អ្នកវិភាគមាត់ដាចរូបនេះ…នាំកូនស្រីគេចខ្លួនបាត់
- ភ្នំពេញ
រាជធានីភ្នំពេញ ៖ ចៅក្រមស៊ើបសួរសាលាដំបូងរាជធានីភ្នំពេញ លោក លាង សំណាត់ បានចេញដីកា កាលពីថ្ងៃ២៨ ខែសីហា តែសារព័ត៌មានទើបដឹងនៅថ្ងៃ៣…
រាជធានីភ្នំពេញ ៖ ចៅក្រមស៊ើបសួរសាលាដំបូងរាជធានីភ្នំពេញ លោក លាង សំណាត់ បានចេញដីកា កាលពីថ្ងៃ២៨ ខែសីហា តែសារព័ត៌មានទើបដឹងនៅថ្ងៃ៣…
រាជធានីភ្នំពេញ ៖ ចៅក្រមស៊ើបសួរសាលាដំបូងរាជធានីភ្នំពេញ លោក លាង សំណាត់ បានចេញដីកា កាលពីថ្ងៃ២៨ ខែសីហា តែសារព័ត៌មានទើបដឹងនៅថ្ងៃ៣ ខែកញ្ញា ជាការបង្គាប់ឲ្យលោក គឹម សុខ ចូលខ្លួនមកកាន់សាលាដំបូង នៅថ្ងៃទី១៤ ខែកញ្ញាខាងមុខ ដើម្បីសាកសួរពីបទ «បរិហារកេរ្តិ៍ជាសាធារណៈ និងញុះញង់ឱ្យប្រព្រឹត្តបទឧក្រិដ្ឋជាអាទិ៍» ។
ដីកាបង្គាប់ឱ្យចូលខ្លួនរបស់លោកចៅក្រមស៊ើបសួរបាន បង្គាប់មកឈ្មោះ គឹម សុខ ភេទប្រុស អាយុ៣៨ឆ្នាំ កើតថ្ងៃទី១៣ ខែតុលា ឆ្នាំ១៩៨០ ជនជាតិខ្មែរ មានអាសយដ្ឋានបច្ចុប្បន្នស្នាក់នៅផ្ទះជួលក្នុងសង្កាត់វត្តភ្នំ ខណ្ឌដូនពេញ រាជធានីភ្នំពេញ(អាសយដ្ឋានចុងក្រោយ) ឱ្យចូលខ្លួនមកកាន់សាលាដំបូងរាជធានីភ្នំពេញ បន្ទប់«ឈ» ជាន់ទី៤ នៅថ្ងៃទី១៤ ខែកញ្ញា ឆ្នាំ២០១៨ វេលាម៉ោង៨និង៣០នាទីព្រឹក ដើម្បី មកសាកសួរយកចម្លើយពីដំណើររឿងបរិហារកេរ្ដិ៍ជាសាធារណៈ ញុះញង់ឱ្យប្រព្រឹត្តបទឧក្រិដ្ឋជាអាទិ៍ ។
ការចេញដីការបស់លោកចៅក្រមស៊ើបសួរនេះ ខណៈលោក គឹម សុខ អ្នកវិភាគនយោបាយនិងសង្គមដែលទើបរួចទោសពីពន្ធនាគារបានរត់គេចខ្លួនបាត់ទៅហើយ ។ នេះជាការបញ្ជាក់របស់លោកឧត្តមសេនីយ៍ឯក អុី សុខឃី ប្រធាននាយកដ្ឋានប្រឆាំងភេរវកម្មនិងឧក្រិដ្ឋកម្មឆ្លងដែននៃអគ្គស្នងការដ្ឋាននគរបាលជាតិ ដែលត្រូវបានដកស្រង់សម្តីដោយគេហទំព័រក្នុងស្រុកមួយ ។
គេហទំព័រដដែលបន្តថា លោកឧត្តមសេនីយ៍ឯក អុី សុខឃី បានប្រាប់ថា លោក គឹម សុខ ពិតជាបានរត់គេចខ្លួនទៅដល់ប្រទេសថៃហើយ តាមច្រករបៀង ហើយនៅពេលនេះ សមត្ថកិច្ចកម្ពុជាកំពុងសហការជាមួយសមត្ថកិច្ចថៃ ដើម្បីតាមស្វែងរកលោក គឹម សុខ ចាត់ការតាមនីតិវិធី ។
សូមបញ្ជាក់ថា លោក គឹម សុខ ត្រូវបានតុលាការដោះលែងឱ្យមានសេរីភាពវិញ កាលពីព្រឹកថ្ងៃទី១៧ ខែសីហា ឆ្នាំ២០១៨ បន្ទាប់ពីលោកអនុវត្តទោសចប់សព្វគ្រប់ចំនួន១៨ខែ ។លោក គឹម សុខ ត្រូវបានចៅក្រមជំនុំជម្រះសាលាដំបូងរាជធានីភ្នំពេញ លោក គី ប្ញទ្ធី សម្រេចផ្ដន្ទាទោសដាក់ពន្ធនាគារចំនួន១៨ខែ និងពិន័យជាប្រាក់ចំនួន៨លានរៀល រួមនឹងប្រាក់សងជំងឺចិត្តដល់ដើមបណ្តឹង៨០០លានរៀល ក្រោមការចោទប្រកាន់ពីបទញុះញង់ឱ្យមានបទឧក្រិដ្ឋជាអាទិ៍ កាលពីថ្ងៃ១០ ខែសីហា ឆ្នាំ២០១៧កន្លងមក ។
