ប្រទេសហ្វ៊ីលីពីន ៖ បើតាមប៉ូលិស និងកងទ័ពបានរាយការណ៍ឱ្យដឹងថា ការផ្ទុះគ្រាប់បែកច្នៃមួយគ្រាប់លាក់នៅនឹងម៉ូតូ បណ្ដាលឲ្យមនុស្សស្លាប់២នាក់ ក្នុងនោះមានកុមារម្នាក់ ហើយមនុស្ស៣៧នាក់ទៀតរងរបួស កាលពីថ្ងៃទី២៨ សីហា នាឱកាសនៃបុណ្យមួយក្នុងទីក្រុងអ៊ីស៊ូឡា ខេត្តស៊ុលតង់គូដារ៉ាត ស្ថិតនៅភាគខាងត្បូងហ្វ៊ីលីពីន។
ប៉ូលិសបានបញ្ជាក់ទៀតថា ការវាយប្រហារនេះ ពុំទាន់មានក្រុមណាប្រកាសទទួលខុសត្រូវនៅឡើយ រួចការស៊ើបអង្កេតមួយបានបើកធ្វើ។ នៅខេត្តស៊ុលតង់គូដារ៉ាត ស្ថិតលើកោះមីនដាណាវ ជាតំបន់ដែលច្បាប់អាជ្ញាសឹកនៅជាធរមាន ដោយប្រធានាធិបតីលោកRODRIGO DUTERTE យល់ថា កោះនេះជាប្រភពនៃការបង្កចលាចល និងអំពើហិង្សា ប្រព្រឹត្តដោយពួកឧទ្ទាមអ៊ិស្លាមនិយម និងកុំមុយនីស្ត។
រីឯអ្នកនាំពាក្យយោធាម្នាក់ក៏បាននិយាយឱ្យដឹងដែរថា ក្រុមមួយដែលផ្សាភ្ជាប់ខ្លួនទៅនឹងក្រុមរដ្ឋអ៊ិស្លាម សង្ស័យជាប្រភពនៃការវាយប្រហារដោយគ្រាប់បែកនេះ៕
ចែករំលែកព័តមាននេះ