ប្រទេសឥណ្ឌា ៖ ប្រតិបត្តិការជួយសង្គ្រោះចូលរួមដោយឧទ្ធម្ភាគចក្រច្រើនសិបគ្រឿង និងនាវាច្រើនរយគ្រឿងកំពុងប្រព្រឹត្តទៅនៅរដ្ឋ KERALA ដើម្បីជួយមនុស្សច្រើនពាន់នាក់ ដែលជាប់ក្នុងទឹកជំនន់យ៉ាងអាក្រក់បំផុត បណ្ដាលឲ្យមនុស្សស្លាប់ជាង៣២០នាក់ហើយ នៅរដ្ឋភាគខាងត្បូងឥណ្ឌានេះ ដែលជួបប្រទះនឹងភ្លៀងធ្លាក់ថ្មីៗទៀតនាថ្ងៃទី១៨សីហា។
ប្រមុខរដ្ឋាភិបាលរដ្ឋ KERALA លោក PINARAYI VIJAYAN សរសេរតាម TWITTER ថា តុល្យការអ្នកស្លាប់មកទល់ពេលនេះមានយ៉ាងតិច៣២៤នាក់រយៈពេល១០ថ្ងៃ។លោកបន្តថា រដ្ឋនេះកំពុងតែប្រឈមមុខនឹងគ្រោះទឹកជំនន់អាក្រក់បំផុត ពុំធ្លាប់មានចាប់តាំងពី១សតវត្សមកហើយ។
ចំណែកបណ្ដាសារព័ត៌មានរៀបរាប់ថា យ៉ាងហោចណាស់សាកសពមនុស្ស១៤នាក់ទៀត ទើបរកឃើញនាថ្ងៃទី១៨សីហា។ ហើយបណ្ដាអ្នកទទួលខុសត្រូវរដ្ឋ KERALAនិយាយថា តុល្យការអ្នកស្លាប់នឹងមានខ្ពស់ជាងនេះទៀត ព្រោះតែមានការបាក់ដីថ្មីៗ។
ប្រតិបត្តិការជួយសង្គ្រោះបើកធ្វើដោយមានជំនួយរបស់កងយោធាច្រើនរយនាក់ ឧទ្ធម្ភាគចក្រយោធាជាង៣០គ្រឿង និងនាវា៣២០គ្រឿង ដើម្បីជួយមនុស្សច្រើនពាន់នាក់ ដែលជាប់ក្នុងទឹកជំនន់។ បើយោងតាមអាជ្ញាធរថា មនុស្សសរុប៣១០.០០០នាក់ដែលគ្មានជម្រក បានភៀសខ្លួនមកកាន់ជំរំ២០០០កន្លែង។ រីឯទំនប់ និងអាងស្តុកទឹកច្រើនសិបកន្លែងត្រូវទំលាយ ព្រោះកម្ពស់ទឹកឡើងដល់កម្រិតអាសន្ន នាំឲ្យទឹកជន់លិចភូមិជាច្រើននៅពីខាងក្រោម៕
ចែករំលែកព័តមាននេះ