នាយិកា គង់ ស៊ី​អេ​ង នៃ​មន្ទីរ​សម្រាក​ព្យាបាល យី គក់ ភរិយា​លោក​វេជ្ជបណ្ឌិត យី គក់ និង​សហការី ប្រគល់​ឲ្យ​ស្ថិត​នៅ ក្នុង​ក្រុង​បាត់ដំបង ហើយ​ជាមួយ​គ្នា​នេះ លោក​ឧត្តមសេនីយ៍ទោ ស្នងការ​នគរបាល​ខេត្តបាត់ដំបង បាន​ទទួល​នូវ​ឱសថ​សម្រាប់​ព្យាបាល​ជំងឺ​ក្រពះ ឡើង​សម្ភា​ធ​ឈាម និង​ទឹកនោមផ្អែម ចំនួន ៦.០០០​គ្រាប់ ពី​លោក​វេជ្ជបណ្ឌិត សន សុខ ប្រធាន​មន្ទីរសម្ភព​សុខ​សម្ភព​ស្ថិត​នៅ​ក្រុង​បាត់ដំបង រួម​ជាមួយ​គ្នា​ដែរ​។

លោកស្រី​គង់ ស៊ី​អេ​ង ភរិយា​របស់​លោក​វេជ្ជបណ្ឌិត យី គក់ ព្រមទាំង​លោក​វេជ្ជបណ្ឌិត តំណាង​ឲ្យ​មន្ទីរ​សម្រាក​ព្យាបាល យី គក់ និង​លោក​វេជ្ជបណ្ឌិត សន សុខ ប្រធាន​មន្ទីរសម្ភព សុខ​សម្ភព បាន​ថ្លែង​នូវ​ទឹកចិត្ត​រីករាយ ក្នុង​ពេល​បាន​បរិ​ច្ចាក​នូវ​រថយន្ត​សង្គ្រោះ និង​ឱសថ​ជូន​ដល់​កងកម្លាំង​ដែល​មាន លោកស្នងការ​នគរបាល​ខេត្តបាត់ដំបង នា​ពេល​នេះ​ដោយ លោក លោកស្រី​មើលឃើញ​យ៉ាង​ច្បាស់​អំពី តម្រូវការ​ចាំបាច់​ក្នុង​ការ​ជួយ​សង្គ្រោះ​អាយុជីវិត​របស់​ប្រជាពលរដ្ឋ​នៅ​ក្នុង​ខេត្តបាត់ដំបង ក្នុង​ខណៈ​ដែល​ពួក​គាត់​ជួប​ឧប្បត្តិហេតុ​គ្រោះ​ថា្ន​ក់​ចរាចរណ៍ គ្រោះថ្នាក់​ដោយ​ប្រការ​ផ្សេង​ៗ ឬ​មាន​ជំងឺ​ដែល​ត្រូវ​ប្រើប្រាស់​មធ្យោបាយ​សង្គ្រោះ​ប្រកបដោយ​ប្រសិទ្ធភាព ក៏​ដូច​ជា​ការ​ពិនិត្យ ព្យាបាល​ជំងឺ​ដល់​កងកម្លាំង​នគរបាល ក្រុម​គ្រួសារ​នគរបាល និង​ប្រជាពលរដ្ឋ​ដែល​នៅ​ទី​ឆ្ងាយ ពី​មណ្ឌល​សុខភាព​។

លោក​ឧត្តមសេនីយ៍ទោ អ៊ុ​ច សុ​ខុន បាន​សម្តែង​នូវ​អំណរ​គុណ​យ៉ាង​ជ្រាលជ្រៅ បំផុត​ចំពោះ​ទឹកចិត្ត​ចូលរួម​ចែករំលែក​នូវ​ការ​ចាំបាច់​ចំពោះ​មុខ​នេះ ដែល​លោកស្នងការ​បាន​លើក​ឡើង​ថា រថយន្ត និង​ឱសថ​ដែល​ទទួល​បាន​ពី​សប្បុរសជន​នៅ​ពេល​នេះ លោក​មិនមែន​យក​ទៅ​ប្រើប្រាស់​សង្គ្រោះ សម្រាប់​តែ​កងកម្លាំង​នគរបាល​តែ​ប៉ុណ្ណោះ​ទេ គឺ​យក​ទៅ​ប្រើប្រាស់​បម្រើ​ជូន​ដល់​ប្រជាពលរដ្ឋ​ទូទៅ នៅ​ក្នុង​ខេត្តបាត់ដំបង​ទាំងមូល ក្នុង​ពេល​ពួក​គាត់​ជួប​ប្រទះ​នូវ​ឧប្បត្តិហេតុ​ផ្សេង​ៗ ឬ​មាន​ជំងឺ​យប់ ថ្ងៃ​ត្រូវការ​សង្គ្រោះ​បន្ទាន់​នោះ​យើង​អាច​ជួយ​សង្គ្រោះ​ពួក​គាត់​បាន​ទាន់​ពេលវេលា​។

ហើយ​ក៏​សុំ​អំពាវនាវ បន្ថែម​ទៀត​ផង​ដែរ​ថា ការិយាល័យ​សុខាភិបាល នៅ​ក្នុង​ស្នងការដ្ឋាន មិន​ទាន់​មាន​អាគារ​សម្រាប់​ជំនាញ ផ្នែក​សុខភាព​បម្រើ​ពិនិត្យ​ព្យាបាល​ដល់​កងកម្លាំង​ក្នុង​ស្នងការ​នៅឡើយ​ទេ នេះ​ជា​ចំណាប់អារម្មណ៍​មួយ ដែល​សប្បុរសជន​ផ្សេង​ៗ​ទៀត​ដែល​មានចិត្ត​ចង់​ជួយ ហើយ​មិន​បានដឹង​អំពី​ការ​ខ្វះខាត ដូច្នេះ​មាន​តែ​ទឹកចិត្ត​សប្បុរសធម៌​ពី​បងប្អូន​ដែល​ចាប់អារម្មណ៍ សូម​យល់​ដឹង និង​ជួយ​កាត់​បន្ថយ​ការ​លំបាក​ក្នុង​អង្គភាព​តាម​លទ្ធភាព​ដែល​មាន ព្រោះ​ការងារ​ប្រចាំ​ថ្ងៃ គឺ​សន្តិសុខ សណ្តាប់ធ្នាប់​សង្គម គឺ​ដើម្បី​ក្តី​សុខ​របស់​យើង​ទាំងអស់​គ្នា​ត្រូវ​រួម​គ្នា​ធ្វើ និង​រួម​គ្នា​កសាង សម្រាប់​ប្រយោជន៍​សង្គម​យើង​ទាំងអស់​គ្នា​៕

អត្ថបទសរសេរ ដោយ

កែសម្រួលដោយ