រាជធានីភ្នំពេញ ៖ ក្រោយពីលោក នួន ភិរម្យជាស្វាមីបានអះអាងថា នឹងតស៊ូបន្តបើកក្លិបប្រដាល់បើទោះជាមានសភាពត្រដាបត្រដួសបន្តិចក្ដីធ្វើឱ្យមានការកោតសរសើរពីទឹកចិត្តប្រឹងប្រែងលើកស្ទួយវិស័យប្រដាល់របស់អតីតកីឡាករដ៏ល្បីប្រចាំទសវត្សឆ្នាំ១៩៩០ រូបនេះ ។ ប៉ុន្តែក្រោយការអះអាងរបស់លោកបានតែប៉ុន្មានថ្ងៃស្រាប់តែភរិយារបស់លោក គឺអ្នកស្រី…
រាជធានីភ្នំពេញ ៖ ក្រោយពីលោក នួន ភិរម្យជាស្វាមីបានអះអាងថា នឹងតស៊ូបន្តបើកក្លិបប្រដាល់បើទោះជាមានសភាពត្រដាបត្រដួសបន្តិចក្ដីធ្វើឱ្យមានការកោតសរសើរពីទឹកចិត្តប្រឹងប្រែងលើកស្ទួយវិស័យប្រដាល់របស់អតីតកីឡាករដ៏ល្បីប្រចាំទសវត្សឆ្នាំ១៩៩០ រូបនេះ ។
ប៉ុន្តែក្រោយការអះអាងរបស់លោកបានតែប៉ុន្មានថ្ងៃស្រាប់តែភរិយារបស់លោក គឺអ្នកស្រី ឌី ចាន់ថុន ដែលត្រូវគេស្គាល់ថា ជាគណៈកម្មការផ្ដល់ពិន្ទុ និងជាគ្រូបង្វឹកប្រចាំក្លិបប្រដាល់ភិរម្យគុនខ្មែរម្នាក់ដែរ បានប្រាប់វិញថា អ្នកស្រីនឹងឱ្យស្វាមីបិទក្លិបនោះចោលក្នុងពេលដ៏ខ្លីដោយសារតែទប់ការចំណាយលែងរួច ហើយបើនៅតែបន្តនឹងដាច់បាយទាំងគ្រូទាំងសិស្ស បើទោះជាក្លិបមិនបានចំណាយលើការជួលទីតាំង ព្រោះជាផ្ទះផ្ទាល់ខ្លួនក្ដី។
អ្នកស្រី ឌី ចាន់ថុន បន្តថា តាំងពីបើកដំណើរការក្លិបប្រដាល់ភិរម្យគុនខ្មែរមក អ្នកស្រី និងស្វាមី មិនដែលបានលុយបានកាក់យកមកស៊ីចាយឱ្យសប្បាយចិត្តក្នុងនាមជាម្ចាស់ក្លិបម្ដងណាទេ ដោយមានតែបញ្ហាខ្វះមុខខ្វះក្រោយ និងរងសម្ពាធរាប់មិនអស់ក្នុងការរ៉ាប់រងកូនសិស្ស ។
ជាក់ស្ដែង អ្នកស្រីត្រូវខំប្រឹងប្រែងធ្វើការទាំងយប់ទាំងថ្ងៃដោយត្រូវរកលុយមកចិញ្ចឹមសិស្សក្នុងក្លិបយ៉ាងលំបាក ខណៈដែលក្នុងពេលខ្លះ គឺគ្រាន់តែអាណិតសិស្សមកពីខេត្តដែលផ្លាស់ផ្ទះហើយសុំហ្វឹកហាត់មិនបានលុយផង ក៏ត្រូវម្ចាស់ក្លិបផ្សេងទៀតចោទថាលួចសិស្សរបស់គេ និងបានប្ដឹងក្លិបអ្នកស្រីជាដើម ធ្វើឱ្យតែអ្នកស្រីឈឺក្បាល ។ អ្នកស្រីថា បើតាមស្ថានភាពលំបាក គឺត្រូវបិទទ្វារយូរហើយ ប៉ុន្តែមកពីស្វាមីចេះតែអង្វរ និងចិត្តមិនទាន់ដាច់ ទើបចេះតែបើកទ្វារទទួលកូនសិស្ស ដោយមិនហ៊ានទាំងធ្វើការរកស៊ីអ្វីផង ដើម្បីរង់ចាំបង្វឹកសិស្ស មើលខុសត្រូវក្លិប និងត្រូវរ៉ាប់រងក្នុងក្លិបជាដើម ។