ការផ្តន្ទាទោសនេះ ធ្វើឡើងតាមបណ្តឹងរបស់គណបក្សប្រជាជនកម្ពុជា បន្ទាប់ពីលោក គឹមសុខ បានចោទថាគណបក្សប្រជាជនកម្ពុជានៅពីក្រោយឃាតកម្មលើលោក កែម ឡី ។កាលពីថ្ងៃទី២៩ ខែសីហា ខែកន្លងទៅថ្មីៗនេះ ប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន បានព្រមានខ្លាំងៗថានឹងប្ដឹងអ្នកវិភាគសង្គម លោក គឹម សុខ ដាក់ពន្ធនាគារវិញ ប្រសិនបើមិនសងប្រាក់ចំនួន៨០០លានរៀល ស្មើនឹងប្រមាណ២០ម៉ឺនដុល្លារ មកឱ្យគណបក្សប្រជាជនកម្ពុជាទេនោះ ។
មុននេះ មានសេចក្តីរាយការណ៍ថា លោកគឹម សុខ និងកូនស្រីអាយុ៦ឆ្នាំ បានភៀសខ្លួនទៅក្រៅប្រទេសកាលពីថ្ងៃទី៣០ ខែសីហា ។ ការភៀសខ្លួនរបស់អ្នកអធិប្បាយមាត់ដាចរូបនេះគឺកើតឡើងតែមួយថ្ងៃប៉ុណ្ណោះ ក្រោយពេលសម្តេចតេជោ ហ៊ុន សែន ព្រមានចាប់ខ្លួនវិញ ប្រសិនបើអ្នកវិភាគរូបនេះ មិនមានលុយសងជំងឺចិត្តក្នុងសំណុំរឿងបរិហារកេរ្តិ៍ ។ លោក ជួង ជូងី ដែលធ្លាប់ការពារក្តីឱ្យលោក គឹម សុខ បានបញ្ជាក់ថា លោកមិនដឹងថាអតីតកូនក្តីរបស់លោកបានភៀសខ្លួនទៅដល់ទីណានោះទេ ។ ប៉ុន្តែលោកមេធាវីរូបនេះគ្រាន់តែដឹងថា លោកបានឃើញព័ត៌មានមួយចំនួនរាយការណ៍ថា លោក គឹម សុខ បានភៀសខ្លួនទៅក្រៅប្រទេសហើយ ។
តាមកាសែតអនឡាញមួយបានរាយការណ៍ថា លោក គឹម សុខ និងកូនស្រីរបស់គាត់បានភៀសខ្លួនដល់កន្លែងមានសុវត្ថិភាពហើយ កាលពីថ្ងៃទី៣០ ខែសីហា ។មុននេះផងដែរ តាមការផ្សាយរបស់វិទ្យុបារាំងអន្តរជាតិ លោក គឹម សុខ បានឆ្លើយតបទៅនឹងការទារសំណង៨០០លានរៀលនោះថា ប្រសិនបើលោកមានលុយប៉ុនណេះនៅក្នុងដៃ លោកនឹងជួយអ្នកក្រលំបាក និងកុមារកំព្រា ។
ដូច្នេះ ពុំមានហេតុផលអ្វីដែលលោកត្រូវខំរកលុយមកសងជំងឺចិត្តក្នុងសំណុំរឿងមួយដែលលោកយល់ថា ជាការកាត់សេចក្ដីដោយអយុត្តិធម៌នោះឡើយ ។អ្នកតាមដាននិយាយថា ភ្លើងបានចាប់ផ្តើមឆេះសាជាថ្មីជុំវិញករណីលោក គឹម សុខ នេះមកពីលោកនៅតែនិយាយមិនសំចៃមាត់តាមរយៈបណ្តាញផ្សព្វផ្សាយដូចជា ការហៅក្រុមប្រឹក្សាពិគ្រោះ និងផ្តល់យោបល់ដែលជាការផ្តួចផ្តើមដោយសម្តេចតេជោ ហ៊ុន សែន ក្នុងនាមជានាយករដ្ឋមន្ត្រីអាណត្តិទី៦ ក្នុងការប្រមូលគណបក្សដែលចូលរួមបោះឆ្នោត តែមិនបានទទួលអាសនៈណាមួយនៅក្នុងសភា ត្រូវបានលោក គឹម សុខ ហៅក្រុមនេះថាក្រុម«គោក្រោល»និងក្រោយមកកែថា«ក្រុមកូនក្រោល»។
ចំណុចមួយទៀត បានហៅនយោបាយសន្តោសប្រណីក្នុងការលើកលែងទោសទ្រង់ទ្រាយធំមួយឈុតកាលពីចុងខែសីហា កន្លងទៅលោក គឹម សុខ បានហៅកាយវិការនេះថាជា«នីតិមាត់»មិនមែន«នីតិរដ្ឋ»ទេ ។ ពាក្យសម្តីទាំងនេះត្រូវបានគេមើលឃើញថា ជាការបញ្ឆេះមួួយឱ្យមានកំហឹង ដោយសារតែការខិតខំធ្វើឱ្យមានការធូរស្រាលពីសភាពការណ៍នយោបាយ ក្រោយការបោះឆ្នោតនិងការបង្កើតរាជរដ្ឋាភិបាលថ្មី ៕
ចែករំលែកព័តមាននេះ