រាជធានីភ្នំពេញ ៖ ក្រសួងការងារ និងបណ្តុះបណ្តាលវិជ្ជាជីវៈសម្រេចលុបចោលទាំងស្រុងនូវសេចក្តីព្រាងច្បាប់ស្តីពីនីតិវិធីជម្រះក្តីវិវាទការងារទាំងស្រុក ដើម្បីទុកឱកាសឲ្យក្រុមប្រឹក្សាអា ជ្ញាកណ្តាលដោះស្រាយបញ្ហា ។ នេះបើតាមលោករដ្ឋមន្ត្រីក្រសួងការងារ ។
លោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈបានលើកឡើងក្នុងកិច្ចប្រជុំពិសេសរបស់ភាគីពាក់ព័ន្ធនៃក្រុមប្រឹក្សាអាជ្ញាកណ្តាល នាព្រឹកថ្ងៃទី២៧ សីហានៅ សណ្ឋាគារសាន់វ៉េបញ្ជាក់ថា « ខ្ញុំបានសម្រេចចិត្ត និងសុំគោលការណ៍ពីប្រមុខរាជរដ្ឋាភិបាល ដើម្បីឈប់ធ្វើច្បាប់ស្តីពីនីតិវិធីជម្រះក្តី និងវិវាទការងារ ហើយដើម្បីផ្តល់ឱកាសដល់ក្រុមប្រឹក្សាអាជ្ញាកណ្តាលបន្តជួយដោះស្រាយវិវាទការងារ» ។
លោករដ្ឋមន្ត្រីក្រសួងការងារក៏បានលើកឡើងថា ការឈប់ធ្វើច្បាប់ស្តីពីនីតិវិធីជម្រះក្តី និងវិវាទការងារនេះ ដោយសារតែសេចក្តីព្រាងច្បាប់នេះមានចំណុចមួយចំនួនពាក់ព័ន្ធ និងតួនាទីក្រុមប្រឹក្សាអាជ្ញាកណ្តាល និងដើម្បីផ្តល់ឱកាសដល់ក្រុមប្រឹក្សាអាជ្ញាកណ្តាលក្នុងការដោះស្រាយវិវាទការឲ្យមានប្រសិទ្ធិភាពខ្ពស់ និងទុកចិត្ត ។
ជាងនេះបន្ទាប់ពីភាគីពាក់ព័ន្ធរួមមានអង្កការ
អន្តរជាតិខាងការងារ(ILO) បានពិភាក្សាលើសេចក្តីព្រាងច្បាប់ស្តីពីនីតិវិធីជម្រះក្តី និងវិវាទការងារមានភាគីទាំងអស់បានមានមន្ទិលសង្ស័យលើកការអស់ទំនុកចិត្តលើកក្រុមប្រឹក្សាអាជ្ញាកណ្តាល ។
លោកបញ្ជាក់ថា«យើងនឹងបន្តទ្រទ្រង់ និងយន្តការក្រុមប្រឹក្សាអាជ្ញាកណ្តាលក៏ដូចជាមូលនិធីក្រុមប្រឹក្សាអាជ្ញាកណ្តាលឲ្យមានក្រេឌីតបន្ថែមទៀតឲ្យនិរន្តភាពក្នុងរយៈពេលវែង ។ យើងគិតថា និរន្តភាពត្រូវមានរយៈពេលវែងព្រោះថា វាជាតម្រូវការសង្គម» ។
លោករដ្ឋមន្ត្រីក៏បានលើកឡើងថា អាជ្ញាកណ្តាលត្រូវតែផ្អែកលើស្ថាប័នជាជាងការគិតនាំយកវិវាទមកដោះស្រាយ ដើម្បីទទួលបានមូលនិធិនោះទេ ។ លោកថា វិវាទការងារនៅពេល បច្ចុប្បន្ននេះបានធ្លាក់ចុះ ហើយការធ្លាក់ចុះនេះមិនមែនមកពីក្រសួងការងារមិនចង់ឲ្យមានវិវាទ នោះទេ ។ ជាមួយគ្នានោះដែរលោករដ្ឋមន្ត្រីក៏បានលើកឡើងថា ក្នុងឆ្នាំ២០១៧នាយកដ្ឋានវិវាទការងារនៃក្រសួងការងារបានដោះស្រាយវិវាទបុគ្គលចំនួន៤៧៦ករណី សះជា២២៨ករណី មិនសះជាចំនួន១៩១ករណី និងមោឃៈចំនួន៥៧ករណី និងដោះស្រាយវិវាទការងាររួមចំនួន១២៧ករណី សះជា៥៦ករណី និងមិនសះជាចំនួន៧០ករណី និងមោឃៈចំនួន០១ករណី ។
លោកក ម៉ែន និម្មិត នាយកប្រតិបត្តមូលនិធិក្រុមប្រឹក្សាអាជ្ញាកណ្តាលបានលើកឡើងនៅក្នុងកិច្ចប្រជុំពិសេសនេះថា កិច្ចប្រជុំថ្ងៃនេះពិតជាសំខាន់ណាស់សម្រាប់មូលនិធិអាជ្ញាកណ្តាល ដើម្បីរួមគ្នាគិតពីបញ្ហាប្រឈមរឿងថវិកាក្នុងការគាំទ្រដល់កិច្ចដំណើរការសកម្មភាពក្រុមប្រឹក្សាអាជ្ញាកណ្តាលនាពេលខាងមុខ ។
