រាជធានីភ្នំពេញ ៖ អតីតថៅកែសណ្ឋាគារឆាយហុង ដែលមានឈ្មោះល្បី បានធ្លាក់ទឹកទន្លេលិចបាត់រយៈពេល២ថ្ងៃមកហើយរកសាកសពពុំឃើញនៅឡើយ ខណៈពេលគាត់បើកម៉ូតូទឹកដែលទើបទិញថ្មី ជិះលំហែលកាយតាមដងទន្លេមេគង្គ ។
ការរងគ្រោះថ្នាក់នេះ ត្រូវបាននគរបាលឱ្យដឹងថា កើតឡើងតាំងពីល្ងាចថ្ងៃទី២៦ សីហា មក ស្ថិតនៅ ចំណុច ដងទន្លេមេគង្គ ក្នុងភូមិល្វា សង្កាត់កោះដាច់ ខណ្ឌជ្រោយចង្វារ រហូតមកទល់រសៀលថ្ងៃទី២៨ សីហា នេះ ក្រុមគ្រួសាររកសាកសពពុំទាន់ឃើញទេ ។
ជនរងគ្រោះដែលគេអះអាងថា បានធ្លាក់ទឹកស្លាប់នោះ ឈ្មោះហុក ប៊ុនហ៊ុយ ហៅតាហ៊ុយ ភេទប្រុស អាយុ ប្រមាណជាង៤៧ឆ្នាំ ជាអតីតថៅកែសណ្ឋាគារឆាយហុង និងបច្ចុប្បន្នជាថៅកែហាងគុយទាវមួយកន្លែង នៅក្នុងភូមិព្រែកលៀប សង្កាត់ព្រែកលៀប ខណ្ឌជ្រោយចង្វារ ។
តាមមន្ត្រីនគរបាលបានឱ្យដឹងទៀតថា អតីតថៅកែសណ្ឋាគាររូបនេះបានបើកម៉ូតូ ខ្លះហៅថា អូប៊័រ ដែលទើបទិញក្នុងតម្លៃជិត២ម៉ឺនដុល្លារលំហែកាយតាមដងទន្លេ ។ មិនដឹងជាមូលហេតុអ្វីនោះទេ នៅពេលបើកបរបានធ្លាក់ទឹកលិចបាត់ ហើយម៉ូតូទឹកក៏បានអណ្តែតតាមទឹកចូលខាង ហើយត្រូវនគរបាលយកទៅរក្សាទុក ។ ក្រោយមក ទើបមានការភ្ញាក់ផ្អើលដល់ក្រុមគ្រួសារនាំគ្នាជួលទូកជួយរក តែរកពុំឃើញសោះ ។
តាមនគរបាលបានអោយដឹងថា ខែនេះជារដូវទឹកឡើង ទឹកហូរខ្មួលខ្មាញ់ មិនដឹងថា សពបានរសាត់អណ្តែតទៅដល់ទីណានោះទេ ។ ទោះបីជាយ៉ាងណា សមត្ថកិច្ចកំពុងធ្វើការស្រាជ្រាវបន្ត ។
ចែករំលែកព័តមាននេះ