រាជធានីភ្នំពេញ ៖ ក្រុមអ្នកទោសអតីតសកម្មជនរបស់គណបក្សសង្គ្រោះជាតិចំនួន១១នាក់ កាលពីថ្ងៃទី២៤ ខែសីហានេះ បានសរសេរលិខិតរួមគ្នាមួយជាមួយនឹងស្នាមមេដៃរបស់ខ្លួន ដាក់ជូនប្រមុខរាជរដ្ឋាភិបាល សម្តេចតេជោ ហ៊ុន សែន នាយករដ្ឋមន្ត្រីដើម្បីសុំឲ្យមានការដោះលែង តាមសំណើថ្វាយព្រះមហាក្សត្រស្នើសុំព្រះរាជទានលើកលែងទោសដល់ពួកគាត់។ ទណ្ឌិតទាំង១១នាក់ ត្រូវបានតុលាការផ្តន្ទាទោសដាក់ពន្ធនាគារពី៧ដល់២០ឆ្នាំ ពីបទដឹកនាំកុបកម្ម និងចូលរួមកុបកម្ម នៅទីលានប្រជាធិបតេយ្យចាស់ក្បែរវត្តភ្នំ បណ្តាលឲ្យសន្តិសុខជាង៣០នាក់របួស។
យោងតាមលិខិត ដាក់ជូនសម្តេច ហ៊ុន សែន ទណ្ឌិតដែលបានផ្តិតមេដៃរួមមាន៖ លោក១.មាជ សុវណ្ណារ៉ា ២.លោក ស៊ុំ ពុទ្ធី ៣.លោក អឿ ណារិត ៤.លោក អ៊ុក ពេជ្រសំណាង ៥.លោក សាន គឹមហេង ៦.លោក អាន បឋម ៧.លោក នាង សុឃុន ៨.លោក ឃិន រឿន ៩.លោក ឃិន ជំរឿន លោក.ទេព ណារិទ្ធ ១០.លោកសាន សីហៈ និង១១.លោកកែ ឃីម។ ទណ្ឌិតទាំងនេះត្រូវបានចាប់ខ្លួនកំឡុងខែកក្កដា និងខែវិច្ឆិកាឆ្នាំ២០១៤។ តែតាមព័ត៌មានក្រៅផ្លូវការថា លោក មាជ សុវណ្ណារ៉ា និងសកម្មជនអតីតគណបក្សសង្គ្រោះជាតិចំនួន ១០នាក់ នឹងត្រូវបានដោះលែងឲ្យមានសេរីភាពវិញនៅរសៀលថ្ងៃទី២៧ ខែសីហា ឆ្នាំ២០១៨នេះ។ នេះបានបើកភរិយាយ លោក មាជ សុវណ្ណារ៉ា។
យោងតាមភរិយាលោក មាជ សុវណ្ណារ៉ា បានសរសេរលើបណ្តាញសង្គមហ្វេសប៊ុកមានឈ្មោះ(Jamie Meach) នៅថ្ងៃទី២៧ សីហា បានបញ្ជាក់ ថា«ខ្ញុំរំភើបចិត្តណាស់ស្វាមីរបស់នាងខ្ញុំ គឺលោក មាជ សុវណ្ណារ៉ា រួមទាំង១០នាក់ផ្សេងទៀតកំពុង ដូរសម្លៀកបំពាក់បំពេញក្រដាសស្មាម និងបានចេញផុតពីគុកព្រៃសនៅថ្ងៃនេះឯង ប្រហែលម៉ោង២រ សៀលនេះ»។ លោក មាជ សុវណ្ណារ៉ា និងសកម្មជនគណបក្សសង្គ្រោះជាតិ ចំនួន១០រូបផ្សេងទៀត នឹងត្រូវដោះលែងឲ្យមានសេរីភាពឡើងវិញនៅរសៀល ថ្ងៃទី២៧ ខែសីហា ឆ្នាំ២០១៨នេះ បន្ទាប់ពី ពួកគេបានសរសេរលិខិតស្នើសុំលើកលែងទោសទៅប្រមុខរដ្ឋាភិបាល កាលពីថ្ងៃទី២៤ ខែសីហា កន្លងមកនេះ។
