រាជធានីភ្នំពេញ ៖ អតីតអ្នកតំណាងរាស្ត្រ និងសកម្មជនអតីតគណបក្សសង្គ្រោះជាតិជាច្រើនរូប បានថា ពួកគាត់ត្រូវបានសមត្ថកិច្ចមិនអនុញ្ញាតឲ្យចូលក្នុងបរិវេណពន្ធនាគារត្រពាំងផ្លុងនោះទេ កាលពីព្រឹកថ្ងៃទី៣០ សីហា ម្សិលមិញ ។…
រាជធានីភ្នំពេញ ៖ អតីតអ្នកតំណាងរាស្ត្រ និងសកម្មជនអតីតគណបក្សសង្គ្រោះជាតិជាច្រើនរូប បានថា ពួកគាត់ត្រូវបានសមត្ថកិច្ចមិនអនុញ្ញាតឲ្យចូលក្នុងបរិវេណពន្ធនាគារត្រពាំងផ្លុងនោះទេ កាលពីព្រឹកថ្ងៃទី៣០ សីហា ម្សិលមិញ ។
នេះបើមានមន្ត្រីដែលស្និទនឹងលោក អ៊ូ ច័ន្ទរ័ត្ន អតីតតំណាងរាស្ត្ររបស់ CNRP ។ ការមិនអនុញ្ញាតឲ្យអតីតអ្នកតំណាងរាស្ត្រ និងសកម្មជនអតីតគណបក្សសង្គ្រោះជាតិខណៈដែលចៅក្រមស៊ើបសួរកសាលាដំបូងរាជធានីភ្នំពេញកំពុងបន្តនីតិវិធីសួរចម្លើយលោក កឹម សុខា អតីតប្រធានគណបក្សសង្គ្រោះជាតិ ។ ប្រភពពីពន្ធនាគារត្រពាំងផ្លុងបានឲ្យដឹងថា មូលហេតុសមត្ថកិច្ចមិនអនុញ្ញាតឲ្យអតីតអ្នកតំណាងរាស្ត្រ និងសកម្មជនអតីត CNRP ចូលក្នុងបរិវេណពន្ធនាគារគឺ «ដើម្បីរក្សាសន្តិសុខ សណ្តាប់ធ្នាប់» ពោល គឺគោរពតាមបញ្ជាររបស់ប្រមុខរាជរដ្ឋាភិបាលដែលបានស្នើដល់សមត្ថកិច្ច កាលពីថ្ងៃទី២៩ សីហាកន្លងមកនេះ ។
យ៉ាងណាក្តីការមិនអនុញ្ញាតឲ្យចូលរួមនេះក៏ត្រូវបានប្រភពពីមន្ត្រីអតីតបក្សប្រឆាំងអះអាងមានរិតត្បិតយ៉ាងខ្លាំង សូម្បីតែពលរដ្ឋដែលធ្លាប់ធ្វើដំណើរទៅវិញទៅមកក៏មានឆែកឆេរផងដែរ ។ ពិសេសនោះអ្នកដែលមិនស្គាល់ ឬមិនដែលឃើញពីមុនមក គឺមិនអនុញ្ញាតឲ្យចូលក្នុង បរិវេណពន្ធនាគារនោះទេ លើសពីនេះទៅទៀតអ្នកសារព័ត៌មានដែលរង់ចាំផ្តិតរូបក៏មិនបានអនុញ្ញាតឲ្យចូលរួមផងដែរ ។ បើតាមការអះអាងពីប្រភពដដែលក៏បានឲ្យដឹងថា មេធាវីការពាក្តីលោក កឹម សុខា ក៏ត្រូវបានសមត្ថកិច្ចឃាត់សួរនាំ និងឆែកកាត់ផងដែរ មុននឹងអនុញ្ញាតឲ្យចូល ។
សូមជម្រាបនៅព្រឹកថ្ងៃទី៣០ ខែសីហា ឆ្នាំ២០១៨នេះ ចៅក្រមស៊ើបសួរសាលាដំបូងរាជធានីភ្នំពេញនឹងបន្តនីតិវិធីសួរចម្លើយលោកកឹម សុខា អតីតប្រធាននៃអតីតគណបក្សសង្គ្រោះជាតិ ម្តងទៀត ក្នុងនីតិវិធីស្តីពីការពន្យារពេលឃុំខ្លួនបណ្ដោះអាសន្ន ។ យោងតាមលិខិតអញ្ជើញមេធាវីទើបទទួលបានបង្ហាញថា លោក គី ឫទ្ធី ចៅក្រមស៊ើបសួរសាលាដំបូងរាជធានីភ្នំពេញ នៅព្រឹកថ្ងៃទី៣០ ខែសីហា នឹងបន្តនីតិវិធីស្តីពីការឃុំខ្លួនបណ្ដោះអាសន្នដែលធ្វើឡើងនៅមណ្ឌលអប់រំកែប្រែទី៣ នៃខេត្តត្បូងឃ្មុំជាទីដែលលោក កឹម សុខា កំពុងជាប់ឃុំ ។
សូមបញ្ជាក់ថា ក្រោយបញ្ចប់ការសួរដេញដោលតុលាការកំពូលនៅវេលាថ្ងៃត្រង់ទី៣០ ខែសីហា កន្លងមកតុលាការកំពូលសម្រេចមិនដោះលែងលោក កឹម សុខា អតីតប្រធាននៃអតីតគណបក្សសង្គ្រោះជាតិទេ ដោយបន្តឃុំខ្លួនក្នុងពន្ធនាគារដដែល ។ នេះបើតាមការបញ្ជាក់របស់លោក អ៊ុក គឹមសិទ្ធិ អគ្គព្រះរាជអាជ្ញារងនៃមហាអយ្យការអមតុលាការកំពូល និងជាអ្នកនាំពាក្យផងដែរ ។
លោកកឹម សុខា ត្រូវបានចោទប្រកាន់ពីបទសន្ធិដ្ឋិភាពជាមួយបរទេសតាមមាត្រា៤៤៣នៃក្រមព្រហ្មទណ្ឌ ។ បទសន្ធិដ្ឋិភាពជាមួយបរទេស គឺជាអំពើត្រូវរ៉ូវគ្នាដោយសម្ងាត់ជាមួយរដ្ឋបរទេស ឬភ្នាក់ងារបរទេស ដើម្បីបង្កើតឱ្យមានអំពើប្រទូស្តរ៉ាយ ឬឱ្យមានអំពើឈ្លានពានប្រឆាំងនឹងព្រះរាជាណាចក្រកម្ពុជា ។ បទល្មើសនេះត្រូវជាប់ពន្ធនាគារពី១៥ឆ្នាំដល់៣០ឆ្នាំ៕
ចែករំលែកព័តមាននេះ