រាជធានីភ្នំពេញ ៖ ព្រះករុណាព្រះបាទព្រះបរមនាថនរោត្តមសីហមុនីព្រះមហាក្សត្រនៃព្រះរាជាណាចក្រកម្ពុជាបានមានព្រះបន្ទូលថាប្រទេសចិនបានដើរតួនាទីយ៉ាងសំខាន់ក្នុងការបង្កើតសណ្តាប់ធ្នាប់អន្តរជាតិដោយសន្តិវិធី បន្ទាប់ពីសង្គ្រាម ដោយផ្អែកលើគោលបំណងធម្មនុញ្ញរបស់អង្គការសហប្រជាជាតិ ។ នេះបើតាមការលើកឡើងរបស់ឯកអគ្គរដ្ឋទូតសាធារណរដ្ឋប្រជាមានិតចិន ។
ឯកឧត្តម វ៉ាង វិនបិន ឯកអគ្គរដ្ឋទូតសាធារណរដ្ឋប្រជាមានិតចិនប្រចាំនៃកម្ពុជាបានសរសេរលើបណ្ដាញសង្គមនៅថ្ងៃ១១ ខែកញ្ញា ឆ្នាំ២០២៥ថា ព្រះករុណាព្រះមហាក្សត្រកម្ពុជាបានសព្វព្រះរាជហឫទ័យទទួលកិច្ចសម្ភាសន៍ជាពិសេសជាមួយសារព័ត៌មានចិន People’s Daily ថា ឆ្នាំនេះជាខួបអនុស្សាវរីយ៍លើកទី ៨០ នៃជ័យជម្នះសង្គ្រាមប្រជាជនចិនប្រឆាំងនឹងការឈ្លានពានរបស់ជប៉ុន និងសង្គ្រាមប្រឆាំងហ្វាស៊ីសពិភពលោក។
ប្រជាជនចិនជាមួយនឹងការលះបង់ប្រជាជាតិដ៏ធំធេង បានទ្រទ្រង់សមរភូមិសំខាន់នៅទិសបូព៌ាចំពោះសង្គ្រាមប្រឆាំងហ្វាស៊ីសពិភពលោក បានរួមចំណែកដ៏សំខាន់ដើម្បីយកជ័យជម្នះប្រឆាំងនឹងហ្វាស៊ីស ទទួលបានការចងចាំជារៀងរហូត។
ព្រះមហាក្សត្របានបញ្ជាក់ថា «ប្រទេសចិនបានដើរតួនាទីយ៉ាងសំខាន់ក្នុងការបង្កើតសណ្តាប់ធ្នាប់អន្តរជាតិដោយសន្តិវិធី បន្ទាប់ពីសង្គ្រាម ដោយផ្អែកលើគោលបំណងធម្មនុញ្ញរបស់អង្គការសហប្រជាជាតិ និងសមភាពអធិបតេយ្យភាព ការគោរពគ្នាទៅវិញទៅមក និងកិច្ចសហប្រតិបត្តិការជោគជ័យរួម» ។
ព្រះអង្គក៏មានព្រះបន្ទូលទៀតថា ទំនាក់ទំនងរវាងចិន-កម្ពុជា បានវិវត្តន៍ទៅជាសហគមន៍វាសនារួមរវាងចិន-កម្ពុជាគ្រប់រដូវកាលក្នុងយុគសម័យថ្មី គឺជានិមិត្តរូបនៃទំនុកចិត្តនិងសាមគ្គីភាពដ៏ជ្រាលជ្រៅរវាងប្រទេសទាំងពីរ ហើយបានបើកនូវចក្ខុវិស័យនៃការអភិវឌ្ឍន៍កាន់តែទូលំទូលាយសម្រាប់កិច្ចសហប្រតិបត្តិការជាយុទ្ធសាស្ត្រគ្រប់ជ្រុងជ្រោយ ជាពិសេសគឺការផ្លាស់ប្តូររូបរាងបៃតង ការតភ្ជាប់បណ្ដាញទូរគមនាគមន៍ និងវិស័យច្នៃប្រឌិតបច្ចេកវិទ្យា ។
នៅក្នុងវិស័យតភ្ជាប់បណ្ដាញទូរគមនាគមន៍ ប្រទេសទាំងពីរនឹងជំរុញសមាហរណកម្មសេដ្ឋកិច្ចក្នុងតំបន់ដោយការពង្រឹងហេដ្ឋារចនាសម្ព័ន្ធ ភស្តុភារ និងការតភ្ជាប់បណ្ដាញទូរគមនាគមន៍ឌីជីថល។ នៅក្នុងវិស័យច្នៃប្រឌិតបច្ចេកវិទ្យា នឹងពង្រីកយ៉ាងសកម្មនូវកិច្ចសហប្រតិបត្តិការផ្នែកអប់រំ ការស្រាវជ្រាវវិទ្យាសាស្ត្ររួមគ្នា និងការផ្លាស់ប្តូររូបរាងឌីជីថល ដើម្បីបង្កើតឱកាសអភិវឌ្ឍន៍បន្ថែមទៀតសម្រាប់យុវជននៃប្រទេសទាំងពីរ ៕
ចែករំលែកព័តមាននេះ