រាជធានីភ្នំពេញ៖ នៅសារមន្ទីរជាតិកម្ពុជា ពិធីប្រគល់-ទទួល «កីតម្បាញ និងក្រមាវែងជាងគេលើពិភពលោក» បានរៀបចំឡើង ។ ពិធីដែលរៀបចំឡើងកាលពីព្រឹកថ្ងៃទី១៩ ខែសីហា ឆ្នាំ២០១៨នេះ…
រាជធានីភ្នំពេញ៖ នៅសារមន្ទីរជាតិកម្ពុជា ពិធីប្រគល់-ទទួល «កីតម្បាញ និងក្រមាវែងជាងគេលើពិភពលោក» បានរៀបចំឡើង ។ ពិធីដែលរៀបចំឡើងកាលពីព្រឹកថ្ងៃទី១៩ ខែសីហា ឆ្នាំ២០១៨នេះ ។
ក្រោមអធិបតីភាពលោកជំទាវភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ ព្រមទាំងមានការចូលរួមពីលោកហ៊ុន ម៉ានី ប្រធានសហភាពសហព័ន្ធយុវជនកម្ពុជា , លោកឃួង ស្រេង អភិបាលរាជធានីភ្នំពេញ, លោកសាយ សំអាល់ រដ្ឋមន្ត្រីក្រសួងបរិស្ថាន ។
កម្ពុជាបានបង្កើតកំណត់ត្រាក្រមាវែងបំផុតលើពិភពលោក១.១៤៩ម៉ែត្រត្រឹមពេល៦ខែ។ ការរក្សាស្នាដៃក្រមាដ៏មានតម្លៃនៅសារមន្ទីរជាតិ ដើម្បីឲ្យប្រជាពលរដ្ឋខ្មែរទូទាំងប្រទេស និងភ្ញៀវអន្តរជាតិចូលទស្សនា ។ ទាក់ ទិនបច្ចេកទេសរក្សាទុក អ្នកជំនាញមានក្ដីព្រួយបារម្ភខ្លាចសណ្ឋាននៃក្រមាប្រែប្រួលរូបរាងនាថ្ងៃមុខ ។ លោកគង់ វីរៈ ប្រធាននាយកដ្ឋាន សារមន្ទីរឲ្យដឹងថា ក្រមាអាចប្រែពណ៌ យើង មិនអាចទប់ស្កាត់បាន១០០ភាគរយទេ ។
បញ្ហា បារម្ភនោះ គឺក្រមាក៏មិនខុសពីក្រណាត់ដទៃទេ ងាយរងប៉ះពាល់ពីពន្លឺ និងសំណើម ដោយ ហេតុថា សារមន្ទីរមិនទាន់មានបន្ទប់រក្សាវាយនភណ្ឌដែលមានលក្ខខណ្ឌគ្រប់គ្រាន់នៅឡើយ។ «យើងមិនអាចការពារពេញលេញ តែយើង កាត់បន្ថយកុំឲ្យក្រមាស្លកពណ៌ រងផលប៉ះពាល់ ពីសំណើមបាន យើងអាចប្រើក្រណាត់ខ្មៅគ្រប លើវាពេលបិទទ្វារ និងក្នុងករណីខ្លះទៀត យើងនឹងរៀបចំកាលវិភាគតាំងបង្ហាញក្រមាមិនអាចបើកពេញមួយឆ្នាំបានទេ និងតាមដាន សាច់ក្រមារៀងរាល់៣ខែម្ដង ក្រែងលោមាន សត្វស៊ី។
យ៉ាងណាក្ដីទីតាំងសារមន្ទីរ ជាទីតាំង អនុគ្រោះមួយ ទទួលពន្លឺមិនផ្ទាល់ខ្លាំង ដល់ការរក្សាទុកវត្ថុបុរាណនានា ជាពិសេសក្រមា ដែលអាចការពារបានខ្លះ »។
លោកហ៊ុន ម៉ានី ប្រធាន សហភាពសហព័ន្ធ យុវជនកម្ពុជា និងជាសហស្ថាបនិកបង្កើតក្រមាវែងបង្អស់របស់កម្ពុជាជាមួយក្រុមការងារ GoGo Cambodia លើកឡើងថា ក្រុមការងារទាំងអស់នឹងនៅតែរង់ចាំ ជួយបន្តទៀតទាំងកម្លាំង និងថវិកា ប្រសិនបើមានការស្នើសុំពីខាងសារមន្ទីរ ។
យុទ្ធនាការក្រមាការបង្កើតឯកតទគ្គកម្មក្រមាវែងជាងគេលើពិភពលោក១.០០០ម៉ែត្រ ក្រោមការដឹកនាំរបស់លោកហ៊ុន ម៉ានី និងចលនា Go Go Cambdia បានរៀបចំកម្មវិធី«រួមគ្នាជឿថាខ្មែរអាចធ្វើបាន» ដើម្បីរួមត្បាញក្រមានៃកម្មវិធី«បង្កើតឯតទគ្គកម្មក្រមាវែងជាងគេនៅលើពិភពលោក»បានចាប់ផ្ដើមកាលពីថ្ងៃទី១៤ ខែកុម្ភៈ ឆ្នាំ២០១៨ នៅទីតាំងសួនច្បារវាលព្រះមេរុ ។
យុទ្ធនាការបានធ្វើយ៉ាងទូលំទូលាយ និងមាន ការចូលរួមពីមន្ត្រីគ្រប់ជាន់ថ្នាក់ និងប្រជាពលរដ្ឋគ្រប់មជ្ឈដ្ឋាន ។ យុទ្ធនាការក្រមា៖ «បំបែកឯតទគ្គកម្មក្រមាវែងជាងគេលើពិភពលោក» ធ្វើឡើងក្នុងគោលបំណងលើកកម្ពស់មោទនភាពជាតិ និងកិត្យានុភាពជាតិនៅលើ ឆាកអន្តរជាតិ ។ បង្កើតការចូលរួមចំណែកពីប្រជាជនកម្ពុជាគ្រប់មជ្ឈដ្ឋានទាំងអស់ដើម្បីរួម គ្នាថែរក្សា និងលើកស្ទួយមត៌កវប្បធម៌ ប្រពៃណី ខ្មែរ និងជំរុញឲ្យមានសាមគ្គីភាព ៕
ចែករំលែកព័តមាននេះ