ជាងនេះការសុំលើកលែងទោសនេះក្រោយមានការលើកលែងទោសសកម្មជនដីធ្លី អ្នកនយោបាយ និងអ្នកសារព័ត៌មានជាបន្តបន្ទាប់។ ជាមួយគ្នានេះផងដែរ កាលពីពេលថ្មីៗ នេះសម្តេចតេជោ ហ៊ុន សែន នាយករដ្ឋមន្ត្រីក៏បានមានប្រសាសន៍ផងដែរថា សម្តេចមាន គ ម្រោងនឹងធ្វើការដោះលែងអ្នកទោស មានលក្ខណៈទ្រង់ទ្រាយធំផងដែរ។ ក្រុមទណ្ឌិតទាំង១១នាក់ កំពុងឃុំខ្លួននៅពន្ធនាគារព្រៃសបានលើកឡើងក្នុងលិខិតរួមគ្នាថា (សូមគោរពជូនសម្តេចតេជោ ហ៊ុន សែន នាយករដ្ឋមន្ត្រី សំណើសម្តេចមេត្តាជួយអន្តរាគមន៍ស្នើលើកលែងទោសយើងទាំងអស់គ្នា បានរួចផុតទោស និងមានសេរីភាព)។
ទណ្ឌិតទាំងនោះបានលើកឡើងថា ពួកគេត្រូវបានសាលាដំបូង រាជធានីភ្នំពេញ បានផ្តន្ទាទោសតាមអំណាចសាលក្រម ចុះថ្ងៃទី២១ ខែកក្កដា ឆ្នាំ២០១៥។ ទណ្ឌិតបញ្ជាក់ថា ”ពួកយើងខ្ញុំចំនួន៣នាក់ត្រូវបានផ្តន្ទាទោសដាក់ពន្ធនាគារ២០ឆ្នាំម្នាក់ និងចំនួន៨នាក់ ត្រូវបានផ្តន្ទាទោសដាក់ពន្ធនាគារម្នាក់ៗ៧ឆ្នាំ”។ បន្ទាប់ពីការសម្រេចរបស់សាលាដំបូងរាជធានីភ្នំពេញ ជនជាប់ចោទបានដាក់ពាក្យបណ្តឹងឧទ្ធរណ៍ប្រឆាំងការសម្រេចនេះ។ តែចៅក្រមសាលាឧទ្ធរណ៍បាន សម្រេចតម្កល់ការសម្រេចរបស់សាលាដំបូងរាជធានីភ្នំពេញ ដោយចាត់ទុកបានការដដែល រក្សាការសម្រេចកាលពីថ្ងៃទី២១ ខែកក្កដា ២០១៥។
ក្រោយមកនៅថ្ងៃទី៥ ខែមិថុនា ឆ្នាំ២០១៨ ទើបពួកគាត់បានប្តឹងសាលទុក្ខប្រឆាំងនឹងការសម្រេចរបស់សាលាឧទ្ធរណ៍ទៅកាន់តុលាការកំពូល។ ក្រុមទណ្ឌិតបានលើកឡើងថា ពួកគាត់បានជាប់ពន្ធនាគារប្រមាណ៣ឆ្នាំកន្លងមកនេះ។ ទណ្ឌិតបានសរសេរថា៖ ”ពួកយើងខ្ញុំមានការសោកស្តាយដែលបានចូលរួមបាតុកម្មនៅទីលាន ប្រជាធិបតេយ្យក្បែរស្ពាននាគ ”ដែលអាជ្ញាធរបានសម្រេចបិទជាបណ្តោះអាសន្នកាលពីថ្ងៃទី១៥ ខែកក្កដា ឆ្នាំ២០១៤ ដែលមិនបានពិចារណាឲ្យបានដិតដល់ ដែលបានធ្វើឲ្យប៉ះពាល់ធ្ងន់ធ្ងរដល់សន្តិសុខ និងសណ្តាប់ធ្លាប់សង្គម។
