ខេត្តស្វាយរៀង ៖ មហាជនបានឲ្យដឹងថា មានករណីជនបរទេសមួយក្រុម សង្ស័យជាជនជាតិវៀតណាម ឬជនជាតិចិន ជិះរថយន្តចំនួន២គ្រឿងតាមបណ្តោយផ្លូវជាតិលេខ១ ពីទិសខាងកើតទៅលិច លុះមកដល់ចំណុចខាងកើតផ្សារប្រសូត្រ ស្រាប់តែបន្ថយល្បឿន រួចបើកចូលចតនៅលើចិញ្ចើមផ្លូវ ហើយក៏នាំគ្នាចុះពីលើរថយន្តមួយគ្រឿង ឡើងទៅជិះរថយន្តមួយគ្រឿងទៀត យ៉ាងប្រញាប់ប្រញាល់ ដោយទុករថយន្តមួយគ្រឿងចោលដោយមិនបានទាំងពន្លត់ម៉ាស៊ីនផង មិនដឹងថា មានរឿងអ្វីទេ ។
ក្រោយពីប្រជាពលរដ្ឋប្រទះឃើញគេប្លុងរថយន្តមួយគ្រឿង ចោលតាមបណ្តោយផ្លូវជាតិលេខ១ បែបនេះ ក៏បានរាយការណ៍មកសមត្ថកិច្ច ដើម្បីចុះពិនិត្យអន្តរាគមន៍ ដោយក្នុងរថយន្តនេះ មានអាវុធខ្លី មិនស្គាល់ម៉ាកមួយដើម នៅក្នុងរថយន្ត ។
ករណីជនបរទេសយករថយន្តមកប្លុងចោលនេះ កើតឡើងនៅវេលាម៉ោង១១:១៥នាទីព្រឹក ថ្ងៃទី៩ ខែកញ្ញា ឆ្នាំ២០២៥ ។ បន្ទាប់មក គេឃើញរថយន្តមួយគ្រឿងទៀត បានចតប្លុងចោលនៅតាមបណ្តោយផ្លូវជាតិលេខ១ ខាងលិចស្ពានប្រសូត្រ ស្ថិតក្នុងភូមិទួលអង្គប់ ឃុំសំបួរ ស្រុកស្វាយទាប ។
បើតាមសមត្ថកិច្ចបានឲ្យដឹងថា រថយន្តទី១ ដែលចតប្លុងចោល ម៉ាកកាមរីបាឡែន ពណ៌ប្រផេះ ពាក់ស្លាកលេខ ភ្នំពេញ 2W-7889 ចតទុកចោលស្ថិតនៅក្នុងភូមិប្រសូត្រ១ ឃុំកណ្តៀងរាយ ស្រុកស្វាយទាប និងរថយន្តទី២ ម៉ាកកាមរី ឆ្នាំ០៧ ពណ៌ទឹកប្រាក់ ពាក់ស្លាកលេខភ្នំពេញ 2Y-9742 ចតប្លុងចោលនៅខាងលិចគល់ស្ពានប្រសូត្រ ស្ថិតក្នុងភូមិទួលអង្គប់ ឃុំសំបូរ ស្រុកស្វាយទាប ។
ចំពោះករណីនេះ ពុំទាន់ដឹងថា ជាករណីអ្វីនោះទេ ព្រោះសមត្ថកិច្ចកំពុងតែធ្វើការស្រាវជ្រាវ សង្ស័យជាករណីចាប់ជំរិត ដោយជនសង្ស័យមានប្រើប្រាស់អាវុធ ហើយត្រូវប្តូររថយន្តជាបន្តបន្ទាប់ ដើម្បីបង្វែងដាន និងគេចខ្លួន ។
ព័ត៌មានលម្អិត រង់ចាំសមត្ថកិច្ចស្រាវជ្រាវបញ្ចប់នឹងផ្សាយជូននៅពេលក្រោយ ៕
ចែករំលែកព័តមាននេះ