លោកបញ្ជាក់ថា បច្ចុប្បន្ននេះក្រុមប្រឹក្សាអាជ្ញាកណ្តាលបាន និងកំពុងដំណើរការសកម្មភាពរបស់ខ្លួនយ៉ាងរលូន ប៉ុន្តែជាក្តីកង្វល់នៅពេលខាងមុខអាចនឹងបញ្ហាប្រឈមទៅលើកង្វះថវិកាដែលទាមទាឱ្យគ្រប់ភាគីពាក់ព័ន្ធចូលរួមជាគំនិតយោលបល់ និងស្វែងរកយន្តការគាំទ្រទុកជាមុន ។ កន្លងមកស្ថាប័នមួយនេះបានប្រើប្រាស់ថវិកាជាតិថវិកាប្រទេស ផ្តល់ជំនួយ និងថវិកាអ្នកផ្តល់ជំនួយស្ម័គ្រ ដែលក្នុង១ឆ្នាំៗ មានចន្លោះពី៨០ម៉ឺន ទៅជាង១លានដុល្លារសម្រាប់ដោះស្រាយវិវាទទូទាំងប្រទេស ។ លោកបញ្ជាក់ទៀតថា ក្រុមប្រឹក្សាមួយនេះធ្លាប់បានដោះស្រាយទៅលើវិវាទរួមជាច្រើន ដើម្បីពង្រីកវិស័យការងារនៅកម្ពុជាបានល្អ ជាពិសេសជម្រុញឱ្យគ្រប់ភាគីនាំគ្នាគោរពច្បាប់រួមគ្នាធ្វើឱ្យវិស័យឧស្សាហកម្ម មានភាពចាស់ទុំ និងធ្វើឱ្យវិវាទធ្លាក់ចុះគួរឱ្យកត់សម្គាល់ ។
លោករដ្ឋមន្ត្រីក៏បានលើកឡើងថា ក្នុងភាពជាដៃគូក្នុងការធ្វើឱ្យប្រសើរឡើងនូវទំនាក់ទំនងវិជ្ជាជីវៈនៅកម្ពុជាក្រុមប្រឹក្សាអាជ្ញាកណ្តាល និងក្រសួងការងារបានធ្វើការងារជាមួយគ្នាយ៉ាងជិតស្និតអស់រយៈពេលប្រមាណជាង១៥ឆ្នាំមកហើយ ដើម្បីឆ្ពោះទៅរកប្រព័ន្ធទំនាក់ទំនងវិជ្ជាជីវៈមួយល្អប្រសើរសម្រាប់ទាំងនិយោជក និងកម្មករនិយោជិត ។ កិច្ចសហការនេះបានសម្រេចនូវសមិទ្ធផលជាច្រើនគួរឲ្យកត់សំគាល់រួមទាំងការដោះស្រាយវិវាទការងារដោយគិតត្រឹមឆ្នាំ២០១៦ក្រុមប្រឹក្សាអាជ្ញាកណ្តាលបានទទួលសំណុំរឿងវិវាទចំនួនជាង២៦៥០ ដែលពាក់ព័ន្ធដោយផ្ទាល់ជាមួយកម្មករនិយោជិតជាង១លាននាក់ ហើយទទួលបានអត្រាជោគជ័យចំនួន៧៥% ក្នុងចំណោមសំណុំរឿងវិវាទដែលបានដោះស្រាយទាំងអស់ តាមរយៈការផ្សះផ្សារ និងចំណាយពេលជាមធ្យម១៧ថ្ងៃ ។
អស់រយៈពេលជាង១៥ឆ្នាំហើយដែលក្រុមប្រឹក្សាអាជ្ញាកណ្តាលបានរួមចំណែកក្នុងការធ្វើឱ្យប្រសើរឡើងនូវទំនាក់ទំនងវិជ្ជាជីវៈ និងកំណើនសេដ្ឋកិច្ចជាតិ ។ តាំងពីចាប់ផ្តើមដំបូងក្រុមប្រឹក្សា អាជ្ញាកណ្តាលបានទទួលជំនួយគាំទ្រហិរញ្ញវត្ថុពីបណ្តាម្ចាស់ជំនួយអន្តរជាតិនានា ។
តាមផែនការយុទ្ធសាស្ត្រ២០១៤-២០១៨ទាក់ទងនឹងនិរន្តភាពរបស់មូលនិធិក្រុមប្រឹក្សាអាជ្ញាកណ្តាលក្រសួងនឹងសហការឱ្យកាន់តែជិតស្និទជាមួយមូលនិធិក្រុមប្រឹក្សាអាជ្ញាកណ្តាល ដើម្បីជួយដល់មូលនិធិក្នុងការអនុវត្តផែនការយុទ្ធសាស្ត្រអំពីនិរន្តរភាពនៃក្រុមប្រឹក្សាអាជ្ញាកណ្តាលសម្រាប់រយៈពេលមធ្យម និងរយៈវែង ដើម្បីឱ្យស្ថាប័នមួយនេះអាចដំណើរការការងាររបស់ខ្លួនឱ្យកាន់តែមានប្រសិទ្ធភាពខ្ពស់ និងឆ្លើយតបនឹងតម្រូវការរបស់ភាគីពាក់ព័ន្ធជានិរន្តតទៅ ៕
ចែករំលែកព័តមាននេះ