តាម​ប្រភព​ព័ត៌មាន Manchester Evening News បាន​ឲ្យ​ដឹង​ថា កីឡាករ​របស់​ក្លិប​អ្នកមាន​បារាំង Neymar Jr. តារា​ឆ្នើម​ជម្រើសជាតិ​ប្រេ​ស៊ី​ល ជឿជាក់​ថា Manchester City នឹង​នៅ​តែ​ឈ្នះ Premier League នៅ​រដូវ​កាល​នេះ​ដែល​អាច​នឹង​ធ្វើ​ឲ្យ​អ្នកគាំទ្រ​របស់​ក្លិប​ហង្ស​ក្រហម Liverpool មិន​ពេញចិត្ត ។

Neymar មិន​ត្រឹមតែ​កាន់ជើង​ខាង​លោក Pep Guardiola ឲ្យ​យកឈ្នះ​ខាង​លោក Jurgen Klopp នោះ​ទេ រូបគេ​ថែម​ទាំង​ថា Liverpool នឹង​ចាញ់​នៅ​វគ្គ​បួន​ក្រុម​ចុង​ក្រោយ​ថែម​ទៀត​ផង ។ កីឡាករ​ប្រេ​ស៊ី​ល​រូប​នេះ​បាន​បន្ថែម​ថា ក្រុម​បិសាច​ក្រហម Manchester United នឹង​អាច​មក​ប្រកិត​គ្នា​ជាមួយនឹង​គូប្រជែង​ធំ Manchester City ដូច​សព្វ​រាល់ដង ។

កីឡាករ​ថ្លៃ​របស់ PSG បាន​ប្រាប់​សារព័ត៌មាន Express ថា ៖«​តើ​នរណា​នឹង​អាច​ជាប់? ពិតជា​ពិបាក​និយាយ​ណាស់ ។ វា​ពិតជា​ពិបាក​មែន តែ Manchester City នឹង​ឈ្នះ​» ។ នៅ​ពេល​គេ​សួរ​ពី​ការ​គិត​របស់ Neymar ទៅ​លើ​ក្រុម​ណា​ដែល​អាច​ឡើង​ដល់​វគ្គ​បួន​ក្រុម​ចុង​ក្រោយ Neymar បាន​ឆ្លើយ​ថា ៖«​ទី​ពីរ​គឺ United ទី​បី​គឺ Chelsea និង ទី​បួន​គឺ Tottenham» ។

អ្វី​ដែល​គួរតែ​ធ្វើ​ឲ្យ​អ្នកគាំទ្រ Liverpool អាច​ខឹង​គឺ​នៅ​ពេល​អ្នក​សារព័ត៌មាន​សួរ​បញ្ជាក់​ថា ហេតុ​អ្វី​បានជា​គ្មាន Liverpool ។ Neymar ឆ្លើយ​ថា ៖«​គ្មាន​ទេ Liverpool» ។

គួរ​បញ្ជាក់​ផង​ដែរ​ថា ពាក្យ​ច​ចាម​អារាម​មួយ​ចំនួន​ថា បើ​ទោះបីជា Neymar និយាយ​កាន់ជើង Man City បែប​នេះ​ក៏​ដោយ​ក៏​រូបគេ​មិន​មានគំនិត​ចង់​មក​លេង​នៅ​ទី​នេះ​ដែរ ៕