ខេត្តតាកែវ ៖ លោកឧត្តមសេនីយ៍ទោ សុខ សំណាង ស្នងការនគរបាលខេត្តតាកែវ បានធ្វើការណែនាំដល់កំលាំងជំនាញព្រហ្មទណ្ទខេត្តក៏ដូចជាកំលាំងអធិការដ្ឋាននគរបាលគ្រប់ស្រុក ក្រុងក្នុងការទប់ស្កាត់ការបង្ការ និងបង្ក្រាបបទល្មើសផ្សេងៗឲ្យបានទាន់ពេលវេលានៅក្នុងមូលដ្ឋានរបស់ខ្លួនគ្រប់គ្រងនាព្រឹកថ្ងៃទី៦ ខែកញ្ញា…
ខេត្តតាកែវ ៖ លោកឧត្តមសេនីយ៍ទោ សុខ សំណាង ស្នងការនគរបាលខេត្តតាកែវ បានធ្វើការណែនាំដល់កំលាំងជំនាញព្រហ្មទណ្ទខេត្តក៏ដូចជាកំលាំងអធិការដ្ឋាននគរបាលគ្រប់ស្រុក ក្រុងក្នុងការទប់ស្កាត់ការបង្ការ និងបង្ក្រាបបទល្មើសផ្សេងៗឲ្យបានទាន់ពេលវេលានៅក្នុងមូលដ្ឋានរបស់ខ្លួនគ្រប់គ្រងនាព្រឹកថ្ងៃទី៦ ខែកញ្ញា ឆ្នាំ២០១៨ កម្លាំងនគរបាលការិយាល័យព្រហ្មទណ្ឌកំរិតធ្ងន់បានបញ្ជូនជនសង្ស័យ២នាក់ជាប់ពាក់ព័ន្ធករណីអំពើលួចមានស្ថានទម្ងន់ទោស (កាច់សោករម៉ូតូ) ទៅកាន់សាលាដំបូងខេត្តតាកែវ។
លោកវរសេនីយ៍ឯក ង៉ាន់ សារី អធិការ នគរបាលស្រុកបាទីបានឲ្យដឹងថា វេលាម៉ោង៥និង៤០នាទីល្ងាចថ្ងៃទី៥ ខែកញ្ញា ឆ្នាំ២០១៨ នៅមុខរោងចក្រវីនតាយ ស្ថិតនៅភូមិឃ្លាំងសម្បត្តិ ឃុំពត់សរ សុក្របាទី ខេត្តតាកែវ មានករណីលួចមានស្ថានទម្ងន់ទោសមួយកើតឡើង ដែលប្រព្រឹត្តដោយជនសង្ស័យ២នាក់ ម្នាក់ឈ្មោះ ជុង វិច្ឆ័យ ភេទប្រុស អាយុ២៣ឆ្នាំ រស់នៅភូមិត្រើង ឃុំថ្នល់ទទឹង ស្រុកចំការលើ ខេត្តកំពង់ចាម និងម្នាក់ទៀតឈ្មោះ វុធ រស្មី ភេទប្រុសអាយុ១៨ឆ្នាំ រស់នៅភូមិតទួមាស ឃុំតាអុង ស្រុកចំការលើ ខេត្តកំពង់ចាម ។
ប្រភពដដែលបានបន្តថា ជនសង្ស័យទាំង២នាក់បានជិះម៉ូតូមួយគ្រឿងម៉ាកសង់ធុនសេ១២៥ ស៊េរីឆ្នាំ២០១៨ ពណ៌ខ្មៅ ពាក់ស្លាកលេខ ភ្នំពេញ ១GP-៨២៩៥ ដើម្បីធ្វើសកម្មភាពលួចកាច់សោ.កម៉ូតូ១គ្រឿងម៉ាកសង់សេ១២៥ ពណ៌ខ្មៅ ស៊េរីឆ្នាំ២០១៦ ពាក់ស្លាកលេខ តាកែវ ១T-៧៥៧៨ ជាកម្មសិទ្ធិរបស់ឈ្មោះ ឃាង ឡោ ភេទស្រី អាយុ៤៩ឆ្នាំ រស់នៅភូមិបឹងខ្យាង ឃុំព្រែកតាតូច ស្រុកកណ្តាលស្ទឹង ខេត្តកណ្តាល។
ប្រភពដដែលបានបន្តទៀតថា មុនពេលកើតហេតុ ពេលដែលជនរងគ្រោះជាម្ចាស់បញ្ឈរម៉ូតូទុកមុខរោងចក្រកន្លែងកើតហេតុខាងលើ ស្រាប់តែជនសង្ស័យទាំង២នាក់បានធ្វើសកម្មភាពកាច់សោ.កយកម៉ូតូ ហើយជិះម៉ូតូគេចខ្លួនបាត់។
បន្ទាប់ពីទទួលបានព័ត៌មានខាងលើភ្លាម កម្លាំងសមត្ថកិច្ចបានធ្វើការពួនស្ទាក់ គ្រប់ច្រកល្ហកទើបចាប់បានជនសង្ស័យទាំងពីរនាក់ និងដកហូតវត្ថុតាងម៉ូតូ១គ្រឿងម៉ាកសង់ធុនសេ១២៥ ស៊េរីឆ្នាំ២០១៨ ពណ៌ខ្មៅ ពាក់ស្លាកលេខ ភ្នំពេញ ១GP-៨២៩៥ ។
នៅចំពោះមុខសមត្ថកិច្ច ជនសង្ស័យបាននិយាយសារភាពថា ពួកខ្លួនពិតជាបានធ្វើសកម្មភាពកាច់សោ.កយកម៉ូតូរបស់ជនរងគ្រោះពិតប្រាកដមែន តែរត់មិនរួច ក៏ត្រូវសមត្ថកិច្ចចាប់បានតែម្តង។
លោកវរសេនីយ៍ឯកសែម សុជាតិ នាយការិយាល័យព្រហ្មទណ្ទកំរិតធ្ងន់ខេត្តបានអោយដឹងថា សមត្ថកិច្ចបានកសាងសំណុំរឿងរួចរាល់នៅថ្ងៃទី៦ កញ្ញា ២០១៨ ហើយក៏បានបញ្ជូនជនសង្ស័យ រួមនឹងវត្ថុតាងទៅកាន់សាលាដំបូងខេត្តដើម្បីកាត់ទោសទៅតាមច្បាប់ ។ រីឯម៉ូតូរបស់ជនរងគ្រោះក៏បានប្រគល់អោយម្ចាស់វិញផងដែរ ៕
ចែករំលែកព័តមាននេះ