ជាការពិត សម័យបច្ចុប្បន្នជាសម័យឌីជីថល ដូច្នេះ រាល់ការរស់នៅ ឬការដើរលេង ទិញ-លក់ គឺសុទ្ធតែមានប្រើប្រព័ន្ធឌីជីថលទាំងអស់ និងកាន់តែទំនើបពីមួយថ្ងៃទៅមួយថ្ងៃ ។ បងប្អូនយើងតែងតែងប្រើប្រព័ន្ធQR…
ជាការពិត សម័យបច្ចុប្បន្នជាសម័យឌីជីថល ដូច្នេះ រាល់ការរស់នៅ ឬការដើរលេង ទិញ-លក់ គឺសុទ្ធតែមានប្រើប្រព័ន្ធឌីជីថលទាំងអស់ និងកាន់តែទំនើបពីមួយថ្ងៃទៅមួយថ្ងៃ ។ បងប្អូនយើងតែងតែងប្រើប្រព័ន្ធQR Code ទូទាត់ប្រាក់ ជំនួសការហុចជាសាច់លុយនៅតាមបណ្តាហាងទំនិញ តាមហាងអាហារ ឬតាមកន្លែងលក់ដូរតូចតាចក៏មានប្រើដែរនូវផ្ទាំងQRបាញ់លុយរបស់ធនាគារគ្រប់ប្រភេទ ។
ក៏ប៉ុន្តែយើងត្រូវប្រយ័ត្ន ព្រោះការប្រើប្រព័ន្ធបាញ់លុយតាមQR ក៏មិនមានប្រើគ្រប់កន្លែងនោះដែរ ព្រោះបងប្អូនអ្នកលក់ដូរខ្លះគាត់មិនប្រើនោះទេ ព្រោះពួកគាត់គិតថា«ពិបាក» មិនមានអីស្រួលជាងការទទួលលុយសុទ្ធនោះឡើយ ។
ចុះបើយើងជួបកន្លែងលក់ដែលម្ចាស់ហាងគ្មានប្រើ QRCode បាញ់លុយនេះ ហើយយើងក៏មិនបានសួរនាំអ្នកលក់ជាមុនទៀត ទន្ទឹមនោះ នៅក្នុងខ្លួនយើង ក៏គ្មានលុយនៅក្រៅមួយរៀលដែរ តើយើងគួរដោះស្រាយបែបណា?
រឿងពិតមួយបានកើតឡើង ដែលបុរសម្នាក់សុំមិនបញ្ចេញឈ្មោះបានឱ្យកោះសន្តិភាពដឹង ដែលគាត់និយាយថា «នេះចាត់ទុកជារឿងអាម៉ាស់មួយ តែក៏ចង់អស់សំណើចដែរ និងចង់មកចែករំលែកបទពិសោធន៍ពិតនេះជូនបងប្អូនយើងឱ្យបានដឹង ដើម្បីត្រៀមទុកលុយនៅក្នុងហោប៉ៅយើងផង កុំឱ្យជួបដូចករណីគាត់ ។
លោកបន្តថា ថ្ងៃមួយនោះ គ្រួសារគាត់មានគ្នាប្រហែល៥-៦នាក់ ជិះរថយន្តមួយគ្រឿង ដើរលេងនៅតាមផ្លូវជាតិលេខ០១ (ផ្លូវទៅកាន់ស្អាង) ។ លុះជិះមកដល់ទីតាំងហាងលក់ស៊ុបគោ ដែលមានទីតាំងធំគួរសមដែរ ក៏បានឈប់រថយន្តនាំគ្នាចូលទៅហូប ដោយមិនបានគិតសួរនាំអ្នកលក់រឿងមាន QR Codeបាញ់នោះទេ ។
លោកថា គ្រួសារគាត់បានកុម្មង់ស៊ុបតាមអ្វីដែលចង់ហូបរៀងៗខ្លួន មួយសន្ទុះក្រោយមក ក៏ញ៉ាំរួចរាល់ ក៏ហៅអ្នកលក់មកគិតលុយ ហើយសួរអ្នកលក់ថា «តើមានQRបាញ់លុយទេ? ពេលនោះហើយធ្វើឱ្យគាត់ធ្លាក់ថ្លើមក្ឌុកតែម្តង ដោយអ្នកលក់ឆ្លើយថា «អត់មានទេពូ» ។ គាត់សួរទៀតថា ចុះមានកុងWingទេ? អ្នកលក់ក៏ឆ្លើយថា «ស្អីក៏គ្មានដែរ» ។
គ្រាន់តែឮហើយ ធ្វើឱ្យក្រុមគ្រួសារគាត់ម្នាក់ៗគាំងមើលមុខគ្នា និងនិយាយលែងចេញ ក៏ជ្រើសវិធីឱ្យពួកគាត់នៅចាំទីនេះចាំសិន ដោយគាត់បើករថយន្តចេញទៅរកកន្លែងដកលុយ ដើម្បីឱ្យទៅកាន់អ្នកលក់ ។
ដូច្នេះ នេះហើយជាសារចង់ប្រាប់បងប្អូនយើង ពេលមានដំណើរទៅណាមកណា កុំភ្លេចដាក់លុយសុទ្ធជាប់ហោប៉ៅផង ព្រោះកន្លែងលក់ដូរខ្លះ គាត់នៅមិនទាន់មានប្រើប្រព័ន្ធទាន់សម័យនោះទេ កុំអាងមានលុយតែក្នុងកុងធនាគារឱ្យសោះ ។
ចុះចំពោះបងប្អូនយើងវិញ តើធ្លាប់ជួបហេតុការណ៍បែបនេះហើយឬនៅ?
ចែករំលែកព័តមាននេះ