ខេត្តស្វាយរៀង ៖ មានករណី បុរសជាប្តីសង្ស័យជំងឺសរសៃប្រសាទរើឡើង បានទាញគល់ឫស្សីវាយប្រពន្ធ បណ្តាលឱ្យស្លាប់នៅខាងមុខផ្ទះ បង្កឲ្យចៅៗមានការភិតភ័យ និងស្រែកយំ ផ្អើលដល់អ្នកភូមិ រត់មកចោមរោមមើលនិងនាំក្មេងទាំង២នាក់ចេញពីផ្ទះ…
ខេត្តស្វាយរៀង ៖ មានករណី បុរសជាប្តីសង្ស័យជំងឺសរសៃប្រសាទរើឡើង បានទាញគល់ឫស្សីវាយប្រពន្ធ បណ្តាលឱ្យស្លាប់នៅខាងមុខផ្ទះ បង្កឲ្យចៅៗមានការភិតភ័យ និងស្រែកយំ ផ្អើលដល់អ្នកភូមិ រត់មកចោមរោមមើលនិងនាំក្មេងទាំង២នាក់ចេញពីផ្ទះ ព្រមទាំងបានប្តឹងរាយការណ៍ជូនទៅសមត្ថកិច្ចនៃអធិការដ្ឋាននគបាលស្រុកស្វាយជ្រំ ចុះព័ទ្ធចាប់បុរសជាប្តី អស់រយៈពេល១ម៉ោង ទើបចាប់ខ្លួនបាននៅកន្លែងកើតហេតុបញ្ជូនទៅអធិការដ្ឋានស្រុកស្វាយជ្រំ ដើម្បីសាកសួរ។
ហេតុការណ៍ខាងលើនេះបានបង្កការភ្ញាក់ផ្អើលកើតឡើងនៅវេលាម៉ោង ០៤និង៤៥នាទីរសៀលថ្ងៃទី ០៧ ខែមេសា ឆ្នាំ២០២៦ ស្ថិតនៅភូមិតារក្ស ឃុំឈើទាល ស្រុកស្វាយជ្រំ ខេត្តស្វាយរៀង ។
បើតាមប្រភពពីប្រជាពលរដ្ឋបានឲ្យដឹងថា ស្ត្រីរងគ្រោះជាប្រពន្ធឈ្មោះមឿន អាយុ៦០ឆ្នាំ រីឯជនដៃដល់ជាប្តីឈ្មោះរ៉ន អាយុ៦២ឆ្នាំ មានជំងឺសរសៃប្រសាទ ដោយសារញៀនស្រា ហើយពេលផឹកស្រាស្រវឹងប្រើហិង្សាលើគ្រួសារ និងធ្លាប់កាប់ប្រពន្ធ បណ្តាលឲ្យរងរបួស២លើករួចមកហើយ ត្រូវបានសមត្ថកិច្ចចាប់យកទៅអប់រំ រួចឲ្យមកផ្ទះវិញ ហើយក៏មិនដែលឈ្លោះប្រកែកជាមួយប្រពន្ធទៀតទេ ។
តាមប្រភពដដែលបានបន្តថា កូនៗបានរៀបការ រួចបែកផ្ទះទៅរស់នៅផ្សេង ចំណែកកូនប្រុសម្នាក់បានយកកូនប្រុសស្រីមកផ្ញើឳពុកម្តាយឲ្យជួយមើលចៅៗ ។ ដោយប្តីប្រពន្ធជាប់រវល់ទៅធ្វើការនៅរោងចក្រ មិននឹកស្មានថាឳពុកដែលមានជំងឺសរសៃប្រសាទរើឡើងវិញ និងវាយម្តាយ បណ្តាលឲ្យស្លាប់បែបនេះសោះ។
ទោះបីជាយ៉ាងណា សមត្ថកិច្ចបានចាប់ខ្លួនបុរស់ជាប្តីយកទៅសាកសួរមូលហេតុ ក្រោយពីជនសង្ស័យយកគល់ឬស្សីវាយប្រពន្ធចំកង្ចឹង.កពីក្រោយ បណ្តាលឲ្យបាក់កស្លាប់យ៉ាងអាណោចអធម័។
ក្រោយពីសមត្ថកិច្ចចុះពិនិត្យ និងធ្វើកោសល្យវិច្ច័យរួចបានប្រគលសពឲ្យក្រុមគ្រួសារយកទៅធ្វើបុណ្យតាមប្រពៃណី។ រីឯជនសង្ស័យជាប្តី ត្រូវបានសមត្ថកិច្ចកសាងសំណុំរឿងបញ្ជូនទៅតុលាការចាត់ការតាមនីតិវិធី ៕
ចែករំលែកព័តមាននេះ