ខេត្តកំពង់ស្ពឺ៖ បុរសជាអតីតប្តីត្រូវបានកម្លាំងនគរបាលធ្វើការឃាត់ខ្លួន មានបណ្តឹងរបស់អតីតប្រពន្ធ(បានលែងលះគ្នាត្រឹមឃុំរួចរាល់) ខណៈដែលជនសង្ស័យជាអតីតប្តី ឃើញប្រពន្ធអង្គុយផឹកស៊ីជួបជុំគ្នាជាមួយអ្នកដទៃ សង្ស័យកើតរឿងប្រចណ្ឌ ប្រើហិង្សាដោយចេតនា(បោចសក់ទំលាក់ពីលើកៅអីតែម្តង)។
ហេតុការណ៍នគរបាលឃាត់បុរសជាអតីតប្តីប្រើហិង្សាដោយចេតនាលើប្រពន្ធ បានកាលពីយប់ថ្ងៃទី១៧ ខែធ្នូ ឆ្នាំ២០២៥ នៅក្នុងភូមិតាំងស្នោរ ឃុំទំព័រមាស ស្រុកសំរោងទង ខេត្តកំពង់ស្ពឺ។
នគរបាលស្រុកសំរោងទងបាននិយាយឱ្យដឹងថា កាលពីវេលាម៉ោង០៥ និង៣៣នាទីល្ងាចថ្ងៃទី១៧ ខែធ្នូ ឆ្នាំ២០២៥ មានឈ្មោះ សេង ផា ភេទស្រី អាយុ៥៣ឆ្នាំមុខរបរលក់ដូរ រស់នៅក្នុងភូមិតាំងស្នោរ ឃុំទំព័រមាស ស្រុកសំរោងទង ខេត្តកំពង់ស្ពឺ បានមកដាក់ពាក្យបណ្តឹងនៅប៉ុស្តិ៍នគរបាលរដ្ឋបាលឃុំទំព័រមាស ទៅលើឈ្មោះ ផុន ខ្លង ភេទប្រុស អាយុ៥៨ឆ្នាំ ត្រូវជាអតីតប្តី(បានលែងលះគ្នានៅសាលាឃុំ) នៅក្នុងភូមិ~ឃុំជាមួយគ្នា ពីបទហិង្សាដោយចេតនា។
បើតាមការរៀបរាប់របស់ស្ត្រីជាអតីតប្រពន្ធថា នៅវេលាម៉ោង០៥និង៦នាទីល្ងាចថ្ងៃទី១៧ ខែធ្នូ ឆ្នាំ២០២៥ រូបខ្លួន( ឈ្មោះ សេង ផា ) បានហូបស្រាបៀរនៅមុខតូបលក់ដូររបស់ខ្លួន ជាមួយអ្នកជួលតូបក្បែរគ្នា ស្រាប់តែលេចឈ្មោះ ផុន ខ្លង បានដើរចូលមមក្នុងតូប រួចបានស្ទុះមកចាប់បោចសក់ខ្លួនចំនួន០២លើក បណ្តាលឱ្យដួលធ្លាក់ពីលើកៅអី ផ្ងាក្រោយនិងបានជេរប្រមាថ គំរាមគំហែងថានឹងសម្លាប់លើរូបខ្លួន(ជនរងគ្រោះ) ពេលឃើញដូចនោះក៏មានអ្នកស៊ីផឹក ហូបចុកជាមួយគ្នាឃាត់បំបែកចេញទៅ។
នគរបាលស្រុកសំរោងទងបានបន្តឱ្យដឹងថា ក្រោយពីទទួលបានពាក្យបណ្តឹងស្ត្រីអតីប្រពន្ធខាងរួចមក ដល់វេលាម៉ោង៧ និង៤០នាទីយប់ ថ្ងៃទី១៧ ខែធ្នូ ឆ្នាំ២០២៥ កម្លាំងប៉ុស្តិ៍នគរបាលរដ្ឋបាលឃុំទំព័រមាស ក៏បានហៅឈ្មោះ ផុន ខ្លង មកធ្វើការសាកសួរពីដំណើររឿង បុរសជាជនសង្ស័យបានឆ្លើយសារភាពថា ខ្លួនពិតជាចាប់បោចសក់ ជេរប្រមាថ និងគំរាមគំហែងទៅលើជនរងគ្រោះជាអតីប្រពន្ធពិតប្រាកដមែន។ មូលហេតុដែលបុរសរូបនោះប្រើហិង្សា មកពីខឹងឈ្មោះ សេង ផា ហូប(អតីតប្រពន្ធ) បានអង្គុយផឹកស្រាបៀរជាមួយអ្នកដទៃ។
បច្ចុប្បន្នជនសង្ស័យខាងលើត្រូវបានបញ្ជូនមកអធិការដ្ឋាននគរបាលស្រុកសំរោងទងកំពុងសាកសួរ និងកសាងសំណុំរឿងបញ្ជូនបន្តទៅការិយាល័យជំនាញនៃស្នងការដ្ឋាននគរបាលខេត្តកំពង់ស្ពឺ ដើម្បីចាត់ការបន្តតាមផ្លូវច្បាប់៕
ចែករំលែកព័តមាននេះ