មកទល់ពេលនេះ អ្នកស្រីថា បើបន្តបើកគឺមិនខុសពីរកអនាគតមិនឃើញនោះទេដោយសារតែក្លិបរបស់អ្នកស្រី មិនមានអ្នកជួយជ្រោមជ្រែងទាល់តែសោះ ដោយអ្នកស្រី និងស្វាមីត្រូវបង្ខំចិត្តបើកប្រាក់ប្រចាំអាទិត្យពីទូរទស្សន៍បាយ័ន យកមកទិញអង្ករ ទិញម្ហូប មិនខុសពីចិញ្ចឹមកូនចៅច្រើននាក់ក្នុងផ្ទះ ប៉ុន្តែផ្ទុយទៅវិញ កូនសិស្សដែលប្រឹងប្រែងបណ្ដុះនោះ គឺក្រៅពីប៉ុស្ដិ៍បាយ័នមិនមានអ្នកផ្ដល់ឱកាសឱ្យឡើងប្រកួត ដែលអ្នកស្រីប្រៀបធៀបសភាពនេះថា មិនខុសពីចិញ្ចឹមអ្នកអត់ការងារធ្វើឱ្យដេកស៊ី ។
អ្នកស្រីថា កីឡាករដែលបានទទួលការបណ្ដុះបណ្ដាល មានកីឡាករល្អៗច្រើនណាស់ ប៉ុន្តែបណ្ដាលមកពីចេះហើយអត់មានកន្លែងវាយ ទើបកូនសិស្សខ្លះរត់ទៅធ្វើការផ្សេងអស់ ហើយអ្នកនៅត្រាំត្រែងកន្លងមក ក៏សុទ្ធតែអ្នកអត់ការងារធ្វើដែលតម្រូវឱ្យអ្នកស្រីរកលុយមកចិញ្ចឹមទៅវិញ ក្រៅពីខំប្រឹងប្រែងបង្ហាត់មិនយកលុយ ។ អ្វីដែលកាន់តែធ្វើឱ្យអ្នកស្រីត្រូវតែបង្ខំស្វាមីឱ្យបិទក្លិបនេះឱ្យបានឆាប់ក្នុងពេលដ៏ខ្លីនោះ គឺភាពចម្រូងចម្រាសក្នុងការកាច់កុងពីបណ្ដាក្លិបមួយចំនួន ដែលធ្វើឱ្យអ្នកស្រីឈឺក្បាលរាល់ថ្ងៃ។
អ្នកស្រីថា ក្លិបរបស់ខ្លួនចាប់ផ្ដើមបិទទ្វារចាប់ពីការប្រកាសនេះជាបណ្ដើរៗហើយ ដោយមិនបានទទួលកូនសិស្សថ្មីឱ្យស្នាក់នៅ និងហ្វឹកហាត់ទៀតឡើយ គឺបង្វឹកតែកូនសិស្សដែលមានស្រាប់ប៉ុណ្ណោះ ដោយកូនសិស្សខ្លះដែលចេញពីក្លិបរួចហើយ ក៏អត់ទទួលឱ្យស្នាក់នៅជាថ្មី ដើម្បីស្វែងរកលុយកាក់សម្រាប់ទុកដាក់ខ្លួនឯងវិញម្ដង។ អ្នកស្រីថា មនុស្សទូទៅបើកក្លិបបានលុយបានកាក់ ប៉ុន្តែអ្នកស្រីចង់អស់ពីខ្លួនហើយបើមកទទួលរឿងរ៉ាវឈឺក្បាលទៀត តើនៅបន្តទៀតទេ បើប្រឹងធ្វើការ១០ម៉ឺនរៀលអស់២០ម៉ឺនរៀលអស់ ស្ទើរតែរកលទ្ធភាពសម្រាប់ខ្លួនឯងមិនឃើញនោះ ។
