ទីក្រុងសេអ៊ូល ៖ របាយការណ៍ថ្មីមួយដែលបានមកពីសមាគមពាណិជ្ជកម្មអន្តរជាតិកូរ៉េ បានឲ្យដឹងកាលពីថ្ងៃអាទិត្យថា ប្រទេសកូរ៉េខាងត្បូង អាចស្ថិតក្នុងចំណោមប្រទេសដែលរងផលប៉ះពាល់ពីសង្គ្រាមពាណិជ្ជកម្មរវាងសហរដ្ឋអាមេរិកនិងប្រទេសចិនច្រើនជាងគេ ប៉ុន្តែផលប៉ះពាល់នេះនៅមានកម្រិតនៅឡើយ ។
យោងតាមរបាយការណ៍ខាងលើ ផលិតផលក្នុងស្រុកសរុប(GDP)របស់កូរ៉េខាងត្បូងត្រូវបានព្យាករណ៍ថា នឹងធ្លាក់ចុះ០,០១៨% ឬប្រមាណ២៣៦.៤៩លានដុល្លារក្នុង១ឆ្នាំ ប្រសិនបើសហរដ្ឋអាមេរិកនិងប្រទេសចិនដាក់ពន្ធ២៥%លើផលិតផលប្រមាណ៥០ប៊ីលានដុល្លារទៅវិញទៅមក ។
របាយការណ៍បញ្ជាក់ទៀតថា សហរដ្ឋអាមេរិកនិងប្រទេសចិនជាដៃគូពាណិជ្ជកម្មធំជាងគេរបស់កូរ៉េខាងត្បូង ។
របាយការណ៍នេះបានបន្ដទៀតថា ផលប៉ះពាល់លើសេដ្ឋកិច្ចកូរ៉េខាងត្បូងមានកម្រិតខ្ពស់ជាងគេលេខ២ បន្ទាប់ពីតៃវ៉ាន់ដែលត្រូវបានគិតថាGDP នឹងធ្លាក់ចុះ០,០២៥%។ កាណាដាជាប់ចំណាត់ថ្នាក់លេខ៣ជាមួយនឹងGDP ដែលអាចនឹងធ្លាក់ចុះ០,០១៦% បន្ទាប់ពីនោះគឺម៉ិកស៊ិកដែលអាចធ្លាក់ចុះ០,០១៤% និងអៀរឡង់ដែលនឹងធ្លាក់ចុះ០,១២% ។
ទិន្នន័យនេះគឺយោងតាមការសន្មតថា GDP របស់សហរដ្ឋអាមេរិកនិងប្រទេសចិននឹងធ្លាក់ចុះ ០,១%និង០,២%រៀងគ្នា បន្ទាប់ពីជម្លោះពាណិជ្ជកម្ម ។
កម្រិតនៃឥទ្ធិពលដែលទទួលដោយប្រទេសដទៃ នឹងមានភាពខុសគ្នាទៅតាមកម្រិតនៃការពឹងផ្អែកលើសេដ្ឋកិច្ចធំជាងគេទាំងពីររបស់ពិភពលោក ។
លោក Kang Nae-young អ្នកស្រាវជ្រាវនៅសមាគមខាងលើបាននិយាយថា ៖ «ប្រទេសកូរ៉េខាងត្បូងត្រូវតែកាត់បន្ថយការពឹងផ្អែកលើប្រទេសចិននិងសហរដ្ឋអាមេរិកក្នុងរយៈពេលវែង និងពង្រីកដៃគូពាណិជ្ជកម្មរបស់ខ្លួនជាមួយនឹងតំបន់ដទៃទៀតដូចជា ឥណ្ឌា និងសមាជិកអាស៊ានជាដើម »។
ក្រសួងពាណិជ្ជកម្មកូរ៉េខាងត្បូងបាននិយាយកាលពីខែមុនថា ពួកគេនឹងតាមដានឥទ្ធិពលនៃជម្លោះពាណិជ្ជកម្មនេះលើការនាំចេញរបស់ប្រទេសយ៉ាងដិតដល់ ហើយនឹងបង្កើនជំនួយដល់ក្រុមហ៊ុនដែលចង់ចូលទីផ្សារថ្មីៗ ៕
ចែករំលែកព័តមាននេះ