ខេត្តកំពង់ស្ពឺ ៖ ដើម្បីកាត់បន្ថយគ្រោះថ្នាក់ចរាចរណ៍ ដែលកើតមាននៅតាមដងផ្លូវសាធារណៈទូទាំងខេត្ត ពិសេសតាមកំណាត់ផ្លូវជាតិលេខ៤ នគរបាលចរាចរណ៍ខេត្តបានដាក់គោលដៅ ត្រួតពិនិត្យលក្ខណៈបច្ចេកទេស និងណែនាំដល់បងប្អូនអ្នកបើកបររថយន្ដដឹកទំនិញគ្រប់ប្រភេទ និងរថយន្ដដឹកថ្ម-ខ្សាច់ជាដើម ដើម្បីឱ្យចូលរួមគោរពច្បាប់ចរាចរណ៍ទាំងអស់គ្នា…
ខេត្តកំពង់ស្ពឺ ៖ ដើម្បីកាត់បន្ថយគ្រោះថ្នាក់ចរាចរណ៍ ដែលកើតមាននៅតាមដងផ្លូវសាធារណៈទូទាំងខេត្ត ពិសេសតាមកំណាត់ផ្លូវជាតិលេខ៤ នគរបាលចរាចរណ៍ខេត្តបានដាក់គោលដៅ ត្រួតពិនិត្យលក្ខណៈបច្ចេកទេស និងណែនាំដល់បងប្អូនអ្នកបើកបររថយន្ដដឹកទំនិញគ្រប់ប្រភេទ និងរថយន្ដដឹកថ្ម-ខ្សាច់ជាដើម ដើម្បីឱ្យចូលរួមគោរពច្បាប់ចរាចរណ៍ទាំងអស់គ្នា ព្រោះមានតែការគោរពច្បាប់ទេ ទើបអាចកាត់បន្ថយគ្រោះថ្នាក់ចរាចរណ៍ជាយថាហេតុ ។
មន្ត្រីនគរបាលខេត្តបានឱ្យដឹងថា ដោយបានការបញ្ជាដឹកនាំពីលោកឧត្ដមសេនីយ៍ទោ ឃឹម សុកខៃ ស្នងការនគរបាលខេត្ដ នៅព្រឹកថ្ងៃទី១៤ ខែតុលា ឆ្នាំ២០២៥ កម្លាំងនគរបាលផែនការងារសណ្ដាប់ធ្នាប់ ក្រោមការចង្អុលណែនាំពីលោកឧត្ដមសេនីយ៍ត្រី តាប់ លន ស្នងការរងទទួលផែន លោកវរសេនីយ៍ទោ ឈុន ហ៊ុយ ស្នងការរងទទួលជំនួយការដឹកនាំការិយាល័យ លោកវរសេនីយ៍ឯក កៅ ផាត នាយការិយាល័យចរាចរណ៍ផ្លូវគោក បានដឹកនាំកម្លាំងជំនាញចុះនៅតាមគោលដៅងាយរងគ្រោះថ្នាក់ ដោយធ្វើការពិនិត្យលក្ខណៈបច្ចេកទេស និងណែនាំដល់បងប្អូនអ្នកបើកបររថយន្ដដឹកទំនិញគ្រប់ប្រភេទ ព្រមទាំងរថយន្ដដឹកថ្ម-ខ្សាច់ ឱ្យចូលរួមគោរពច្បាប់ចរាចរណ៍ ។
នៅក្នុងការត្រួតពិនិត្យនេះ ក៏បានណែនាំលើផ្នែកបច្ចេកទេសយានយន្ដមុនចេញដំណើរ និងបើកបរក្នុងទីប្រជុំជន ឱ្យស្របតាមការកំណត់របស់ច្បាប់(ល្បឿនជាការកំណត់លើមធ្យោបាយបង្កគ្រោះថ្នាក់ផ្សេងៗ) ការគោរពច្បាប់ គឺជាការនាំគ្នាកាត់បន្ថយគ្រោះថ្នាក់ទាំងអស់ ។ ដូចនេះត្រូវតែចូលរួមគោរពច្បាប់ទាំងអស់គ្នា ឱ្យតែចេញដំណើរចេញពីផ្ទះ គឺគិតពីអាទិភាពលើសុវត្ថិភាពជាចម្បង ។
ជាចុងក្រោយ នគរបាលចរាចរណ៍ខេត្ត ធ្វើការអំពាវនាវ សូមឱ្យអ្នកបើកបរពិសេសអ្នកបើកបររថយន្ត ចូលរួមគោរពច្បាប់ទាំងអស់គ្នា ជៀសវាងជួបគ្រោះថ្នាក់ដោយប្រការណាមួយ ។ មានតែការគោរពច្បាប់ទាំងអស់គ្នាទេ ទើបជៀសផុតពីបទល្មើសផ្សេងៗដែលច្បាប់បានកំណត់ ៕
ចែករំលែកព័តមាននេះ