ទីក្រុងបាងកក៖ ប្រទេសថៃបិទដំណើរសួនសត្វសាហ្វារីមួយកន្លែងនៅទីក្រុងបាងកកជាបណ្ដោះអាសន្នបន្ទាប់ពីមានករណីស្លាប់បុគ្គលិកម្នាក់ដែលត្រូវសត្វតោមួយហ្វូងព្រួតគ្នាខាំ។ ការខាំសម្លាប់នេះកើតឡើងនៅនឹងមុខភ្ញៀវទេសចរដែលទៅកម្សាន្តនៅសួនសត្វនោះ មើលទៅហាក់ដូចជារន្ធត់ និងព្រឺសម្បុរណាស់។ ហេតុការណ៍នេះធ្វើឱ្យបារម្ភអំពីសុវត្ថិភាព និងការប្រតិបត្តិរបស់សួនសត្វ។
នគរបាលថៃចាប់ផ្ដើមស៊ើបអង្កេតសំណុំរឿងនេះហើយបន្ទាប់ពីរូបវីឌីអូឃ្លីបសត្វតោខាំសម្លាប់មនុស្សត្រូវគេបង្ហោះព្រោងព្រាតនៅលើបណ្ដាញសង្គម។ ក្រោយហេតុការណ៍នេះ នាយកដ្ឋានសួនសត្វបានបញ្ជូនបុគ្គលិករបស់ខ្លួនចុះទៅកន្លែងកើតហេតុ។ សាក្សីនិយាយថាហេតុការណ៍នេះកើតឡើងនៅក្នុងទីតាំងដែលអ្នកទេសចរអាចជិះឡានមើលសត្វនៅទីចំហ។ មានន័យថាសត្វតោមិនបានដាក់ទ្រុងទេ ប៉ុន្តែត្រូវគេលែងឱ្យដើរពាសវាលពាសកាល។
រហូតមកដល់ពេលនេះ គេមិនទាន់ដឹងលម្អិតអំពីស្ថានភាពនៅពេលកើតហេតុនោះទេ។ សួនសត្វនេះមានវិន័យតឹងរ៉ឹងហាមដាច់ខាតមិនឱ្យនរណាម្នាក់ចាកចេញពីក្នុងឡានទេទោះបីអ្នកនោះជាភ្ញៀវទេសចរក្ដី ឬជាបុគ្គលិកសួនសត្វក្ដី។ សួនសត្វនេះបើកដំណើរការរយៈពេល៤០ឆ្នាំហើយពុំដែលមានហេតុការណ៍អាក្រក់កើតឡើងទេ។ ដូច្នេះនេះជាលើកទី១។ នៅក្នុងចំណោមសត្វតោសរុប៣២ក្បាលនៅក្នុងសួនសត្វនេះ ៥ក្បាលបានព្រួតគ្នាខាំបុគ្គលិកសួនសត្វរហូតដល់ស្លាប់។ ជនរងគ្រោះរូបនោះមានបទពិសោធជិត៣០ឆ្នាំមកហើយក្នុងការមើលការខុសត្រូវលើសត្វ។ គាត់ជាអ្នកទទួលបន្ទុកខាងគ្រប់គ្រងសត្វសហាវៗ។
ប្រភពខ្លះថាជនរងគ្រោះដែលជាបុគ្គលិកផ្នែកឱ្យចំណីតោ។ នៅថ្ងៃកើតហេតុ គាត់ត្រូវសត្វតោ៦ឬ៧ក្បាលព្រួតគ្នាខាំបន្ទាប់ពីគាត់ដើរចេញពីក្នុងឡាន។ អ្នកទេសចរម្នាក់រៀបរាប់ថាបុគ្គលិករូបនោះបានចុះពីលើឡាន។ បន្ទាប់មក គាត់ឈរតែម្នាក់ឯង និងបែរខ្នងដាក់តោ។ គាត់ឈរបែរខ្នងប្រហែល៣នាទីស្រាប់តែតោមួយក្បាលដើរលបៗទៅក្បែរគាត់ និងក្រសោបរាងកាយរបស់គាត់ពីក្រោយ។ នៅពេលនោះគាត់មិនបានស្រែកដោយការភ័យខ្លាចទេ។ នេះបើយោងតាមដឹណេសិន និងប្រភពដទៃទៀត៕
ចែករំលែកព័តមាននេះ