សហរដ្ឋអាមេរិក ៖ រងការរិះគន់ពីគ្រប់ទិសទី ពីការនៅស្ងៀមស្ងាត់ឈឹងរបស់លោកក្រោយមរណភាពរបស់លោកចន ម៉ាក់កេន ទីបំផុតលោកដូណាល់ ត្រាំ នាថ្ងៃទី២៧ សីហា សុខចិត្តគោរពវិញ្ញាណក្ខន្ធរបស់អ្នកនយោបាយរូបនេះ ដែលប្រឆាំង និងមាក់ងាយរូបលោក ជាមួយការបញ្ជាឲ្យហូតទង់ជាតិពាក់កណ្ដាលដងនៅទូទាំងប្រទេស។
បន្ទាប់ពីបដិសេធមិនឆ្លើយតបសំនួរស្ដីពីលោកចន ម៉ាក់កេន ដែលក្នុងផ្ទៃគណបក្សសាធារណរដ្ឋជាអ្នករិះគន់លោកដោយចំហ លោកត្រាំបានចេញសេចក្តីប្រកាសមួយដែលគោរពដល់ទឹកចិត្តប្ដូរផ្ដាច់របស់ព្រឹទ្ធសមាជិករូបនេះបម្រើប្រទេសជាតិ។
នាឱកាសនោះលោកត្រាំប្រកាសថា ទង់ជាតិអាមេរិកបង្ហូតពាក់កណ្ដាលដងនៅសេតវិមាន រហូតដល់ពេលបញ្ចុះសពលោកម៉ាក់ កេនរួចរាល់។ លោកម៉ាក់កេនរយៈពេលជាង៣៥ឆ្នាំស្ថិតក្នុងសភាហើយធ្លាប់ជាបេក្ខជនប្រធានាធិបតីអាមេរិក។
លោកត្រាំថ្លែងថាទោះយើងមានទំនាស់នយោបាយជាមួយគ្នា ខ្ញុំសូមគោរពការតាំងចិត្តម៉ឺងម៉ាត់របស់ព្រឹទ្ធសមាជិកចនម៉ាក់កេន បម្រើប្រទេសជាតិយើង។នេះជាការគូសបញ្ជាក់របស់លោកត្រាំដែលចេញផ្សាយ ២ថ្ងៃក្រោយមរណភាពរបស់អតីតអ្នកបើកយន្តហោះរូបនេះ ដែលធ្លាប់រងទារុណកម្មពេលជាប់ជាឈ្លើយសឹកក្នុងសម័យសង្គ្រាមវៀតណាម៕
ចែករំលែកព័តមាននេះ