រាជធានីភ្នំពេញ ៖ ខណៈពេលដែលជនសង្ស័យចេញទៅក្រៅប្រទេសបាត់ចៅក្រមស៊ើបសួរលោក លាង សំណាក់ នៃសាលាដំរាជធានីភ្នំពេញកាលពីថ្ងៃទី២៨ ខែសីហា ឆ្នាំ២០១៨ បានដេញដីកាកោះឲ្យលោក គឹម សុខ អាយុ៣៨ឆ្នាំ អ្នកវិភាគនយោបាយ និងសង្គមកម្ពុជាឲ្យចូលបំភ្លឺដំណើររឿងបទបរិហាកេរ្តិ៍សាធារណៈ និងបទញុះញ៉ង់ក្នុងសំណុំរឿងព្រហ្មទណ្ឌលេខ១១២៥ ចុះថ្ងៃទី២៨ ខែសីហា ឆ្នាំ២០១៨ ។
យោងតាមបង្គាប់បានលើកឡើងថា បើកការស៊ើបសង្កេតលើឈ្មោះ គឹម សុខ កើតនៅថ្ងៃទី១៣ ខែតុលា ឆ្នាំ១៩៨០ ត្រូវបានចោទពីបទបរិហាកេរ្តិ៍សាធារណៈ ញុះញ៉ង់ ឲ្យប្រព្រឹត្តបទល្មើសជាអាទិ៍កាលពីថ្ងៃទី១៣ ខែកុម្ភៈ ឆ្នាំ២០១៧ តាមបញ្ញត្តិ មាត្រា៣០៥ មាត្រា៤៩៤ និងមាត្រា៤៩៥ នៃក្រមព្រហ្មទណ្ឌ ។
លោកចៅក្រមបានបញ្ជាក់ថា «បង្កាប់មកឈ្មោះ គឹម សុខ ភេទប្រុស អាយុ៣៨ឆ្នាំ កើតថ្ងៃទី១៣ ខែតុលា ឆ្នាំ១៩៨០ ជនជាតិខ្មែរ មានអាស័យដ្ឋានបច្ចុប្បន្នស្នាក់នៅផ្ទះជួល សង្កាត់វត្តភ្នំ ខណ្ឌដូនពេញ រាជធានីភ្នំពេញ ចូលតុលាការនៅថ្ងៃទី១៤ ខែកញ្ញា ២០១៨ វេលាម៉ោង៨និង៣០នាទីព្រឹក ដើម្បីមកសាកសួរយកចម្លើយពីដំណើររឿងបទបរិហាកេរ្តិ៍ជាសាធាណៈ និងបទញុះញ៉ង់ឲ្យប្រព្រឹត្តបទល្មើសជាអាទិ៍» ។ លោក គឹម សុខ ទើបត្រូវបានដោះលែងកាលពីពេលថ្មីៗនេះបន្ទាប់ពីជាប់គុកជាង២ឆ្នាំករណីបរិហាកេរ្តិ៍ជាសាធារណៈលើគណបក្សកាន់អំណាច ។
ស្របពេលជាមួយគ្នានេះផងដែរចៅក្រមក៏បានកោះហៅលោក ជួង ជូងឺ មេធាវីការពារក្តីឲ្យលោក គឹម សុខ ចូលរួមស្តាប់ការសួរចម្លើយលោក គឹម សុខ នៅវេលាម៉ោង៨និង៣០ព្រឹក នៅសាលាដំបូងរាជធានីភ្នំពេញថ្ងៃទី១៤ ខែកញ្ញា ឆ្នាំ២០១៨ បន្ទប់ឈ ជាន់ទី៤ ។ ទាំងមេធាវី និងជនសង្ស័យត្រូវយកមកនូវឯកសារនានាដែលទាក់ទងនឹងរឿងនេះ និងមកកាន់តុលាការឲ្យទាន់ពេលវេលា ៕
ចែករំលែកព័តមាននេះ