ខេត្តព្រៃវែង ៖ កំលាំងនគរបាលស្រុកកំពង់ត្របែក បានចាប់ឃាត់ខ្លួនបុរសជាអ្នកទិញលក់អេតចាយមា្នក់ ហើយត្រូវបានសមត្ថកិច្ចកសាងសំណុំរឿងបញ្ជូនទៅកាន់សាលាដំបូង ដោយជាប់ចោទពីបទចោរកម្ម ដែលបានប្រព្រឹត្តកាលពីថ្ងៃទី១៤ សីហា ឆ្នាំ២០១៨កន្លងទៅ។
ជនសង្ស័យខាងលើឈ្មោះ ជី អន ភេទប្រុស អាយុ២៤ឆ្នាំ ជាអ្នកទិញលក់អេតចាយ មានទីលំនៅក្នុងភូមិព្រៃធំ ឃុំគោខ្ចក ស្រុកកំពង់ត្របែក ខេត្តព្រៃវែង ត្រូវបានកំលាំងប៉ុស្តិ៍រដ្ឋបាល ឃុំប្រាសាទ សហការជាមួយកំលាំងជំនាញព្រហ្មទណ្ឌស្រុកចាប់ឃាត់ខ្លួនបានកាលពីវេលាម៉ោង៩និង៣០នាទីព្រឹក ថ្ងៃទី២១សីហា នៅកន្លែងទិញលក់អេតចាយមួយកន្លែង ដែលស្ថិតក្នុងភូមិចំបក់ ឃុំប្រាសាទ ស្រុកកំពង់ត្របែក។
យោងតាមប្រភពព័ត៌មានពីសមត្ថកិច្ចបានឱ្យដឹងថា ក្រោយពេលត្រូវចាប់ឃាត់ខ្លួន ជនសង្ស័យបានឆ្លើយសារភាពនៅចំពោះមុខសមត្ថកិច្ចថា កាលពីវេលាម៉ោង៥និង៣០នាទីល្ងាច ថ្ងៃទី១៤ សីហា ខ្លួនពិតជាបានធ្វើសកម្មភាពលួចយកដែកពុម្ពចាក់លូចំនួន៨ផ្ទាំង ពីចំណុចភូមិទ័ពសៀម ឃុំកន្សោមអក ស្រុកកំពង់ត្របែក ពិតប្រាកដមែន ដោយប្រើប្រាស់រ៉ឺម៉កម៉ូតូមួយគ្រឿងជាមធ្យោបាយធ្វើសកម្មភាព ហើយមិនមែនធ្វើសកម្មភាពលួចតែម្នាក់ឯងនោះទេ គឺខ្លួនធ្វើសកម្មភាពលួចដែកពុម្ពចាក់លូនោះជាមួយបក្ខពួកម្នាក់ទៀត ឈ្មោះ កង ជាជនជាតិវៀតណាម មានទីលំនៅក្នុងទីប្រជុំជនអ្នកលឿង។
បច្ចុប្បន្ននេះ ជនសង្ស័យនិងវត្ថុតាង ត្រូវបានឃាត់ខ្លួននៅអធិការដ្ឋាននគរបាលស្រុកកំពង់ត្របែក រង់ចាំសមត្ថកិច្ចកសាងសំណុំរឿងរួចនឹងបញ្ជូនបន្តទៅសាលាដំបូង ដោយឡែកជនសង្ស័យជាបក្ខពួកម្នាក់ទៀត សមត្ថកិច្ចកំពុងតាមស្វែងរកចាប់ខ្លួនផងដែរ ៕
ចែករំលែកព័តមាននេះ