ស្នងការខេត្តព្រះសីហនុ ប្រតិកម្មអំពីហ្វេសប៊ុកម្ចាស់ឈ្មោះ ចំរើន ច័ន្ទលីដា
- ព្រះសីហនុ
ខេត្តព្រះសីហនុ ៖ នារសៀលថ្ងៃទី២៩ សីហា នេះ លោកឧត្តមសេនីយ៍ទោ ជួន ណារិន្ទ ស្នងការនគរបាល ខេត្តព្រះសីហនុ…
ខេត្តព្រះសីហនុ ៖ នារសៀលថ្ងៃទី២៩ សីហា នេះ លោកឧត្តមសេនីយ៍ទោ ជួន ណារិន្ទ ស្នងការនគរបាល ខេត្តព្រះសីហនុ បានមានប្រតិកម្មជុំវិញទៅលើព័ត៌មានដែលថា កន្លងមកមានព័ត៌មានត្រូវបានគេបង្ហោះតាមបណ្តាញទំនាក់ទំនងសង្គមហ្វេសប៊ុក ដែលម្ចាស់ឈ្មោះ ចំរើន ច័ន្ទលីដា បានរៀបរាប់ថា តូបរបស់គាត់ត្រូវចោរគាស់១ខែ២ដង សរុប១ឆ្នាំ គាស់ជិត១០ដង មានភស្តុតាងក៏នៅមិនខ្ចីធ្វើការឲ្យខ្ញុំហត់នឹងប្តឹងជាងហត់ជួសជុលទៅទៀត មានតែទ្រាំរហូតបិទទ្វារចោល ព្រោះអស់ជំនឿ..។ល។
លោកស្នងការនគរបាលខេត្តបានបញ្ជាក់ទៀតថា សារខាងលើនេះ ជាការមាក់ងាយមកលើកងកម្លាំងនគរបាលខេត្តព្រះសីហនុ ដែលថ្នាក់ដឹកនាំ នៃគណៈស្នងការក៏ដូចមន្ត្រីថ្នាក់ក្រោមមិនអាចទទួលយកបាន។ យោងតាមរបាយការណ៍ថ្នាក់មូលដ្ឋាន លោកអនុសេនីយ៍ឯក សំ ប្រាក់ នាយនគរបាលប៉ុស្តិ៍រដ្ឋបាលសង្កាត់លេខ៤ បានឲ្យដឹងថា កន្លងមកនគរបាលប៉ុស្តិ៍រដ្ឋបាលសង្កាត់លេខ៤ ក្រុងព្រះសីហនុ បានទទួលពាក្យបណ្ដឹងរាយការណ៍ អំពីបញ្ហាចោរគាស់តូបរបស់អ្នកស្រី ចំរើន ច័ន្ទលីដា ចំនួន៣លើក ។
ពេលសមត្ថកិច្ចទទួលបានពាក្យបណ្តឹង ហើយរាយការណ៍មកលោក ក្នុងនាមលោកជាស្នងការនគរបាលខេត្ត មិនដែលបានព្រងើយកន្តើយរាល់ពាក្យបណ្តឹងរបស់ប្រជាពលរដ្ឋនោះទេ ហើយតែងតែបញ្ជាកម្លាំងឲ្យចុះធ្វើការស្រាវជ្រាវ និងបង្ក្រាប។ ជាក់ស្តែងដូចករណីដែលថាចោរគាស់តូបឈ្មោះ ចំរើន ច័ន្ទលីដា សមត្ថកិច្ចមូលដ្ឋានយើង បង្ក្រាបបានចំនួន២លើករួចមកហើយ ដែលលើកទី១ ចាប់ក្មេងៗចំនួន២នាក់ និងលើកទី២ ចាប់បានក្មេង៥នាក់ និងបានកសាងសំណុំរឿងបញ្ជូនទៅកាន់សាលាដំបូងខេត្តតាមនីតិវិធី។
