រាជធានីភ្នំពេញ៖ បុរសម្នាក់បើករថយន្តមួយគ្រឿងម៉ាកព្រូសក្នុងល្បឿនយ៉ាងលឿនបានបុកគ្នាជាមួយរថយន្តម៉ាកកូរ៉ូឡាចំពីមុខពេញទំហឹង បណ្តាលឱ្យរងការខូចខាតយ៉ាងដំណំ ហើយរថយន្តម៉ាកព្រូសសុខចិត្តយករថយន្តកូរ៉ូឡាទៅជួសជុលឱ្យហើយ តែម្ចាស់រថយន្តម៉ាកកូរ៉ូឡាសុំថែមសំណងទៀត ហេតុការណ៍នេះបានកើតឡើងកាលពីវេលាម៉ោង១១និង២០នាទីយប់ថ្ងៃទី១៦ ខែសីហា ឆ្នាំ២០១៨ តាមបណ្តោយផ្លូវព្រះនរោត្តមកែងផ្លូវ២២៨ នៅចំណុចក្បែរនឹងក្រសួងអប់រំយុវជននិងកីឡាស្ថិតនៅក្នុងសង្កាត់ជ័យជំនះ ខណ្ឌដូនពេញ ។
សាក្សីដែលគេឃើញហេតុការណ៍បានឱ្យដឹងថា មុនពេលកើតហេតុ គេឃើញបុរសម្នាក់មិនស្គាល់អត្តសញ្ញាណមានដឹកប្រពន្ធ និងកូនតូច២នាក់ទៀតបើកបររថយន្តមួយគ្រឿងម៉ាកកូរ៉ូឡា ពណ៌ក្រហម ពាក់ស្លាកលេខភ្នំពេញ ២I-៩១៤៨ បើកបរតាមបណ្តោយផ្លូវព្រះនរោត្តមក្នុងទិសដៅពីជើងទៅត្បូង លុះពេលមកដល់ផ្លូវកែងបំបែកជាបួន ក៏ស្រាប់តែមានរថយន្តមួយគ្រឿងទៀតម៉ាកព្រូស ពណ៌ស ពាក់ស្លាកលេខ ភ្នំពេញ ២AK-២០២៧ បើកបរតាមបណ្តោយផ្លូវ២២៨ ក្នុងទិសដៅពីលិចទៅកើតក្នុងល្បឿនយ៉ាងលឿនគោលបំណងបត់ឆ្វេងឆ្លងផ្លូវ ។
ប្រភពដដែលបានបន្តថា រថយន្តម៉ាកព្រូសនោះមិនបានបន្ថយល្បឿននោះទេ ហើយចាប់ហ្វ្រាំងអត់ទាន់ក៏ជ្រុលបុករថយន្តម៉ាកកូរ៉ូឡាចំពីមុខផ្នែកខាងស្តាំពេញទំហឹង បណ្តាលក្រពឹត និងបែកកញ្ចក់រថយន្តខាងមុខផ្នែកខាងស្តាំ និងបណ្តាលឱ្យរងរបួសស្ត្រីដែលជិះក្នុងរថយន្តមុតកញ្ចក់ចំក រីឯរថយន្តព្រូសវិញរងការខូច
ខាតខ្ទេចអស់មួយកំណាត់ខាងមុខទៅមុខលែងរួច ។ ភ្លាមៗនោះដែរ ម្ចាស់រថយន្តព្រូសសុំចរចាគ្នាជាមួយខាងម្ចាស់រថយន្តកូរ៉ូឡា ដោយធានាថាជួសជុលឱ្យស្អាតដូចដើមឡើងវិញ ប៉ុន្តែខាងរថយន្តម៉ាកកូរ៉ូឡាមិនព្រម ដោយចង់ឱ្យជួសជុលរថយន្តហើយ ចង់បានសំណងទៀត ពេលនោះម្ចាស់រថយន្តព្រូសនោះទុករថយន្តចោល ហើយជិះទៅជាមួយមិត្តភក្តិបាត់ស្រមោល។
ក្រោយពេលកើតហេតុ រថយន្តម៉ាកព្រូស និងរថយន្តម៉ាកកូរ៉ូឡា ត្រូវបានសមត្ថកិច្ចធ្វើការវាស់វែងយកទៅរក្សាទុកនៅការិយាល័យចរាចរណ៍ផ្លូវគោករងចាំដោះស្រាយគ្នានៅពេលក្រោយទៀត ៕
ចែករំលែកព័តមាននេះ