ទោះបីយ៉ាងណា អ្នកស្រីនឹងអាចដំណើរការក្លិបវិញ នៅពេលមានការឧបត្ថម្ភ ឬមានអ្នកជ្រោមជ្រែងលុយ ដែលធ្វើឱ្យអ្នកស្រីយល់ថា មិនមានផលវិបាកដូចប៉ុន្មានឆ្នាំចុងក្រោយ។ អ្នកស្រីមិនដឹងថា ក្រោយការសម្រេចចិត្តបិទទ្វារ តើនឹងអាចមានឱកាសបើកវិញឬយ៉ាងណានោះទេ ក្នុងពេលដែលក្លិបដំណើរការច្រើនឆ្នាំមកហើយ ដោយបានទាំងចេញមុខស្នើសុំអង្ករ និងថវិកាដើម្បីឱ្យរស់សម្រាប់សិស្សផងក៏មិនមានការចាប់អារម្មណ៍ផ្ដល់ជំនួយ ស្របពេលដែលអ្នកស្រី និងស្វាមី ក៏កាន់តែចាស់ខ្សោយកម្លាំង មិនអាចរកលុយមកផ្គត់ផ្គង់តម្រូវការប្រចាំក្លិបបាន។
លោក នួន ភិរម្យ បន្តសម្ដីភរិយាថា បើបណ្ដាប៉ុស្ដិ៍ទូរទស្សន៍ផ្ដល់ឱកាសឱ្យកីឡាករថ្មីៗរបស់លោកបានឡើងរេញខ្លះ នោះកីឡាករទាំងនោះនឹងក្លាយជាកីឡាករកាន់តែមានបទពិសោធន៍ និងជើងចាស់បន្តិចម្ដងៗដែលអាចឈរជើងក្នុងពិភពប្រដាល់បានហើយ។ ប៉ុន្តែបណ្ដាលមកពីចេះតែគិតថាក្មេងពេកៗ ហើយអាងថាគ្នាមិនសូវមានបទពិសោធន៍ ទើបកីឡាករថ្មីៗរបស់លោកនៅតែថ្មីធ្វើឱ្យកូនសិស្សរបស់លោកក៏គ្មានការងារឡើងរេញដែរ ក្រោយពេលហាត់ចេះ ។
លោកថា ខ្លួនខាតបង់មិនតិចនោះទេចាប់តាំងពីបានដំណើរការបើកក្លិបប្រដាល់ក្នុងប៉ុន្មានឆ្នាំចុងក្រោយ ជាពិសេសក្នុងពេលដែលត្រូវប្រឹងរកលុយយកមកផ្គត់ផ្គង់ការចំណាយប្រចាំក្លិបរហូតមក ក្នុងពេលកីឡាករដែលមកហ្វឹកហាត់តម្រូវឱ្យលោកផ្គត់ផ្គង់។ លោកបានទាំងហៅទូរទស្សន៍ប៉ុស្ដិ៍បាយ័នថា គឺជាអ្នកនៅពីក្រោយដ៏សំខាន់ដែលអាចឱ្យលោកមានលទ្ធភាពបន្តការប្រដាល់នោះផង ដោយសារតែប៉ុស្ដិ៍នេះបានផ្ដល់ការងារឱ្យលោកទាំងប្ដីទាំងប្រពន្ធ ដែលនាំឱ្យលោក និងភរិយា មានលទ្ធភាពទិញអង្ករ និងម្ហូប មកផ្គត់ផ្គង់ក្នុងក្លិបនៅពេលបើកលុយការងារប្រចាំសប្ដាហ៍ម្ដងៗ។
យ៉ាងណាមិញ លោកថា ខ្លួននឹងរកឱកាសបើកក្លិបជាថ្មី បើបណ្ដាទូរទស្សន៍ផ្ដល់ឱកាសឱ្យក្លិបលោករៀបចំសិស្សឡើងវ៉ៃ ស្របគ្នាលោកមានអ្នកមានទឹកចិត្តណាម្នាក់ចង់ជួយបោះទុនខ្លះៗឱ្យដំណើរការផងដែរ៕
ចែករំលែកព័តមាននេះ