រាជធានីភ្នំពេញ ៖ តារាសម្តែងនាង រចនា រ៉ាវ៉ាឌី បានទម្លាយនូវរឿងរ៉ាវជីវិតពិតមួយ ដែលនាងកំពុងឆ្លងកាត់ដែលខុសគ្នាស្រឡះពីអ្វីដែលមហាជនមើលឃើញរូបភាពខាងក្រៅដែលនាងកំពុងតែមានភាពសប្បាយរីករាយ ហ៊ីហា នៅក្នុងដំណើរលើវិថីសិល្បៈរបស់នាងនាពេលបច្ចុប្បន្ននេះ ។…
រាជធានីភ្នំពេញ ៖ តារាសម្តែងនាង រចនា រ៉ាវ៉ាឌី បានទម្លាយនូវរឿងរ៉ាវជីវិតពិតមួយ ដែលនាងកំពុងឆ្លងកាត់ដែលខុសគ្នាស្រឡះពីអ្វីដែលមហាជនមើលឃើញរូបភាពខាងក្រៅដែលនាងកំពុងតែមានភាពសប្បាយរីករាយ ហ៊ីហា នៅក្នុងដំណើរលើវិថីសិល្បៈរបស់នាងនាពេលបច្ចុប្បន្ននេះ ។
គេតែងនិយាយថា ជីវិតពិតខុសពីការសម្តែង ដូចតារាស្រីរូបនេះដែលធ្លាប់តែសម្តែងពីភាពហ៊ឺហា និងផ្តល់ភាពសប្បាយរីករាយតាមរយៈការសម្តែង ប៉ុន្តែជីវិតពិតដែលស្ថិតនៅពីក្រោយខ្នងរបស់តារាស្រីនាង រចនា រ៉ាវ៉ាឌី គឺមិនដូចគ្នានោះឡើយ ពោលនាងកំពុងឆ្លងកាត់នូវបញ្ហាជីវិតជាច្រើននឹកស្មានមិនដល់ ខណៈពេលដែលនាងកំពុងស្ថិតក្នុងភាពជាយុវវ័យក៏ដោយ ។
តាមរយៈបទសម្ភាសន៍នៅក្នុងកម្មវិធីទូរទស្សន៍ក្នុងស្រុកមួយតារាសម្តែងនាង រចនា រ៉ាវ៉ាឌី បានរៀបរាប់ជីវិតក្រោយឆាកសម្តែងរបស់ខ្លួនទាំងទឹកភ្នែកថា កន្លងមកនាងតែងតែសួរខ្លួនឯងថា ហេតុអ្វីនាងកើតមកមិនដូចគេឯងអញ្ចឹង ព្រោះនាពេលនេះ នាងទើបតែមានវ័យ២៣-២៤ឆ្នាំប៉ុណ្ណោះ ហេតុអ្វីនាងត្រូវឆ្លងកាត់ជីវិតដែលមានរឿងច្រើនម្ល៉េះ ។ នាងនិយាយថា ខ្ញុំកើតមកនៅក្នុងគ្រួសារដែលមានឪពុកម្តាយផ្តល់ភាពកក់ក្តៅឲ្យខ្ញុំ ទោះបីជាគ្រួសារអត់ក៏ដោយ ។ ខ្ញុំមានសំណាងត្រង់នឹង ប៉ុន្តែហេតុអ្វីខ្ញុំគ្មានសំណាងចាយពេលវេលាភាពជាយុវជនរបស់ខ្លួនដូចគេ ។ វ័យគេខ្លះគេអាចរកលុយបាន គេអាចសប្បាយជាមួយនឹងគ្រឿងតុបតែងខ្លួន គ្រឿងលម្អបែបប្រ៊េនៗ និងសប្បាយជាមួយអ្វីដែលគេចង់បាន ប៉ុន្តែហេតុអីបានជាខ្ញុំមិនមានទាំងអស់នឹង ។
យ៉ាងណានាងបញ្ជាក់ថា រឿងមួយនេះមិនមានអ្នកណាម្នាក់មកដាក់សម្ពាធ ឬហាមឃាត់មកលើរូបនាងឡើយ ពោល គឺរូបនាងខ្លួនឯង ដោយនាងតែងគិតពីគ្រួសារជាធំធ្វើយ៉ាងណាឲ្យឪពុកម្តាយបានរស់នៅស្រួលជាមុនសិន ហើយខ្លួនឯងតាមក្រោយ ។
រចនា រ៉ាវ៉ាឌី បានលើកឡើងបន្ថែមថា នាងជាកូនពៅ ប៉ុន្តែបន្ទុកគ្រួសារ គឺនាងលើសជាងកូនច្បងទៀត ដូច្នេះពេលខ្លះនាងក៏អន់ចិត្តខ្លួនឯងដែរ ប៉ុន្តែនាងមិនដែលបានបង្ហាញភាពលំបាកអស់ទាំងនេះទៅកាន់ឪពុកម្តាយរបស់នាងឡើយ ព្រោះមិនចង់ឲ្យពួកគាត់ពិបាកចិត្ត ដោយសារពួកគាត់ទាំងពីរកំពុងមានជំងឺដូចគ្នា ។
ទោះជាយ៉ាងណាតាមរយៈការទម្លាយរឿងរ៉ាវពិតនាពេលនេះ រចនា រ៉ាវ៉ាឌី រំពឹងថា ឪពុកម្តាយនាងនឹងបានឃើញទិដ្ឋភាពរបស់នាង នាពេលនេះដែលពួកគាត់មិនធ្លាប់ឃើញ ប៉ុន្តែនាងសូមឪពុកម្តាយរបស់នាងកុំមានការបារម្ភពីរូបនាង ព្រោះពេលនេះនាងធំហើយ មិនមែនតូចដូចមុនឡើយ ហើយនឹងបន្តខិតខំធ្វើយ៉ាងណាឲ្យឪពុកម្តាយរបស់នាងបានរស់នៅដោយសប្បាយចិត្ត សមតាមបំណង និងអ្វីដែលនាងបានលះបង់ ។
ជាការកត់សម្គាល់តារាសម្តែងនាង រចនា រ៉ាវ៉ាឌី គឺជាតារាមួយរូបដែលកំពុងមានទីផ្សារការងារសិល្បៈច្រើនក្នុងពេលដែលនាងតែងតែទទួលបានតំណែងជាតួឯកជាបន្តបន្ទាប់តាមរយៈភាពយន្តភាគដែលចាក់ផ្សាយតាមបណ្តាស្ថានីយ៍ទូរទស្សន៍ ។ ស្របពេលដែលនាងកំពុងមានឱកាសអាចរកប្រាក់ពីអាជីពសិល្បៈរបស់ខ្លួននាពេលនេះ រចនា រ៉ាវ៉ាឌី ក៏បង្ហាញសកម្មភាពជុំគ្រួសារយ៉ាងមានសុភមង្គល ហើយតែងតែបំពេញបំណង និងការតបស្នងសងគុណចំពោះឪពុកម្តាយតាមរយៈការទិញរបស់របរ និងគ្រឿងអលង្កាដែលមានតម្លៃជាបន្តបន្ទាប់សម្រាប់អ្នកមានគុណរបស់នាងផងដែរ ៕
ចែករំលែកព័តមាននេះ