យន្តហោះចិនប្រភេទ Comac C909 ដែលត្រូវបានក្រុមហ៊ុនអាកាសចរណ៍នៅក្នុងប្រទេសចិន និងប្រជាជាតិនៅអាស៊ីអគ្នេយ៍ដូចជាឥណ្ឌូនេស៊ី វៀតណាម ឡាវ ប្រើប្រាស់ហើយនោះ ត្រូវបានក្រុមហ៊ុនអាកាសចរណ៍នៅក្នុងប្រទេសកម្ពុជាមួយធ្វើការបញ្ជាទិញដែរ ស្របពេលកម្ពុជាដាក់ឲ្យដំណើរការអាកាសយានដ្ឋានអន្តរជាតិតេជោ។…
យន្តហោះចិនប្រភេទ Comac C909 ដែលត្រូវបានក្រុមហ៊ុនអាកាសចរណ៍នៅក្នុងប្រទេសចិន និងប្រជាជាតិនៅអាស៊ីអគ្នេយ៍ដូចជាឥណ្ឌូនេស៊ី វៀតណាម ឡាវ ប្រើប្រាស់ហើយនោះ ត្រូវបានក្រុមហ៊ុនអាកាសចរណ៍នៅក្នុងប្រទេសកម្ពុជាមួយធ្វើការបញ្ជាទិញដែរ ស្របពេលកម្ពុជាដាក់ឲ្យដំណើរការអាកាសយានដ្ឋានអន្តរជាតិតេជោ។
ព័ត៌មានដែលផ្សព្វផ្សាយអំពីការសម្រេចចិត្តប្រើប្រាស់នូវយន្តហោះ Comac C909 របស់កម្ពុជានេះ ត្រូវបានប្រកាសជាចំហរដោយលោក វ៉ាង វេនប៊ិន (Wang Wenbin) ឯកអគ្គរដ្ឋទូតចិនប្រចាំនៅកម្ពុជា កាលពីថ្ងៃទី១០ ខែកញ្ញា ឆ្នាំ២០២៥ ។
លោកបានអះអាងថា ក្រុមហ៊ុនកម្ពុជា Air Cambodia និង ក្រុមហ៊ុនចិន Commercial Aircraft Corporation of China, Ltd.,(COMAC) បានអនុស្សរណៈនៃការយោគយល់គ្នា អំពីការគ្រោងនឹងទិញយន្តហោះដែលផលិតដោយចិនផ្ទាល់ គឺ C909 regional ចំនួន២០គ្រឿង ។ លោកបានអះអាងថា នៅក្នុងចំណោមយន្តហោះទាំងនោះ ១០គ្រឿងត្រូវបានបញ្ជាក់ការបញ្ជាទិញ និងចំនួន១០ គ្រឿងផ្សេងទៀត មានបំណងបញ្ជាទិញ។
លោកបានបន្តថា ភាគីទាំងពីរក៏គ្រោងនឹងសហការគ្នាលើវិស័យការបញ្ជាទិញយន្តហោះ ការគាំទ្រប្រតិបត្តិការ និងបណ្ដុះបណ្ដាលផលិតកម្មជាដើម ។ នេះគឺជាវឌ្ឍនភាពថ្មីនៃកិច្ចសហប្រតិបត្តិការក្នុងវិស័យដែនអាកាសនៃប្រទេសទាំងពីរ ដែលមានអត្ថប្រយោជន៍សំខាន់សម្រាប់ភាគីទាំងពីរ។
យន្តហោះ Comac C909 ជាយន្តហោះជំនាន់ថ្មីដែលមានឈ្មោះដើមថា ARJ21 Xiangfeng ។ នេះគឺជាយន្តហោះក្នុងតំបន់ ដែលមាន៧៨ ទៅ៩០កៅអី ដែលផលិតដោយក្រុមហ៊ុនអាកាសចរណ៍រដ្ឋចិន Comac ។
យន្តហោះនេះ ត្រូវបានចាប់ផ្តើមអភិវឌ្ឍន៍នៅក្នុងខែមីនា ឆ្នាំ២០០២ ហើយបានធ្វើការហោះហើរលើកដំបូង នៅថ្ងៃទី២៨ ខែវិច្ឆិកា ឆ្នាំ២០០៨ ហើយក៏ចាប់ផ្តើមទទួលបានការទទួលស្គាល់ពីស្ថាប័នអាកាសចរណ៍នានានៅក្នុងប្រទេសចិន និងអន្តរជាតិ ។
តាមរបាយការណ៍របស់ក្រុមហ៊ុនបានឲ្យដឹងថា មកដល់ឆ្នាំ២០២៥ ក្រុមហ៊ុនបានផលិតនឹងចែកចាយយន្តហោះប្រភេទនេះសរុប១៧២គ្រឿង ហើយត្រូវបានក្រុមហ៊ុនអាកាសចរណ៍ក្នុងស្រុក និងក្រុមហ៊ុនដឹកជញ្ជូនក្រៅប្រទេសនៅក្នុងប្រទេសឥណ្ឌូនេស៊ី វៀតណាម និងឡាវ ប្រើប្រាស់។ យន្តហោះនេះ ត្រូវបានរចនាឡើងជាមួយនឹងបន្ទុកអតិបរមា១០តោន ហើយអាចហោះបានចម្ងាយ
រហូតដល់៣.៧០០ គីឡូម៉ែត្រ ។
ចែករំលែកព័តមាននេះ