ខេត្តព្រៃវែង ៖ តាមសេចក្តីរាយការណ៍ព័ត៌មានបឋមបានឱ្យដឹងថា កាលពីវេលាម៉ោង៧ និង ៣០នាទីល្ងាចថ្ងៃទី១៥ សីហា កម្លាំងសមត្ថកិច្ននគរបាលជំនាញស្រុកកញ្ជ្រៀច បានសហការជាមួយនាយកដ្ឋានសន្តិសុខផ្ទៃក្នុង បានឃាត់ខ្លួនជនសង្ស័យម្នាក់ឈ្មោះ ប៉ាន់ យ៉ា ហៅ អួន ភេទប្រុស អាយុ៣៩ឆ្នាំ ជាជនជាតិថៃ ដែលរស់នៅភូមិបាតង ឃុំបាងលា ស្រុកបាតង ខេត្តភូកេត ប្រទេសថៃ ។
ការឃាត់ខ្លួនជនសង្ស័យខាងលើនោះ សមត្ថកិច្ចបានធ្វើឡើងនៅចំណុចភូមិឆ្អឹងជំនី ឃុំកញ្ជ្រៀច ស្រុកកញ្ជ្រៀច ខេត្តព្រៃវែង ពាក់ពន្ធ័នឹងករណីឃាតកម្មបាញ់សម្លាប់ជនរងគ្រោះ២នាក់ ដោយកាំភ្លើងខ្លីម៉ាក K៥៩ បណ្តាលឱ្យស្លាប់នៅនឹងកន្លែង លើភ្នំខោជីចាន់ ខេត្តឈុនបុរី ។
ជនរងគ្រោះដែលស្លាប់ទាំង២នាក់ ម្នាក់ឈ្មោះ ហ្គ្រុន ភេទប្រុស អាយុ២១ឆ្នាំ និង ម្នាក់ទៀតឈ្មោះ សាប់ប៉ាយ ភេទស្រី អាយុ២០ឆ្នាំ រស់នៅខេត្តកាឡាស៊ីន ប្រទេសថៃ ។
ក្រោយឃាត់ខ្លួនជនសង្ស័យខាងលើ សមត្ថកិច្ចនគរបាលស្រុកកញ្ជ្រៀច ខេត្តព្រៃវែង បានប្រគល់ជនសង្ស័យឱ្យទៅនាយកដ្ឋានសន្តិសុខផ្ទៃក្នុងក្រសួងមហាផ្ទៃ ដើម្បីបន្តនីតិវិធី ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