រាជធានីភ្នំពេញ ៖ ក្នងជំនួបសំដែងការគួរសមជាមួយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នារសៀលថ្ងៃទី២៩ ខែសីហា ឆ្នាំ២០១៨ នៅទីស្តីការនាយករដ្ឋមន្ត្រីវិមានសន្តិភាព…
រាជធានីភ្នំពេញ ៖ ក្នងជំនួបសំដែងការគួរសមជាមួយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នារសៀលថ្ងៃទី២៩ ខែសីហា ឆ្នាំ២០១៨ នៅទីស្តីការនាយករដ្ឋមន្ត្រីវិមានសន្តិភាព លោកជំទាវ Sushma Swaraj រដ្ឋមន្ត្រីការបរទេសសាធារណៈរដ្ឋឥណ្ឌាបានសំដែងនូវការអបអរសាទរ ចំពោះលទ្ធផលបោះឆ្នោតរបស់កម្ពុជា កាលពីពេលកន្លងមក ។
លោកជំទាវរដ្ឋមន្ត្រីមានប្រសាសន៍បន្តថា ឥណ្ឌាបានបញ្ជូនអ្នកសង្កេតការណ៍ជាច្រើននាក់មកកាន់កម្ពុជា ហើយបានឃើញនូវដំណើរការបោះឆ្នោតមួយដែលមានភាព សេរី យុត្តិធម៌ គ្មានអំពើហិង្សា ។ លោកជំទាវបានសង្កេតឃើញផងដែរថា កម្ពុជាមានការអភិវឌ្ឍរីកចម្រើនយ៉ាងឆាប់រហ័សទាំងផ្នែកទន់ និងផ្នែករឹង ពិសេសទទួលបានជោគជ័យជាស្ថាពរក្នុងការសម្រេចគោលដៅរយៈពេលដ៏ខ្លីបំផុត ។ លទ្ធផលទាំងនេះ គឺឆ្លុះបញ្ចាំងពីជំនឿទុកចិត្ត និងលទ្ធផលនៃការបោះឆ្នោតរបស់ប្រជាជនក្នុងការបោះឆ្នោត ជូនគណបក្សប្រជាជនកម្ពុជា ។ លោកជំទាវក៏បានជម្រាបជូនសម្តេចអំពីកិច្ចពិភាក្សាជាមួយនឹងលោកប្រាក់ សុខុន ទេសរដ្ឋមន្ត្រី និងជារដ្ឋមន្ត្រីក្រសួងការបរទេស និងកិច្ចសហប្រតិបត្តិការអន្តរជាតិអំពីគម្រោងនៃការហោះហើរត្រង់ពីឥណ្ឌាមកកាន់កម្ពុជានូវគម្រោងទទួលផលឆាប់រហ័សផងដែរ ។
ជាការឆ្លើយតបសម្តេចតេជោនាយករដ្ឋមន្ត្រីបានថ្លែងអំណរគុណជូនចំពោះលោកជំទាវដែលបានអបអរសាទរលទ្ធផលនៃការបោះឆ្នោតនៅកម្ពុជា និងបានជម្រាបជូនដោយសង្ខេបពីដំណើរការបោះឆ្នោត និងប្រវត្តិនៃការបោះឆ្នោតនៅកម្ពុជា ។ សម្តេចក៏បានថ្លែងអំណរគុណជូនចំពោះរដ្ឋាភិបាលឥណ្ឌាដែលតែងតែជួយដល់កម្ពុជាកន្លងមក តាមរយៈការផ្តល់ជំនួយនានាពិសេសពេលដែលកម្ពុជាទើបតែរំដោះពីរបបប្រល័យពូជសាសន៍ប៉ុលពត ។ ប្រទេសឥណ្ឌា គឺជាប្រទេសកាន់លទ្ធិប្រជាធិបតេយ្យមួយដែលទទួលស្គាល់កម្ពុជាដំបូងគេបង្អស់ ។ សម្តេតេជោបានសំដែងនូវការស្វាគមន៍ចំពោះកិច្ចពិភាក្សារបស់លោកជំទាវ និងលោកទេសរដ្ឋមន្ត្រីការបរទេសកម្ពុជាអំពីការហោះហើរត្រង់ និងគម្រោងទទួលផលរហ័ស ។
សម្តេចបានមានប្រសាសន៍ថា គម្រោងទទួលផលរហ័សនេះ គឺជួយដោះស្រាយត្រង់ដល់ប្រជាពលរដ្ឋកម្ពុជាតែម្តង ជាពិសេសដែលកម្ពុជាកំពុងមានគ្រោះទឹកជំនន់ នាពេលបច្ចុប្បន្ននេះគម្រោងនេះអាចជួយស្តារអណ្តូងទឹកផ្តល់គ្រាប់ពូជ ជួសជុលសាលារៀន មន្ទីរពេទ្យជាដើម ដែលបានទទួលរងគ្រោះទឹកជំនន់នោះ ៕
ចែករំលែកព័តមាននេះ