ទីក្រុងវ៉ាស៊ីនតោន៖ សមត្ថកិច្ចនៅអាមេរិកបន្តតាមរកជនជៃដល់ដែលបានបាញ់សម្ព័ន្ធមិត្តរបស់លោកត្រាំឈ្មោះឆាលីខឺក (Charlie Kirk) នៅសាកលវិទ្យារដ្ឋយូតា (Utah)។ នគរបាលសហការជាមួយទីភ្នាក់ងារសហព័ន្ធបានបើកយុទ្ធនាការតាមប្រមាញ់អ្នកបាញ់ស៊ីប ឬស្នាយផឺ (sniper) នោះយ៉ាងដុតដៃដុតជើង។…
ទីក្រុងវ៉ាស៊ីនតោន៖ សមត្ថកិច្ចនៅអាមេរិកបន្តតាមរកជនជៃដល់ដែលបានបាញ់សម្ព័ន្ធមិត្តរបស់លោកត្រាំឈ្មោះឆាលីខឺក (Charlie Kirk) នៅសាកលវិទ្យារដ្ឋយូតា (Utah)។ នគរបាលសហការជាមួយទីភ្នាក់ងារសហព័ន្ធបានបើកយុទ្ធនាការតាមប្រមាញ់អ្នកបាញ់ស៊ីប ឬស្នាយផឺ (sniper) នោះយ៉ាងដុតដៃដុតជើង។ រឿងនេះមិនអាចលេងសើចបានទេព្រោះលោកត្រាំកំពុងតែមានកំហឹងយ៉ាងខ្លាំង។
លោកត្រាំចាត់ទុកថាថ្ងៃនេះជាយុគដ៏ខ្មៅងងឹតរបស់ប្រទេសអាមេរិក។ លោកបញ្ជាឱ្យបង្ហូតទង់ជាតិត្រឹមពាក់កណ្ដាលដងចាប់ពីថ្ងៃនេះរហូតដល់ម៉ោង៦ល្ងាចថ្ងៃអាទិត្យដើម្បីគោរពវិញ្ញាណក្ខន្ធបុគ្គលដែលលោកចាត់ទុកថាជាអ្នកជាតិនិយមពិតៗ។ លោកឆាលីខឺកជាសកម្មជននយោបាយអភិរក្សនិយមដែលជួយឃោសនាបោះឆ្នោតឱ្យលោកត្រាំយ៉ាងសកម្ម។
សាក្សីនិយាយថាមុនពេលកើតហេតុ លោកឆាលីខឺកបានចុះសំណេះសំណាលជាមួយនិស្សិតនៅសាកលវិទ្យាល័យរដ្ឋយូតានោះ ហើយត្រូវគេសួរសំណួរពាក់ព័ន្ធនឹងអំពើហិង្សាដោយសារការប្រើប្រាស់កាំភ្លើង និងការបាញ់សម្លាប់មនុស្សច្រើននាក់។ រំពេចនោះ គ្រាប់កាំភ្លើងហោះទៅចំបំពង់ករបស់គាត់។
អភិបាលរដ្ឋយូតាដែលមកពីគណបក្សសាធារណរដ្ឋនិយមដូចគ្នាចាត់ទុកថានេះជាអំពើឃាតកម្មពាក់ព័ន្ធនឹងរឿងនយោបាយ។ ហេតុការណ៍បាញ់សម្លាប់លោកខឺកត្រូវគេថតបានជាវីឌីអូដែលបង្ហាញរូបភាពស្ដែងៗគួរឱ្យញញើត។ នៅក្នុងវីឌីអូឃ្លីបមួយឈុតនោះ គេឃើញឈាមបាញ់ឆ្វាចចេញពីបំពង់ករបស់លោកខឺកដូចគេអារកមាន់។ ប៉ុន្មានម៉ោងក្រោយមក គ្រូពេទ្យបញ្ជាក់ថាលោកបានស្លាប់ហើយ។
គេគិតថាជនដៃដល់ទំនងជាប្រព្រឹត្តអំពើបាញ់ប្រហារនោះតែម្នាក់ឯងប៉ុណ្ណោះ ហើយបាញ់ស៊ីបចេញពីដំបូលអគារមួយកន្លែង។ ពោលគឺសឹងតែដូចគ្នានឹងករណីជនដៃដល់ម្នាក់បាញ់ស៊ីបពីចម្ងាយតម្រង់ទៅរកលោកត្រាំកាលពីខែកក្កដា ឆ្នាំ២០២៤ នៅពេលលោកចុះឃោសនាបោះឆ្នោតនៅរដ្ឋផឹនស៊ីលវេញ៉ា (Pennsylvania) ។ ឥឡូវនេះ ករណីបាញ់សម្លាប់លោកខឺក ជនដៃដល់នៅតែបន្តរត់គេចខ្លួន។ រហូតមកដល់ពេលនេះ គេមិនដឹងថាគាត់កំពុងសម្ងំលាក់ខ្លួននៅកន្លែងណាទេ។ នេះបើយោងតាមការបញ្ជាក់របស់លោកបូមេសុន (Beau Mason) ជាស្នងការនគរបាលរដ្ឋយូតាទទួលបន្ទុកខាងសុវត្ថិភាពសាធារណៈ។
រូបភាពដែលគេទាញចេញពីកាមេរ៉ាសុវត្ថិភាពបង្ហាញរូបមនុស្សម្នាក់ដែលគេជឿជាក់ថាជាឃាតករបាញ់សម្លាប់លោក។ បុរសរូបនោះស្លៀកពាក់ឈុតខ្មៅទាំងអស់តាំងពីក្បាលដល់ចុងជើង។ នេះបើតាមការបញ្ជាក់របស់លោកមេសុន។ កាលពីមុននេះ នគរបាលប្រចាំរដ្ឋយូតាបានចេញសេចក្ដីថ្លែងការណ៍មួយបញ្ជាក់ថាសមត្ថកិច្ចចាប់ខ្លួនជនសង្ស័យ២នាក់យកទៅសួរចម្លើយ។ ប៉ុន្តែក្រោយមកបានដោះលែងអ្នកទាំងនោះវិញព្រោះពួកគេគ្មានចំណុចដែលគួរឱ្យសង្ស័យ។ នេះបើយោងតាមទីភ្នាក់ងារព័ត៌មានរ៉យទ័រ និងប្រភពដទៃទៀត៕
ចែករំលែកព័តមាននេះ