ប៉ុន្តែក្រុមក្មេងទាំងនោះជាអនីតិជនមិនទាន់គ្រប់អាយុដែលត្រូវទទួលទោស បានជាស្ថាប័នអយ្យការអមសាលាដំបូងខេត្ត បានធ្វើការអប់រំ ហើយដោះលែងឲ្យវិលត្រឡប់ទៅវិញ។ នៅរសៀលថ្ងៃទី២៩ សីហា ២០១៨នេះ លោកអនុសេនីយ៍ឯក សំ ប្រាក់ នាយនគរបាលប៉ុស្តិ៍រដ្ឋបាលសង្កាត់លេខ៤ បាននាំភ្នាក់ងារសារព័ត៌មាននគរបាលជាតិ ទៅពិនិត្យមើលទីតាំងផ្ទះលក់ថ្នាំពេទ្យនោះ ផ្ទាល់តែម្តងនៅខាងត្បូងជាប់រង្វង់មូលតោពីរ។ ឱសថស្ថាននោះនៅបើកអាជីវកម្មលក់ដូរធម្មតា ជាប្រភេទផ្សារម៉ាត តូចមួយ មានលក់ឱសថ និងរបស់ផ្សេងៗទៀត ប៉ុន្តែម្ចាស់បានសាងសង់បន្ថែមតូបនៅជ្រុងខាងលិចមួយទៀត រាងដូចទូរកុងតឺន័រ បានលយចូលមកចញ្ចើមផ្លូវសាធារណៈខុសប្រក្រតី។
លោក សំ ប្រាក់ នាយប៉ុស្តិ៍នគរបាលរដ្ឋបាលសង្កាត់លេខ៤ បានបញ្ជាក់ទៀតថា កន្លងមកអាជ្ញាធរក្រុង.ខេត្ត បានទៅហាមឃាត់ណែនាំគាត់ឲ្យរុះរើតូបលក់ដូរនោះចេញតែគាត់មិនស្តាប់ឡើយ ម្យ៉ាងទៀតមនុស្សក្នុងហាងនោះមិនចង់និយាយស្តីរកសមត្ថកិច្ចយើងទៀត ។ តាំងពីអាជ្ញាធរណែនាំឲ្យគាត់រុះរើតូបនោះមក គាត់មិនសប្បាយចិត្តនឹងអាជ្ញាធរ ឬសមត្ថកិច្ចឡើយ។ លោក សំ ប្រាក់ បន្ថែមថា ឱសថស្ថានរបស់អ្នកស្រី ចំរើន ច័ន្ទលីដា មានទំនិញមានតម្លៃជាច្រើនមុខ តែយប់ឡើងបិទទ្វារចាក់សោគ្មានអ្នកដេកចាំ ឬគ្មានសន្តិសុខយាមការពារទេ។
ម្យ៉ាងទៀតតូបដែលគាត់សង់លយចូលមកចិញ្ចើមផ្លូវនោះ ជាហេតុនាំឲ្យមានឱកាសដល់ជនទុច្ចរិត ឬពួកក្មេងតាមចិញ្ចើមថ្នល់ លបឡើងទៅដេកនៅលើដំបូលតូប ពេលយប់អធ្រាត្រស្ងាត់នោះជាឱកាសមួយដែលចោរ ឬក្រុមក្មេងដើរធ្វើចោរឆ្លៀតពេលគាស់ដំបូលលូនចូលលួចយកសម្ភារ។ ជុំវិញព័ត៌មានដែលអ្នកស្រី ចំរើន ច័ន្ទលីដា បង្ហោះសារបន្តុះបង្អាប់ដល់កងកម្លាំងនគរបាលជាតិខេត្តព្រះសី ហនុ ដែលអះអាងថាសមត្ថកិច្ចមិនអើពើ និងមិនយកចិត្តទុកដាក់លើការចាត់វិធានការតាមពាក្យបណ្តឹងរបស់គាត់នោះ គឺជារឿងមិនពិតសោះឡើយ។
ហេតុដូច្នេះក្នុងនាមរូបលោកជាស្នងការនគរបាលខេត្តព្រះសីហនុ សូមធ្វើការបដិសេធទាំងស្រុងចំពោះព័ត៌មាននេះ។ លោកស្នងការបន្តថា សព្វថ្ងៃកងកម្លាំងនគរបាលខេត្តព្រះសីហនុគ្រប់មុខជំនាញ ក្រោមការដឹកនាំរបស់លោកផ្ទាល់ បាននឹងកំពុងបំពេញការងារយ៉ាងសស្រាក់សស្រាំបំផុត ដែលប្រជាពលរដ្ឋទូទៅក្នុងខេត្តមើលឃើញ និងគាំទ្រសកម្មភាពនេះជានិច្ច៕
ចែករំលែកព័តមាននេះ