រាជធានីភ្នំពេញ ៖ កម្លាំងសមត្ថកិច្ចនគរបាលការិយាល័យព្រហ្មទណ្ឌកម្រិតស្រាល រាជធានីភ្នំពេញ កាលពីថ្ងៃទី១៦ ខែសីហា ២០១៨ បានធ្វើការឃាត់ខ្លួនជនសង្ស័យជាមុខសញ្ញាឆក់ទ្រព្យសម្បត្តិប្រជាពលរដ្ឋចំនួន២នាក់ ហើយបើតាមចម្លើយពួកគេថា កន្លងមកធ្លាប់បានធ្វើសកម្មភាពឆក់ចំនួន៦លើកនេះគ្រាន់បាននៅចាំ ហើយមិនចាំអាចលើសនេះទៀត ។
ជនសង្ស័យម្នាក់ឈ្មោះ ធឿន វេហា ភេទប្រុស អាយុ១៥ឆ្នាំ មុខរបរជាងភ្លើង និងស្នាក់នៅផ្ទះជួល ផ្លូវលំ ភូមិសន្សំកុសល២ សង្កាត់បឹងទំពុន១ ខណ្ឌមានជ័យ រាជធានីភ្នំពេញ ។ និងម្នាក់ឈ្មោះ នូវ ធូសេន ភេទប្រុស អាយុ២៧ឆ្នាំ មុខរបរមិនពិតប្រាកដ ស្នាក់នៅផ្ទះលេខ៧១ ផ្លូវលំ ភូមិជ្រោយបាសាក់ សង្កាត់ព្រែកប្រា ខណ្ឌច្បារអំពៅ រាជធានីភ្នំពេញ ។
លោកវរសេនីយ៍ ប៊ុន សត្យា នាយការិយាល័យនគរបាលព្រហ្មទណ្ឌកម្រិតស្រាលរាជធានីភ្នំពេញបានឲ្យដឹង នាវេលាម៉ោង១១ព្រឹកកម្លាំងជំនាញរបស់ការិយាល័យស្រាវជ្រាវឃាត់ខ្លួនបទល្មើសជាក់ស្តែងបានជនសង្ស័យ២នៅចំណុចផ្លូវ១៥៤ កែងផ្លូវព្រះមុន្នីវង្ស សង្កាត់ផ្សារថ្មី២ ខណ្ឌដូនពេញ រាជធានីភ្នំពេញ ពាក់ព័ន្ធប្រព្រឹត្តបទល្មើសអំពើលួច មានស្ថានទម្ងន់ទោស (ឆក់ទ្រព្យសម្បត្តិ) ចំនួន៦លើក និងចាប់ដកហូតវត្ថុតាងម៉ូតូ១គ្រឿង ជាមធ្យោបាយសម្រាប់ជិះធ្វើសកម្មភាព ។
លោកបន្តថាឆក់លើកទី១ បានទូរស័ព្ទដៃម៉ាក IPhoneX ពណ៌ខ្មៅមួយគ្រឿង ផ្លូវលេខ៩០ កែងផ្លូវលេខ៦១ ភូមិ១០ សង្កាត់វត្តភ្នំអូឡាំពិក ខណ្ឌដូនពេញ រាជធានីភ្នំពេញ នាថ្ងៃទី១៦ សីហា ២០១៨ វេលាម៉ោង១២និង១៥នាទី ពីជនរងគ្រោះឈ្មោះ YANG CHUN KAI ភេទប្រុស អាយុ២៥ឆ្នាំ ជនជាតិតៃវ៉ាន់ កាន់លិខិតឆ្លងដែនលេខ៣១១៦៥២៨៥៧ មុខរបរទេសចរណ៍ ស្នាក់នៅសណ្ឋាគារ Billabng សង្កាត់បឹងរាំង ខណ្ឌដូនពេញ ។ សម្ភារបាត់បង់ទូរស័ព្ទដៃម៉ាក IPhoneX ពណ៌ខ្មៅ ។ ករណីទី២ ឆក់ទូរសព្ទ័ដៃម៉ាក IPhoneX ពណ៌ខ្មៅ នៅចំណុចផ្លូវព្រះសីហនុ កែងវត្តមហាមន្ត្រី សង្កាត់អូរឡាំពិក ខណ្ឌចម្ការមន រាជធានីភ្នំពេញ កាលពីថ្ងៃទី២២ ខែកក្កដា ឆ្នាំ២០១៨ វេលាម៉ោងប្រហែល១០និង១០នាទីយប់ពីមនុស្សប្រុសម្នាក់ជនជាតិចិនកំពុងជិះ Pas app ។ ករណីទី៣ ឆក់ទូរស័ព្ទដៃម៉ាក អាយហ្វូន X ពណ៌ស នៅចំណុចផ្លូវព្រះមុន្នីវង្ស កែងស្ថានីយប្រេង សង្កាត់បឹងកេងកង១ ខណ្ឌចំការមន កាលពីថ្ងៃមិនចាំ ខែមិថុនា ឆ្នាំ ២០១៨ វេលាម៉ោងប្រហែល៨និង៤០នាទីយប់ ពីមនុស្សប្រុសម្នាក់ជនជាតិចិនកំពុងដើរ ។
ករណីទី៤ ឆក់ទូរស័ព្ទដៃម៉ាក VIVO ពណ៌ខ្មៅ នៅចំណុចផ្លូវលេខ១០៥ កែងផ្លូវលេខ៣១០ សង្កាត់បឹងកេងកងទី២ ខណ្ឌចំការមន រាជធានីភ្នំពេញ កាលពីថ្ងៃទី២២ ឧសភា ឆ្នាំ២០១៨ វេលាម៉ោងប្រហែល១០យប់ ពីមនុស្សប្រុសម្នាក់ជនជាតិចិនកំពុងជិះម៉ូតូ Pas app ។ លើកទី៥ ឆក់ទូរស័ព្ទដៃម៉ាកអាយហ្វូន៦ ពណ៌ស នៅចំណុចរង្វង់មូលសម្តេចសង្ឈជួនណាត សង្កាត់ទន្លេបាសាក់ ខណ្ឌចំការមន កាលពីថ្ងៃទី១ មិថុនា ឆ្នាំ២០១៨ វេលាម៉ោងប្រហែល៨និង៣០នាទីយប់ ពីមនុស្សប្រុសម្នាក់ជនជាតិចិនកំពុងដើរមានគ្នាប្រហែល៥នាក់ ។ និងលើកទី៦ ឆក់ទូរស័ព្ទដៃម៉ាក HUWIE ពណ៌ស នៅចំណុចផ្លូវលេខ១០៥ កែងផ្លូវលេខ ៤៥៤ សង្កាត់ទួលទំពូងទី១ ខណ្ឌចំការមន កាលពីថ្ងៃទី៥ ឧសភា ឆ្នាំ២០១៨ វេលាម៉ោងប្រហែល៧និង៤០នាទីយប់ ពីមនុស្សប្រុសម្នាក់ជនជាតិចិន ។
ជនសង្ស័យ និងវត្ថុតាងត្រូវសមត្ថកិច្ចកសាងសំណុំរឿងបញ្ជូនទៅសាលាដំបូងរាជធានីភ្នំពេញតាមនីតិវិធី ៕
ចែករំលែកព័តមាននេះ