កំពុងដេកជាមួយប្រពន្ធ ស្រាប់តែរត់ចេញពីបន្ទប់ហៅអ្នកជិតខាង…

ថ្ងៃទី ០២ ខែ កញ្ញា ឆ្នាំ ២០១៨

ម៉ោង ១២:១៨

រាជធានីភ្នំពេញ ៖ បុរសម្នាក់សង្ស័យខ្យល់គបានប្រកាច់ស្លាប់ ខណៈកំពុងដេកក្នុងបន្ទប់ជួលជាមួយប្រពន្ធ ហេតុការណ៍នេះបង្កឲ្យមានការភ្ញាក់ផ្អើលទាំងយប់កាលពីម៉ោង១១និង៤០នាទីយប់ ថ្ងៃទី០១ ខែកញ្ញា ឆ្នាំ២០១៨ នៅចំណុចបន្ទប់ជួលលេខ១៦ ជាន់ទី១ ស្ថិតក្នុងភូមិចោមចៅ២ សង្កាត់ចោមចៅ២ ខណ្ឌពោធិ៍សែនជ័យ។

ជនរងគ្រោះខាងលើឈ្មោះ គង់ ប៊ុនហាក់ អាយុ២៤ឆ្នាំ មុខរបរកម្មករសំណង ស្នាក់នៅបន្ទប់ជួលលេខ១៦ ជាន់ទី១ ភូមិចោមចៅ២ សង្កាត់ចោមចៅ២ ខណ្ឌពោធិ៍សែនជ័យ មានស្រុកកំណើតភូមិព្រែកចារ ឃុំសំបួរ ស្រុកល្វាឯម ខេត្តកណ្តាល ចំណែកប្រពន្ធឈ្មោះ វន ជាតា អាយុ២២ឆ្នាំ មុខរបរកម្មការនីរោងចក្រ។

ប្រភពពីស្ត្រីជាប្រពន្ធប្រាប់ឲ្យដឹងថា មុនកើតហេតុក្រោយពីបាយរួចក៏ចូលដេកធម្មតា លុះដល់ម៉ោងខាងលើស្រាប់តែឃើញប្តីគាត់ប្រកាច់ ពេលនោះស្មានតែគាត់ដេកមមើលក៏អង្រួនឱ្យភ្ញាក់ ប៉ុន្តែបែរជាប្រកាច់ខ្លាំងឡើងៗគាត់រត់ចេញពីបន្ទប់ជួលហៅអ្នកជិតខាងឱ្យជួយ និងហៅគ្រូពេទ្យមកពិនិត្យ ប៉ុន្តែគ្រូពេទ្យមកដល់ប្រាប់ថា ប្តីគាត់ដាច់ខ្យល់ស្លាប់បាត់ទៅហើយ ។ ក្រោយមកក៏រាយការណ៍ជូនសមត្ថកិច្ច្ថកិច្ចមូលដ្ឋានចុះមកពិនិត្យ។

បន្ទាប់ពីទទួលបានព័ត៌មានថាមានមនុស្សដេកស្លាប់ភ្លាម កម្លាំងប៉ុស្តិ៍នគរបាលរដ្ឋបាលចោមចៅ២បានចុះទៅដល់កន្លែងកើតហេតុ ហើយក៏រាយការណ៍បន្តជូននគរបាលជំនាញចុះមកពិនិត្យសពបុរសខាងលើនេះ ក្រោយពិនិត្យសពរួចរាល់សមត្ថកិច្ចឲ្យដឹងថា សពបុរសរងគ្រោះពិតជាស្លាប់ដោយខ្យល់គរ (គាំងបេះដូង) ពិតប្រាកដមែន ពុំមានជាប់ពាក់ព័ន្ធនឹងករណីឃាតកម្មអ្វីនោះទេ។ ក្រោយមកសមត្ថកិច្ចបានប្រគល់សពទៅឲ្យក្រុមគ្រួសារយកទៅធ្វើបុណ្យតាមប្រពៃណីនៅឯស្រុកកំណើត ៕