រាជធានីភ្នំពេញ ៖ អ្នកនាំពាក្យគណបក្សប្រជាជនកម្ពុជាលោក សុខ ឥសាន បានអះអាងថា ការដោះលែងជនជាប់ចោទមួយចំនួនជាស្មារតីបង្រួបបង្រួមជាតិរបស់ថ្នាក់ដឹកនាំប្រទេស ។
ការលើកឡើងរបស់អ្នកនាំពាក្យរូបនេះ បន្ទាប់ពីតុលាការបានដោះលែងជនជាប់ចោទមួយចំនួនដូចជា លោក គឹម សុខ អ្នកវិភាគសង្គម លោកស្រី ទេព វន្នី អតីតសកម្មជនដីធ្លី និងសហការី៣នាក់ អតីតបុគ្គលិកវិទ្យុអាស៊ីសេរី២នាក់ កាលពីកន្លងមកនេះ ។ ប៉ុន្តែនៅសកម្មជនមួយចំនួន និងមេបក្សប្រឆាំងមួយចំនួនទៀតមិនទាន់បានដោះលែងឲ្យមានសេរីភាពវិញនៅឡើយ ទេ ។
លោក សុខ ឥសាន បានឲ្យដឹងនៅថ្ងៃទី២២ សីហាថា ការដោះលែងជនជាប់ចោទមួយចំនួន គឺជាស្មារតីបង្រួបបង្រួមជាតិនៃថ្នាក់ដឹកនាំប្រទេសជាឆន្ទានុសិទ្ធិ និងនីតិវិធីរបស់តុលាការ ហើយវាគ្រាន់តែគាប់ជួន ពេលវេលាតែប៉ុណ្ណោះមិនមែនការដោះលែងបានមកដោយសារ មានគំនាបណាមួយពីខាងក្រៅ ឬដោយការតស៊ូរបស់មជ្ឈដ្ឋានប្រឆាំងណាមួយឡើយ ។
ជាមួយគ្នានោះដែរ អ្នកនាំពាក្យគណបក្សកាន់អំណាចក៏សំណូមពរអ្នកវិភាគទាំងគ្រហស្ថទាំងបុព្វជិត មេត្តាកុំឆ្លៀតយកការបាននៅក្រៅឃុំបណ្តោះអាសន្ន និងការដោះលែ ងអ្នកជាប់ចោទធ្វើប្រធានបទវាយប្រហារមកលើការអនុវត្តច្បាប់របស់រាជរដ្ឋាភិបាលកម្ពុជា ដើម្បីពង្រឹងលទ្ធិប្រជាធិបតេយ្យ និងនីតិរដ្ឋនៅកម្ពុជា ហើយជៀសវាងការនិយាយញុះញង់ដែលនាំឲ្យបែក បាក់ជាតិឲ្យសោះ ។
អ្នកនាំពាក្យគណបក្សប្រជាជនកម្ពុជាក៏បានអះអាងថា គណបក្សប្រជាជនកម្ពុជាមានការសោកស្តាយពីការបាត់បង់ដៃគូប្រកួតដែលហៅថា ដ៏មានសក្តានុពល ។ ក៏ប៉ុន្តែមិនអាចមានមធ្យោបាយណាជួយបានដោយសារអតីតបក្សប្រឆាំងមួយនេះបានប្រព្រឹត្តបទល្មើសធ្ងន់ធ្ងរដែលត្រូវប្រឈមមុខចំពោះមាត្រា៤៤៣ នៃក្រមព្រហ្មទណ្ឌ និងមាត្រាមួយចំនួននៃច្បាប់ស្តីពីគណបក្សនយោបាយដែលត្រូវទទួលខុសត្រូវដោយខ្លួនឯង ។
លោកបញ្ជាក់ថា «ដូច្នេះ អតីតបក្សប្រឆាំងធ្វើឲ្យបាត់សិទ្ធិនយោបាយរបស់ខ្លួន ដោយខ្លួនឯងដែលមិនអាចចូលរួមបោះឆ្នោតបាន ដែលត្រូវតែហ៊ានទទួលស្គាល់ការពិតនៃអំពើប្រព្រឹត្តល្មើសច្បាប់របស់ខ្លួន មិនអាចប្រកែកបានឡើយ»៕
ចែករំលែកព័តមាននេះ