ក្រុមទណ្ឌិតបានលើកឡើងពីការលំបាករបស់គក្រុមគ្រួសារ កូនមិនបានចូលរៀន បោះបង់សាលា បាត់បង់ការរកស៊ីឬមុខរបរថា ”យើងខ្ញុំទាំងអស់គ្នាកំពុងជាប់ឃុំ ជាអ្នកទោសអស់រយៈពេលជាង៣ឆ្នាំមកនេះ ពិតជាមានការនឹករលឹកដល់គ្រួសារ ឪពុកម្តាយ ហើយកូនបានបោះបង់ចោលការសិក្សាដោយសារឪពុកជាប់ពន្ធនាគារ និងបាត់បង់ការងារ បាត់បង់មុខរបររកស៊ី និងបាត់បង់ការរកស៊ី”។ ក្រុមទណ្ឌិតបានលើកឡើងថា ពួកគាត់បានដឹងតាមរយៈ សារព័ត៌មានថា ការបោះឆ្នោតថ្ងៃទី២៩ ខែកក្កដា ២០១៨ មានអ្នកចេញទៅបោះឆ្នោតជាង៨៣% និងគណបក្សប្រជាជនកម្ពុជាទទួលបានភ្លូកទឹកភ្លូកដីបានទទួលអាសនៈទាំងអស់១២៥ នៅក្នុងរដ្ឋសភាអាណិតទី៦។
ពួកគាត់បានអះអាងថា ”យើងខ្ញុំទាំងអស់គ្នាសន្យាថា មិនចូលរួមបាតុកម្មណាមួយឬ ធ្វើសកម្មភាពណាមួយដោយគ្មានការពិចារណាមួយឡើយ។ យើងខ្ញុំគោរពរដ្ឋធម្មនុញ្ញ និងច្បាប់នានាព្រមទាំងចូលការពារសន្តិភាព ដែលសម្តេចបានខិតខំកសាងយ៉ាងលំបាកមួយនេះឲ្យបានគង់វង្សជានិច្ចនិរន្តន៍ ដើម្បីអភិវឌ្ឍប្រទេសជាតិ”។ តែគិតត្រឹមម៉ោង៤ល្ងាច ថ្ងៃទី២៧ ខែសីហានេះ ក្រុមគ្រួសាររបស់ទណ្ឌិត និងអ្នកសារព័ត៌មានបានទៅរង់ចាំនៅខាងមុខច្រកទ្វារពន្ធនាគារ។ ចំណែកមន្ត្រីពន្ធនាគារ និងតុលាការបានអះអាងថា មិនទាន់មានព្រះរាជក្រិត្យ ឬដីកាពីព្រះរាជអាជ្ញាតុលាការក្រុង បញ្ជូនទៅដល់គុកព្រៃសនៅឡើយ។
សូមជម្រាបថា ក្នុងរយៈពេលតែមួយសប្តាហ៍ ព្រះមហាក្សត្របាន ចេញព្រះរាជក្រឹត្យលើកលែងអ្នកទោសតាមសំណើពីសម្តេចតេជោ ហ៊ុន សែន នាយករដ្ឋមន្ត្រីមួយចំនួន ដូចជា៖ លោក គឹម សុខ អ្នកវិភាគសង្គម លោកស្រី ទេព វន្នី អតីតសកម្មជន ដីធ្លីបឹងកក់ និងសហការី ចំនួន៣នាក់ លោក អ៊ុំ សំអាន អតីតសមាជិករដ្ឋសភា គណបក្សសង្គ្រោះជាតិ និង អតីតបុគ្គលិកវិទ្យុ អាស៊ីសេរីចំនួន២នាក់ ដោយយោងតាមព្រះរាជក្រិត្យលើកលែងទោស និងដីការបស់តុលាការ។ នៅខាងមុខពន្ធនាគារគេបានឃើញវត្តមានអតីតអ្នកតំណាងរាស្ត្របក្សប្រឆាំងលោក ប៉ុល ហំម លោក អ៊ុំ សំអាន និងសកម្មជនសង្គមស៊ីវិលលោក គឹម សុខ ដែលទើបចេញពីពន្ធនាគារ មកឈរចាំទទួលទណ្ឌិត១១នាក់នេះ ជាមួយនឹងក្រុមគ្រួសារផងដែរ៕
ចែករំលែកព័តមាននេះ