រាជធានីភ្នំពេញ ៖ ក្រុមចោរឆក់កំពុងធ្វើសកម្មភាពអុកឡុកយ៉ាងគគ្លើននៅតាមមហាវិថីសហព័ន្ធរុស្ស៊ី ត្រង់ចំណុចមុខអាកាសយានដ្ឋានអន្តរជាតិភ្នំពេញ ក្រោយពីការធ្វើសកម្មភាពបានសម្រេចហើយ ក្រុមចោរបានរត់គេចខ្លួនបាត់ដោយសុវត្ថិភាពទាំង២លើក។ តាមប្រភពព័ត៌មានបានឲ្យដឹងថា ហេតុការណ៍ខាងលើត្រូវបានគេដឹងថា លើកទី១បានកើតឡើងកាលពីវេលាម៉ោង១២ និង៣០នាទីរសៀល…
រាជធានីភ្នំពេញ ៖ ក្រុមចោរឆក់កំពុងធ្វើសកម្មភាពអុកឡុកយ៉ាងគគ្លើននៅតាមមហាវិថីសហព័ន្ធរុស្ស៊ី ត្រង់ចំណុចមុខអាកាសយានដ្ឋានអន្តរជាតិភ្នំពេញ ក្រោយពីការធ្វើសកម្មភាពបានសម្រេចហើយ ក្រុមចោរបានរត់គេចខ្លួនបាត់ដោយសុវត្ថិភាពទាំង២លើក។ តាមប្រភពព័ត៌មានបានឲ្យដឹងថា ហេតុការណ៍ខាងលើត្រូវបានគេដឹងថា លើកទី១បានកើតឡើងកាលពីវេលាម៉ោង១២ និង៣០នាទីរសៀល ថ្ងៃទី១៥ ខែសីហា ឆ្នាំ២០១៨ នៅតាមមហាវិថីសហព័ន្ធរុស្ស៊ី ត្រង់ចំណុចមុខអគ្គនាយកដ្ឋាន អន្តោប្រវេសន៍ និងមុខអាកាសយានដ្ឋានអន្តរជាតិភ្នំពេញ ស្ថិតនៅក្នុងភូមិក្បាលដំរី១ សង្កាត់កាកាប១ ខណ្ឌពោធិសែនជ័យ។
បង្កឡើងដោយជនសង្ស័យ១ក្រុមបានធ្វើសកម្មភាពឆក់កាបូបពីអ្នកដំណើរ ជនជាតិចិនដែល កំពុងជិះម៉ូតូរ៉ឺម៉កកង់បី ធ្វើដំណើរចេញពីភ្នំពេញទៅអាកាសយានដ្ឋាន។ ជនជាតិចិនទាំងនោះមិនត្រូវបានស្គាល់ឈ្មោះឡើយហើយក៏មិនបានដឹងថានៅក្នុងកាបូបនោះមានលុយប៉ុន្មាន និងសម្ភារអ្វីខ្លះដែរ ខណៈពេលកើតមានសកម្មភាពចោរឆក់បែបនេះ នគរបាលប៉ុស្តិ៍កាកាប១ និងនគរបាលខណ្ឌពោធិ៍បានចេញធ្វើការពួនស្ទាក់ភ្លាមៗដែរ ប៉ុន្តែរកមិនឃើញក្រុមចោរនោះឡើយ។
ប្រភពដដែលបានបន្តទៀតថា អ្វីដែលហួសចិត្តនោះគឺខណៈពេលដែលកម្លាំងនគរបាលកំពុងតែ ធ្វើការពួនស្ទាក់បទល្មើសទី១នៅឡើយ ១០នាទីក្រោយមកគឺនៅវេលាម៉ោង១២ និង៣០នាទី រសៀលថ្ងៃដដែល ស្រាប់តែមានសកម្មភាពចោរ១ក្រុមទៀតធ្វើសកម្មភាពឆក់កាបូបពីស្ត្រីម្នាក់បាន សម្រេចទៀត។ ជនសង្ស័យមានគ្នា២នាក់ ជិះម៉ូតូម៉ាកហុងដាស្កុបពីមួយគ្រឿង បានធ្វើសកម្មភាពឆក់ កាបូបស្ពាយ ពីស្ត្រីម្នាក់ឈ្មោះ ឡុង សុវណ្ណ អាយុ៣៤ឆ្នាំ មុខរបរលក់ដូរ មានទីលំនៅ ភូមិគុម្ពោធស្បូវ ឃុំបែកចាន ស្រុកអង្គស្នួល ខេត្តកណ្តាល។
នៅក្នុងកាបូបរបស់គាត់មានលុយជាង១លានរៀល និងជិត១ពាន់ដុល្លា ទូរស័ព្ទដៃមួយគ្រឿង ថ្នាំពេទ្យ និងឯកសារសម្ភារៈមួយចំនួនទៀតផងដែរ។ ប្រភពដដែលបានបន្តទៀតថា នៅមុនពេលកើតហេតុស្ត្រីរងគ្រោះ បានជិះម៉ូតូមួយគ្រឿង ម៉ាកហុងដាឌ្រីម សេ១២៥ ស៊េរីឆ្នាំ២០១៣ ពណ៌ខ្មៅ ពាក់ស្លាកលេខ សៀមរាប 1N-4336 ធ្វើដំណើរក្នុងទិសដៅពីកើតទៅលិច។ ដោយគាត់ទើបចេញពីពីពិនិត្យសុខភាពនៅមន្ទីរពេទ្យត្រឡប់ ទៅផ្ទះវិញ លុះពេលទៅដល់ត្រង់ចំណុចមុខអគ្គនាយកដ្ឋានអន្តោប្រវេសន៍ដដែលនោះ ក៏ត្រូវបានជនសង្ស័យគ្នា២នាក់ ជិះម៉ូតូស្កុបពី ពណ៌ខ្មៅ មិនចាំស្លាកលេខ តាមពីក្រោយ មកឆក់យកកាបូបទៅបាត់ ដោយសុវត្ថិភាពតែម្ដង។
ពេលនោះនគរបាលបានធ្វើការពួនស្ទាក់ ប៉ុន្តែសូម្បីតែស្រមោលចោរបន្តិចក៏មិនឃើញផង ហើយមួយរយៈពេលកន្លងមកនេះកើតមានសកម្មភាព ចោរឆក់ជាបន្តបន្ទាប់នៅតាមមហាវិថីសហព័ន្ធរុស្ស៊ីត្រង់ចំណុចខាងលើនោះ។ ប៉ុន្តែនគរបាលក៏បានធ្វើការបង្ក្រាប និងចាប់ខ្លួនបានជាបន្តបន្ទាប់ហើយដែរតែដូចជាចាប់មិនអស់នៅតែកើតមានសកម្មភាពឆក់ដដែលៗ ហើយថ្ងៃខ្លះកើតមាន២លើក និងថ្ងៃខ្លះទៀតកើតមានរហូតដល់ទៅ៣លើកក៏មានដែរ៕
https://youtu.be/3u4eo0JifWA
ចែករំលែកព័តមាននេះ